Xitayda hazir qandaq medeniyet asasiy orunda turidu?

2007-05-29
Élxet
Pikir
Share
Print

5 ‏- Ayning 28 ‏- küni amérikida chiqidighan 'yéngi esir jurnili' da, senshi ölkilik partiye mektep proféssori wuming ependining 'xitayda hazir qandaq medeniyet asasiy orunda turidu' dégen témidiki ray sinash doklati élan qilindi.

Wuming ependining terjimihaligha qarighanda, u uzun yillardin buyan xitaydiki ijtima'iy penler fond jem'iyiti üchün siyasiy neziriye -ma'arip saheside izchil tetqiqat élip bériwatqan proféssor. Uning bayan qilishiche, xitay jem'iyitide hazir dawamlishiwatqan medeniyet ri'alliqi heqqidiki ray sinashning netijisi xitay hökümitining tesewwuridin nahayiti köp perq qilidu.

Hazir rehbiri kadirlar ichide 'markisizmgha ishenmeydighan adem' sani 'markizhmgha ishinidighan adem sanidin 3 hesse köp

Wuming ependining bayan qilishiche, xitayda melum bir organ 200 din artuq nahiyidiki bashqarma yaki nahiye we nazaret yaki idare derijilik kadirlar ichide ray sinash élip barghanda, 175 kishidin yazma jawap tapshuriwalghan.

Bu ray sinashning netijisige qarighanda, xitayda dawamlishiwatqan hazirqi medeniyet ehwalini 'markisizm medeniyiti' dep qarighuchilar % 15 ni؛ awam xelq medeniyiti' dep qarighuchilar% 24 ni؛ 'gherb medeniyiti' dep qarighuchilar %7 ni ؛ en'enidin chetnigen 'namelum medeniyet' dep qarighuchilar %48 ni teshkil qilghan. Démek, hazir rehbiri kadirlar ichide 'markisizmgha ishenmeydighan adem' sani 'markizhimgha ishinidighan adem sanidin 3 hesse köp.

Junggoche sotsiyalizmgha ishenmeydighanlarning sani qet'iy ishinidighanlarning sanidin 11 hesse köp

Wuming ependining bayan qilishiche, bu ray sinashta yene, hazirqi rehbiri kadirlarning junggoche sotsiyalizmgha yeni markizhmgha bolghan étiqadini bilish meqset qilin'ghan bolup, bu heqtiki jawabmu xitay hökümitining tesewwuridin köp yéraq bolup chiqqan. Junggoche sotsiyalizmgha bolghan étiqadi intayin qet'iylerning nésbiti% 5 ni؛ 'taza qet'iy emesler' ning nésbiti % 28 ni؛ 'dégen gépi bilen qilghan ishi oxshimaydighanlar' ning nésbiti %49 ni؛ étiqad krizisi peyda boldi' dep qarighuchilarning nésbiti %13 ni teshkil qilghan.

Démek, xitaydiki asasiy qatlam rehbiri kadirlar ichide 'dégen gépi bilen qilghan ishi oxshimaydighanlar' we étiqad krizisi peyda boldi' dep qarighuchilarning sanila % 62ni teshkil qilghan. Bundaq kadirlar junggoche sotsiyalizmgha bolghan étiqadi intayin qet'iylerning sanidin 11 hesse köp.

Emdi kommunist partiye özining ornini nege qoyushi lazimliqini oylap béqishi kérek

Xitayda 60 yilgha yéqin waqittin buyan kommunist hakimiyiti mewjut, ‏‏- dep mulahize qilidu wuming ependi maqaliside, ‏- hökümet dölet maliyisining nahayiti köp qismini markisizm medeniyiti üchün, yeni kéyinche 'junggoche sotsyalizm' dep atalghan medeniyet üchün serp qiliwatidu. Buning bilen markisizm terbiyisini izchil élip bériwatidu. 1989 ‏- Yilidin burun xelq bundaq teshwiqatqa ishinetti, tyen'enmén weqesidin kéyin, xelq kommunist partiyining teshwiqatigha ishenmeydighan boldi. Uningdin kéyin 'déng shawping idiyisi' dégen meslek chiqti.

Uningdin kéyin üchke wekillik qilishdégendek markizhmgha qoshulghan 'yéngi töhpiler' chiqti. Démek, markisizm teshwiqati peqet boshap qalmidi, emma néme üchün rehbiri kadirlarning 'markisizm étiqadi' barghansiri boshap kétidu? en'eniwiy medeniyetmu teshwiq qiliniwatidu, mesilen, kungzining ademde emeliy étiqad bolmisa, uni adem dégili bolmaydu' dégen telimatini kommunist partiye 'heqiqetni emeliyettin izlesh' dégen söz bilen ipadilep teshwiq qilip kéliwatidu.

Emma yene néme üchün jem'iyette en'enige béqinmaydighan awam medeniyet' dégen shekil chiqti we 'dégen gépi bilen qilghan ishi oxshimaydighanlar' köpiyip ketti? emdi kommunist partiye özining ornini nege qoyushi lazimliqini oylap béqishi kérek.

Hökümet hazir dölet maliyisining% 68 ni siyasiy zorawanliq, saqchi hakimiyiti we jasuslar arqiliq idare qilishqa serp qilip xelqqe taqabil turuwatidu

Xitayda kommunist hökümiti hazir pütünley özining ornini saqlap qélish üchünla xelq ichidiki yéngi medeniyetke qarshi turuwatidu, ‏‏- dep bayan qilidu iqtisadshunas xé chinglyen xanim "xitayda élip bériliwatqan islahatning xelqqe payda -ziyini néme?" dégen kitabida. Uning bayan qilishiche, amérikida xelqning ma'arip chiqimi xelq igiliki omumiy mehsulat qimmitining% 10 ni teshkil qilidu.

Emma xitayda bolsa, xelq ma'arip chiqimini özi% 100 töleydu. Amérikida öy bahasi her bir a'ilining yilliq kirimidin 6 hesse artuq, emma xitayda bolsa, öy bahasi her bir a'ilining yilliq kirimidin 12 hesse artuq, shangxey, béyjinglarda 20 hesse artuq.

Shunglashqa, xelq hazir kommunist partiye yolgha qoyuwatqan ma'arip islahati ata-anilarni sarang qilidighan islahat؛ saqliqni saqlash islahati yashan'ghanlarni u dunyagha tizraq uzitidighan islahat؛ öy-zémin islahati xelqning yanchuqini pütünley qorutidighan islahat, dewatidu. Hökümet hazir dölet maliyisining% 68 ni siyasiy zorawanliq, saqchi hakimiyiti we jasuslar arqiliq idare qilishqa serp qilip xelqqe taqabil turuwatidu.(Weli)

Pikirler (0)
Share
Toluq bet