Xitay kucharda, térrorchilarni pash qilghanlargha 200 ming yüen mukapat béridighanliqini élan qilghan

Tengritagh xewer torining tünügünki xewiride ashkarilinishiche, kucha nahiyilik saqchi idarisi térrorchilarni pash qilghanlargha 200 ming yüen mukapat puli béridighanliqini, buning bilen bille pash qilghuchilarning mexpiyetlikini saqlaydighanliqini we bixeterlikini qoghdaydighanliqini élan qilghan.
Muxbirimiz shöhret hoshur xewiri
2008-07-16
Share

 Bu chare xitayning térrorgha qarshi teshwiqatta xelqning himayisige érishelmigenlikini körsetse yene bir tereptin, rayonda xalighanche tutqun qilishning köpiyidighanliqidin bisharet bermekte.
 
Xelq'ara teshkilatlarning qarishiche: xitay xelq'ara térrorgha qarshi heriketni süy'istimal qilmaqta. Uyghur pa'aliyetchilirining qarishiche bolsa, xitay Uyghur milliy herikitining xaraktérini burmilap körsetmekte. Mutexessislirining qarishiche bolsa, xitay térrorgha xata tebir bermekte. Xitay bolsa, Uyghurlar teripidin özige qarshi élip bérilghan her qandaq shekildiki naraziliq heriketni térrorluq bilen eyiblimekte. Xitayning bu qétimqi mukapat élani rayonning weziyitini perqliq bir nuqtidin yorutup bermekte.

Amérikida yashawatqan Uyghur pa'aliyetchiliridin ilshat ependining qarishiche, mezkur mukapat élani, xitayning térrorluqqa a'it teshwiqatidiki meghlubiyitining inkasi. Türkiyide yashawatqan Uyghur pa'aliyetchiliridin atawullah shehyar ependining qarishiche, mezkur élan kucha nahiyisining Uyghur milliy qarshiliq heriketliride alahide orun tutup kelgenlikining ipadisi.

Bu nuqtini ilshat ependimu oxshash tekitleydu. Ilshat ependining qarishiche, dunyada yüzde - yüz sap nerse yoq؛ milletlerning süpiti mesilisidimu ehwal shundaq. Dunyadiki her qandaq bir ilghar we her qanche medeniyetlik bir millet terkibidimu menpe'etpers kishiler bolidu. Xitay mezkur mukapat élani arqiliq insan tebi'itidiki bu ajiz nuqtigha xitap qilghan.

Öz heq - hoquqi üchün küresh qilghan, zulumgha isyan kötergen Uyghurlar xitay teripidin ezeldin ijabiy namlar bilen atalghan emes. 1944 ‏ - Yilidiki azadliq inqilabning tunji oqini atqan ghéni batur, fatix muslim, ekber qatarliq kishiler eyni chaghda 6 oghri dep atalghan. 1950 ‏ - Yillardiki milliy inqilabchilar eksil'inqilabchi atalghan. Mana bu nuqtilarni eskertken ilshat ependi, xitayning mezkur mukapatining, Uyghurlarning öz qehrimanlirining qedir - qimmitini téximu toluq tonup yétishke seweb bolidighanliqini bildürdi.
 
Atawullah shahyar ependining qarishichimu, Uyghurlar bügün erkin pikir qilish we erkin telim ‏ - terbiye muhitidin mehrum, shunga mezkur mukapat az sandiki kishilerni qiziqturushi mumkin, emma xitay kütkendek chong netije bérish éhtimalliqi yoq.

Ilshat ependi sözining axirida, "pelestin rehbiri arafatning 50 yil térrorchi atilip axir nobil ténchliq mukapati alghanliqi, jenubi afriqa inqilabchisi mandila nélsonmu 90 yéshigha qeder térrorchi qalpiqi bilen yashighanliqi, uning ene eshu qalpaqtin qutulmay turup nobil ténchliq mukapatigha érishkenliki؛ kosowaning bügünki bash ministiri hashim tachiningmu 10 yilning aldida térrorchilar tizimlikide ikenliki qatarliq pakitlarni eslep ötkendin kéyin, xitayning térrorluq teshwiqatining Uyghurlarni qaymuqturalmaydighanliqi" ni eskertti.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet