Xitay malliri misirni qaplap ketti

Süriyide yerlik hünerwenler, toqumichilar we tikishchiler süriye bazarlirini tolduruwetken xitay mallirigha naraziliq bildürüp ish tashlighandin kéyin, bu ehwal misir xelqigimu tesir qilghan. Chünki misir bazarliridiki xitay malliri süriye bazarliridikidin qélishmaydu.
Muxbirimiz ömerjan toxti
2010-05-03
Share

Misirning "el muhit" tor békitide "xitay mallirining ayighi qachan üzülidu?" dégen témida bir maqale élan qilin'ghan bolup, uningda mundaq dep yézilghan:" hökümet barliq teshwiqat wastilirini ishqa sélip, misirliq ish ademlirini yerlik ishlepchiqirishni ilgiri sürüshke teshebbus qiliwatqan mushu künlerde, bazarlirimiz xitay dölitidin kélidighan, nerqi ezan emma chidimaydighan saxta mallar bilen tolup tashmaqta. Yaz pesli kélishi bilen misirning shubra, umraniye, feysel, hulwan we bashqimu rayonliridiki bazarlarda xitayning yermenkiliri échilghandin tashqiri, misirning her qaysi kocha - bazarlirida xitay magizinliri hedep échilmaqta. Bu magizinlarni xitaylar biwasite özliri idare qilmaqta. Mundin bashqa xitayning yash qiz - oghulliri misirning her qaysi sheherlirige tolup tashmaqta. Gahida tosattin biri ishikingizni qaqidu, ishikni achqiningizda, xitay malliri bilen somkilirini tolduruwalghan bir yaki ikki xitay qizi misir shiwisini buzup sözligen halda, élip kelgen nerse ‏- kéreklirini tonushturushqa bashlaydu. Ular misir bazarlirini qoligha alghanning sirtida, somka kötürüsh tijariti bilenmu her qaysi mehellilerning soda ishlirini qoligha éliwalmaqta".

""Xitay malliri misirning yerlik ishlepchiqirishigha ziyan salmaqta

Maqalide yene mundaq déyilgen: "xitay mallirining yolluq we yolsiz halda misir bazarlirigha hedep kirip, yerlik mallarning bazirini kasat qilishi netijiside kélip chiqqan ziyan, shirketler, sodigerler we shexslerni éghir derijide ziyan'gha uchratmaqta. Tor békitimizning muxbirliri misirliq puqralarning misir bazarlirida yéyilip yatqan xitay malliri heqqidiki inkaslirini anglap béqish üchün ular bilen söhbetlerni ötküzgen. Qahire shehirining shubra rayonida olturushluq öy ayali edliye sefwet mundaq deydu: " öyimizning ishiki tola qéqilidu. Her qétimda ishikni achqinimda, bir xitay qizi yoghan somkini kötürüwalghan halda, ishik aldida qarap turidu. Kötürüwalghan somkisi yingne, yip, qol chiriqi, qacha, pichaq we bashqa xitayning öy eshyaliri bilen liq tolghan. Men her qétimda, bu eshyalarning erzanliqigha aldinip köp sétiwalimen. Kéyinki heptisi yene shu nersilerni qayta sétiwalimen. Chünki ularning ishlepchiqarghan nersiliri aran bir hepte esqatidiken. Shundaq qilip öy eshyalirimizning köp qismi xitay mallirigha aylinip boldi. Bu mallarning nerqi erzanliqi bizni qiziqturidiken, emma uzun chidimaydiken. Özimizning dölitide ishlepchiqirilghan yerlik mallirimiz gerche bir az qimmetrek bolsimu, uzun rawaj qilidiken. Shunga hemmidin özimizning yerlik mallirimizning yaxshi ikenlikini chüshinip yettim."

"Xéridarlirimizmu öylirige teyyar ekilip bérilgen xitayning saxta mallirigha aldinip qaldi"

Muxbirlirimiz misirliq dukandarlar bilenmu söhbet élip barghan. Qahire shehiridiki kichik bir teyyar kiyim magizinining igisi muhemmed etiye nahayiti ghezeplen'gen halda mundaq dédi:" xitay malliri öylirimizni xarap qilghanni az dep, emdi dukanlirimizgha ziyan salmaqta. Men burun her küni az dégende 10 ming jüneylik mal satattim. Emma hazir etigendin kechkiche satqan mélim 5 ming jüneyge yetmeydu. Bu xitay mallirining bazarlirimizning her qaysi dukanlirida tolup tashqanliqi, ularning öylerning ishiklirini qéqip yürüp mal sétishliri sewebidin bolmaqta. Buning bilen her pesilde nerse ‏- kéreklirini bizdin sétiwalidighan uzun yilliq xéridarlirimizmu bizdin yüz örüp ketti. Ular öylirige teyyar ekilip bérilgen xitayning saxta mallirigha aldinip qaldi. Biz bolsaq ziyan tartidighan bolup qalduq. Bu ishning aldini almighanda bizning ishimiz téximu qiyinlishidu."

Yuqiridiki awaz ulinishidin, bu heqtiki melumatimizning tepsilatini anglaysiler.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet