Xitay da'irilirining robért gayits bilen sözlishishtin qachqanliqining heqqi sewebi néme?

Xitay tünügün 'bu bir bi'ep waqit ' dep bahane körsitip, amérika dölet mudapi'e ministiri robért gayits bilen sözlishishni ret qilghanliqini jakarlighan idi. Emdi bügün 'robért gayits bilen sözlishish ishi téxi orunlashturulmidi' dep gépini özgertip jakarlidi.
Muxbirimiz weli
2010.06.03
Share on WhatsApp
Share on WhatsApp
Bomba-bilen-chokturulgen-jenubi-Koriye-herbi-paraxodi-305.jpg Süret, 2010 - yili 15 - aprél küni, jenubiy koriyining chionan namliq shimaliy koriye teripidin su asti bombisi bilen chöktürüwétilgen herbiy paraxotini su astidin kiran bilen süzüp chiqiriwatqan körünüsh.
AFP Photo

Birleshme agéntliqi tünügün, amérika dölet mudapi'e ministiri robért gaytsning asiya -yawropa sepiri bashlan'ghanliqini, bu jeryanda, u sin'gaporda ötküzülidighan asiya bixeterlik yighinigha qatnishidighanliqini, ottura asiya döletliri bilenmu sözlishidighanliqini, shundaqla bu jeryanda yene béyjingda toxtap, xitay da'iriliri bilen amérika -xitay herbiy munasiwitini chingitish heqqide sözlishishni pilanlighanliqini, emma xitay da'iriliri 'bu bi'ep waqit ' dep bahane körsitip, uning bilen sözlishishni ret qilghanliqini xewer qilghan idi.

Robért gayits sin'gaporda xitayning herbiy ömiki bilen körüshmigen

Roytrs agéntliqining sin'gapordin bayan qilishiche, amérika dölet mudapi'e ministiri robért gayits sin'gaporda échilghan asiya bixeterlik yighinida, yaponiye, jenubiy koriye qatarliq döletlerning herbiy ömekliri bilen körüshken, emma xitayning bu yighin'gha ewetilgen herbiy ömiki bilen körüshmigen.

'Xitayning azadliq armiyisi amérika bilen bolghan herbiy munasiwitini yaxshilashni xalimaywatidu'

Xewerde bayan qilinishiche, amérika dölet mudapi'e ministiri robért gayits sin'gaporda qilghan sözide aldi bilen 'xitayning azadliq armiyisi amérika bilen bolghan herbiy munasiwitini yaxshilashni xalimaywatidu', 'shimaliy koriye toghrisida sözlishish ular üchün paydiliq idi, eger ular biz bilen sözlishishni yaqturmisa, bizmu yaqturmaymiz' dep jakarlighan.

Xewerde éytilishiche, xitay bu yil 1‏ - ayda, obama hökümitining teywen'ge 6 milyard 400 milyon amérika dolliriliq qoral sétish pilanini amérika dölet mejlisi testiqlighanliqigha bolghan naraziliqini, bu qétim robért gaytning asiya -yawropa sepiri bashlan'ghanda ipadiligen. Emeliyette robért gayits bu qétim béyjingda toxtap, xitay da'iriliri bilen herbiy munasiwetni chingitish heqqide sözlishish arqiliq körülgüsi xéyim -xeterlerni azlitishni oylighan.

Xitay shimaliy koriyini bashqa döletler bilen birlikte eyibleshtin özini qachurup kelmekte

Xewerde éytilishiche, amérika bilen jenubiy koriyining herbiy paraxot chöktürüwétilgen weqe toghrisida b d t gha birlikte sun'ghan pikride, bu weqeni 1950 ‏ - yilidin 53‏ - yilighiche dawamlashqan koriye urushidin kéyin, ikki koriye otturisida yüz bergen yene bir qétimliq herbiy toqunush dep körsetken. Bashtin axiri shimaliy koriyining ittipaqdéshi bolup kéliwatqan xitay bu mesilide, gerche shimaliy koriyini eyiblesh terepdari ikenlikini ipadiligen bolsimu, emma bashqa döletler bilen birlikte turup ochuq -ashkara halda shimaliy koriyini eyibleshtin özini qachurup kelmekte.

'Men xitay herbiy da'irilirining dunyaning ortaq köz qarashlirini chüshenmeywatqanliqidin ümidsizlendim'

Xewerde éytilishiche, robért gayits sin'gaporda qilghan sözide yene 'xu jintaw bilen obama hazir bu ikki döletning munasiwitini yaxshi terepke yéteklep kéliwatidu. Emma bu ikki chong döletning herbiy munasiwiti buning ichide emes. Eger bu ikki döletning herbiy munasiwiti yaxshi bolsa, weziyetni xata mölcherlesh yaki öz -ara uqushmasliq yüz bérishtin xali bolghili bolatti. Men hazir xitay herbiy da'irilirining özini zamaniwilashturush jeryanida dunyaning ortaq köz qarashlirini chüshenmeywatqanliqidin ümidsizlendim' dégen.

Xu jintaw azadliq armiyining qesem, forma, ish -herikiti toghrisidiki qa'ide -tüzümini yéngilash heqqidiki buyruqni imzalighan

Xitayning shinxu'a agéntliqining bayan qilinishiche, xitay merkizi herbiy komitétining re'isi xu jintaw bügün azadliq armiyining qesem, forma, ish -herikiti toghrisidiki qa'ide - tüzümini yéngilash heqqide buyruq imzalighandin kéyin, hazir azadliq armiyining idare qilinishi we maliye tüzümi yaxshilinishqa bashlighan.

'Robért gayits bilen sözlishish ishi téxi orunlashturulmidi'

Xitayning 'jéjang xewerliri' de bayan qilishiche, xitay tashqi ishlar ministirliqi bayanatchisi jang yü bügün 'robért gayits bilen sözlishish ishi téxi orunlashturulmidi' dep gépini özgertip jakarlighan.

Xitay da'iriliri robért gayits bilen hazirqi waqitta sözlishishtin qachqanliqining heqqi sewebi néme? bu heqte bir qisim mulahizichiler tünügün, xitay hazir 'tötinchi iyun' weqesining 21 yilliqi yétip kéliwatqan bundaq waqitta, robért gaytning béyjinggha kélishini xalimighan dep qarighan idi.

Xitay, shimaliy koriyining urush partlisa buni xitaydin körüshidin özini qachüralmaydu

Bügün xitayning herbiy mulahize tor betliride körsitilishiche, 'chonen' belgilik paraxot weqesi tüpeylidin ikki koriye otturisida jiddiylik peyda boluwatqan ehwal astida, bolupmu amérika bilen jenubiy koriye hedep birlikte herbiy meshiq ötküzüwatqan ehwal astida, eger xitay da'iriliri amérika mudapi'e ministiri bilen sözleshse, ular néme déyishkenlikidin qet'iynezer, eger ikki koriye otturisida urush partlapla qalsa, xitay eng qedirdan sepdishi shimaliy koriyining buni xitaydin körüshidin özini qachüralmaydula emes, belki xitay bilen shimaliy koriye otturisida chong 'balayi ‏ - qaza ' yüz béridu.

Amérika bilen jenubiy koriye kéler heptide téximu köp herbiy meshq ötküzüshke teyyarlanmaqta

Birleshme agéntliqining bayan qilishiche, amérika bilen jenubiy koriye hazir, su asti paraxotlirigha taqabil turush mezmunidiki birleshme herbiy meshiqlerni kéler heptide téximu köp ötküzüshke teyyarlanmaqta. Bu herbiy meshiqqe amérikining yadro paraxotlirimu qatnishidu.

'Koriye yérim arilida her waqit urush partlash éhtimali bar'

Fransiye agéntliqining bayan qilishiche, shimaliy koriyining b d t de da'im turushluq wekili rijanggon bügün jenwede échiliwatqan qoralsizlandurush muhakime yighinida 'koriye yérim arilidiki jiddiylik yuqiri pellige kötürülmekte, her waqit urush partlash éhtimali bar', 'bu jiddiylikni amérika bilen jenubiy koriye keltürüp chiqardi' dep jakarlighan.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.