Коммунист мустәбитлириниң мәқсити хәлқни итаәтмән һайванға айландуруш


2007.12.07

Йеқинда 'көзитиш журнили' да "коммунист мустәбитлири хәлқни һақарәтләп охшатмиған немә қалди ?" сәрләвһилик бир әслимә елан қилинди. Униңда коммунист мустәбитлири 50 нәччә йилдин буян пүтүн хәлқни, болупму зиялийларни һайванларға охшитип кәмситип һақарәтлигәнлики, бастуруп харлиғанлиқи әсләп өтүлди.

Мавзедуң хәлқни җин‏ - шәйтан дәп һақарәтлигән иди

‏--"Мустәбит түзүм инсанийәтни харлайду, хәлқни адәмдин өзгә бир нәрсиләргә айландуруп қойиду" дегән бир сөз маркисниң китабида бар иди. Лекин өзини 'марксизмчи' дәп атайдиған мавзедуң өткән әсрниң 60 ‏- йиллирида 'мәдәнийәт инқилаби'дегән һәрикәтни қозғиғандин кейинла,‏-‏ дәп башлайду аптор яв җйәнфу әпәнди бу әслимисини, ‏-‏ 'хәлқ гезити' мавзедуңниң тәстиқи буйичә "барлиқ җин-шәйтанларни сүпүрүп ташлайли" дегән шуарни оттуриға қойған иди. Шуниңдин кейин хәлқ, болупму зиялийлар 'җин-шәйтан' яки 'кала' дегәндәк һайван намлири билән һақарәтлинишкә вә 'қотан'ларға солап азаблинишқа башлиди.

Кейин йәнә 'ит', 'ташпақа' дәп һақарәтлиди

Мавзедуң буни аз дәп йәнә тәстиқ йезип, бейҗиң университетидики профессорларни 'ташпақа' дәп һақарәтлиди. Хәлқ ичидики башқа зиялийларни болса 'ит', 'ниҗасәт дөвиси' ваһаказа дәп һақарәтлиди.

Һақарәт - зулум арқилиқ хәлқни бой сундуруп 'итаәтмән қорал' ға айландурмақчи болған иди

‏-‏- Мавзедуң хәлқни бундақ һақарәт вә зорлуқ билән бой сундуруп, ‏- дәп баян қилиниду бу әслимидә, ‏-‏ ахирқи һесабта, хәлқни худди лей феңға охшаш коммунист партийиниңла буйруқи буйичә иш қилип хәлқни қиридиған 'итаәтмән қорал' ға айландурмақчи болған иди. Әмди йерим әср өткәндә, хитайда мустәбитләр хәлққә салған зулумларни әсләш һәр бир киши үчүн өзиниң кишилик һоқуқини, кишилик һөрмитини қоғдиши үчүн мәнпәәтлик.

Мәдәнийәт инқилаби' дегән һәрикәттә уйғурлар техиму еғир харланди

Мавзедуң қозғиған һәрикәтләрдә уйғур хәлқи техиму еғир дәриҗидә һақарәтләнди вә харланди. Һазир шиветсийидә туруватқан уйғур зиялийси һаҗи абдуришит керими өзиниң кәчүрмишлиригә асасән, 1949 ‏- йилидин тартип уйғур хәлқиниң әң пәскәш намлар билән һақарәтлинип кәлгәнликини баян қилди.

Уйғурларни харлаш һазирға қәдәр давамлишиватиду

Һаҗи абдуришит керими әпәндиниң баян қилишичә, мавзедуңдин қалған адәт буйичә уйғурларни һақарәтләш, уйғурларға һәр хил бана ‏- сәвәб билән зулум селиш һазирғичә давамлишиватиду. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.