Uyghur analizchilar : xitay kompartiyiside armanigha chushluq derman yoq

Xitay kompartiyisining - 18 qurultiyi bügün - 14 noyabir ayaghlashti. Qurultay doklatida xitay kompartiyisining ikki 100yilliq küresh nishani otturigha qoyuldi, junggoche sotsiyalizm neziriyisige yene "Sekkiz telep" qétildi, xitayning bu nöwetlik qurultiyida"5 Ni bir gewdileshtürüsh" telep qilindi,"Özgirishchan, mulazimetchan, ijadchan markiszmliq hakimiyet béshidiki partiye qurush" otturigha qoyuldi mulazimet bu qétimqi kompartiye qurultéyidiki achquchluq söz. "Omumyüzlük halliq jem'iyet qurup chiqish üchün küresh qilish" nishani belgilendi.
Muxbirimiz gülchéhre
2012-11-14
Élxet
Pikir
Share
Print
Xitay kompartiyisining 18-qurultiyidin bir körünüsh
Xitay kompartiyisining 18-qurultiyidin bir körünüsh
AFP


Sotsiyalistik kéngesh démokratiyisi siyasiy tüzülme islahatining muhim mezmuni qilip békitildi. Bular xitay kompartiyisining neziriye sistémisida özgirish bolidighanliqining ipadisimu ? bu qurultayda meydan'gha kelgen siyasiy neziriyilerning ilgiriki nöwetlik xitay kompartiye qurultaylirida otturigha qoyulghan neziriyiler bilen yarqin perqi barmu ? bu nuqtilarda amérikidiki siyasiy analizchilardin ilshat hesen we memet toxti ependilerning mulahizilirini muxbirimiz gülchéhre teyyarlighan programmidin anglang.

Xitay kompartiyisi markisizm idiyisini öz hakimiyitige maslashturush jeryanida "Maw zédong idiyisi" bilen islahat, échiwétish jeryanida yene "Junggoche sotsiyalizm" din ibaret ikki chong neziriyisni xitay kompartiyisining qibilinamisi süpitide neziriye sistémisigha kirgüzdi. Bu neziriye sistémisida xitay kompartiyisi yene, déng shawping neziriyisi, üchke wekillik qilish idiyisi, ilmiy tereqqiyat qarishidin ibaret neziriyilerni yétekchi idiye qildi.

Partiye - 18 qurultiyida "Omumyüzlük halliq jem'iyet qurup chiqish üchün küresh qilish" otturigha qoyuldi. Yeni buningda 2020 - yiligha barghanda sheher, yéza ahalisining yilliq kirimini 2012 - yilidikidin bir hesse yuqiri kötürüshni wede qildi. Xitay kompartiyisining her nöwetlik hoquq almishishida meydan'gha kelgen bu idiye we nishanliri heqqide mulahize yürgüzgen amérikidiki Uyghur siyasiy analizchi ilshat hesen ependi, emeliyette xitayning her nöwet debdebilik otturigha chiqarghan bu xil neziriyiliride mahiyetlik perq yoqluqini otturigha qoydi.

- 18 Qurultay doklatida yene, xitay kompartiyisining ikki yüz yilliq küresh nishani otturigha qoyuldi. Uning biri xitay kommunistik partiyisining qurulghinigha 100yil bolghanda omumyüzlük halliq jem'iyet qurup chiqish, yene biri yéngi junggo qurulghinigha 100yil bolghanda qudretlik, bayashat, démokratik, medeniy, inaq sotsiyalistik zamaniwilashqan dölet qurup chiqish dep körsitildi. Ilshat hesen ependi xitayning ri'alliqi we xitay kompartiyisining ajizliqliri xitayning bu ikki yüz yilliq nishanlirigha yétishige yol qoymaydu dep körsitip "Eger xitay tüptin siyasiy islahat élip barmighanda bu nishanliri peqet xam xiyal xalas, epsus bu qurultaydimu xitayda bir islahat bolushidin bisharet körmidim" dédi.

Xitayning her 10 yilda échilidighan kompartiye qurultiyi xitay partiye ichi rehberlik qatlimidiki özgirishining meydani, xitay kompartiyisi siyasiy byuruning bu nöwetlik da'imiy hey'et ezasi shi jinping xitay kompartiyisi bash sékrétari xu jintawning hoquqini ötküzüwélish aldida, Uyghur analizchilardin amérikidiki memet toxti ependi, dunya axbaratlirida mulahize qiliniwatqandek, bu nöwetlik xitay kompartiye qurultiyining yenila ilgiriki nöwetlik xitay rehberliri belgilep bergen yolda kétip barghanliqini tekitlep, shi jinpingning yéngi bir nöwetlik xitay rehberlik ornigha chiqishi peqet"Kompartiye rehberlik tizimlikidikila özgirish bolup qélishi mumkin, bashqa chong ümid körmidim" dep analiz qildi.

Xu jintaw - 18 qurultayda qilghan doklatida "Asasiy qatlam partiye qurulushi xizmitide yéngiliq yaritip, partiyining hakimiyet yürgüzüsh teshkili asasini puxtilash kérek" dep alahide tekitligen idi, memet toxti ependining qarishiche, xitay kompartiyisining eng ajiz nuqtisi del asasiy qatlam.

Toluq bet