Диққәт, хитай маллирида зәһәр бар!


2007-08-09
Share

Баш шитаби нюйорктики балилар оюнчуқлири ширкити маттел, 2 - авғуст күни уқтуруш чиқирип, хитайда ишләнгән бир милйондин артуқ балилар оюнчуқида зәһәрлик мадда барлиқини елан қилғандин кейин, яврупа пуқралириниң хитайда ишләнгән таварларға болған сәгәклики алаһидә ешип кәткән иди.

Мәтбуатлардики учурларға асасланғанда, 3 - авғуст күни яврупа бирлики җиддий агаһландуруш елан қилип, бу хил зәһәрлик мадда тәркиби болған балилар оюнчуқиниң яврупадики германийә, австирийә, белгийә, франсийә, гиритсийә, әнгилийә, ирландийә, голландийә, португалийә, испанийә, чех вә хорватийә қатарлиқ 13 дөләткә кирип болғанлиқини җакарлиғандин кейин, яврупадики нурғун пуқралар хитайда ишләнгән оюнчуқларни мал сатқан дуканларға қайтуруп беришкә башлиған.

Мал қайтуруш шамили германийидә көрүнәрлик һалда күчәйгән

Бу хил мал қайтуруш шамили германийидә көрүнәрлик һалда күчәйгән. Германийидики нурғун гезит - журналлар хитайда ишләнгән таварларниң сүпити начар болупла қалмай, йәнә балилар таварлирида зәһәрлик мадда барлиқини бәс - бәстә елан қилип, кишиләрниң әндишисини техиму күчәйтивәткән.

яврупа бирликиниң баянатчиси, яврупа бирликиниң җиддий тәдбир қоллинип, өз системиси даирисидики 30 дөләттә бу хил зәһәрлик оюнчуқни дәрһал йиғивалғанлиқини елан қилған. Дәл мушу пәйиттә , әнгилийә һөкүмәт даирилири мәлумат елан қилип, хитайда ишләнгән зәһәрлик мадда тәркиби болған оюнчуқлар түриниң 83 хилға йетидиғанлиқини җакарлиған.

Бу һал кишиләрниң хитай таварлиридин һәзәр әйләш туйғусини бирақла көккә көтәргән вә хитай таварлирини қайтуридиғанларниң санини барғансери көпәйтивәткән. Хәвәр елан қилинипла 150дин артуқ херидар дәрһал хитайда ишләнгән балилар оюнчуқлирини қайтуруп бәргән.

"Хитайдин киргүзиливатқан таварлириниң мәсилисиз тавар болушини халаймиз"

Алдинқи һәптә яврупа бирлики истималчиларниң мәнпәәтини қоғдаш оргининиң бир нәпәр рәһбири хитайда зиярәттә болғанда " биз хитайдин яврупа бирлики дөләтлиригә киргүзиватқан таварлириниң мәсилисиз тавар болушини халаймиз. яврупа пуқралириниң бихәтәрлик мәсилиси, мурәссә қилидиған мәсилә әмәс. Хитай һөкүмити алди билән истималчиларниң ишәнчисини капаләткә игә қилиши керәк" дегән болсиму, яврупа пуқралири хитайниң бу илләтлирини түзитишигә һечқандақ капаләтниң мәвҗуд әмәсликини тәкитләшкән.

Улар хитайниң тәқлидчилик қилмишиға қарита йиллардин бери қаттиқ агаһландурушлар берилип кәлгән болсиму, һазирға қәдәр хитайниң буни түзәтмигәнликини пакит сүпитидә көрсәткән.

Германийә ахбаратлирида: " диққәт, хитай маллирида зәһәр бар!"

Германийә ахбаратлирида " диққәт, хитай маллирида зәһәр бар!" дегән агаһландурушқа игә хәвәрләр һелиму көзгә челиқмақта.

Германийә долқунлири радиосиниң 8 - айниң 8 - күнидики хәвиригә асасланғанда, германийә тәрәп мәзкур ширкәттин мал заказ қилишни чәклигән болсиму, кишиләрниң хитай таварлирини қайтуруш ирадисини чәклийәлмигән. Қайтуриливатқан бу таварлар ичидә, тәркипидә зәһәрлик мадда болмиған нәрсиләрму бар икән.

Гәрчә бу хил зәһәрлик мадда болған оюнчуқларниң германийигә киргән сани аран 3миң данә болсиму, нурғун пуқралар "мада ин чина" дегән маркиси болған таварларниң һәммисидин әндишә қилишқа башлиған. Һазирға қәдәр қайтуриливатқан малларниң түри 50 хилдин ашқан болуп, бу малларниң һеч биридә зәһәрлик мадда тәркиби болмисиму, "мада ин чина" дегән маркиси болғанлиқи үчүнла қайтурулған. Мәйли зәһәрлик мадда болсун яки болмисун, хитайда ишләнгән нәрсиләрниң һәр қандиқи кишиләрдә күчлүк әндишә пәйда қилған.

Германийидики нурғун ата - анилар мухбирларниң зиярәтлирини қобул қилғанда, хитай оюнчуқлириниң мутләқ көп қисми пластик нәрсиләрдин ясалған болғач, бу хилдики оюнчуқлардин әзәлдин һәзәр әйләп кәлгәнликини, бәзи металдин ясалған оюнчуқлар ичидики балилар еғизиға тәккүзүши мумкин болған нәрсиләрдинму йирақ туруп кәлгәнликини, әмди болса хитайниң електиронлуқ оюнчуқлиридинму мутләқ һәзәр әйләйдиғанлиқини билдүрүшкән.

" Зәһәрлик балилар оюнчуқлирини ишләпчиқарғучи дөләт "

Дарфурдики қанлиқ тоқунушниң сәвәбкариға айлинип, ғәрб әллиридики образиға қаттиқ дағ чүшүргән хитай һөкүмити, бу қетим зәһәрлик балилар оюнчуқлирини ишләпчиқарғучи дөләт дегән сәтчилик билән әйиблинип, йәнә бир қетим өз инавитини йәргә урувалди. Буниңсизму, ғәрбликләр хитай һөкүмитини ғәрб техникилирини оғрилаш, ғәрбниң һәр хил таварлирини тәқлид қилип ишләштәк уятсизлиқ билән, 2008 - йиллиқ олимпик мусабиқисидин илгири кишилик һоқуқ мәсилисини яхшилаш үчүн бәргән вәдисини әмәлгә ашурмаслиқтәк вапасизлиқ билән вә уйғур вәтини һәмдә тибәтләрдә йүргүзүватқан инсан һәқлири дәпсәндичиликлири билән қаттиқ әйиблимәктә иди.

8 - Айниң 4 - күнидин башлап һәр қайси әлләрдики һөкүмәтсиз тәшкилатлар хитайға қарши наразилиқ намайишлирини күчәйтти. 2008 - Йиллиқ бейҗиң олимпик мусабиқиси мунасивити билән өз образини яхшилаш мәқсидигә йәтмәкчи болуватқан хитай һөкүмити, әксичә, һәр хил инсанийәтсиз қилмишлири билән дуня җамаитиниң барғансери күчлүк ғәзипигә дуч кәлмәктә. (Әкрәм)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт