Xitayda ishlepchiqirilghan oyunchuqlar xewp yaritiwatidu


2006-10-11
Share

Star Online Tor betide "xitayda ishlepchiqirilghan oyunchuqlar xewp yaritiwatidu" mawzuluq xewer élan qilindi. Xewerde xitayda ishlepchiqirilghan shundaqla héchbir bixeterlik tedbiri we süpet ölchimige toshmaydighan oyunchuqlar balilar üchün xewp yaritiwatidu, türkiye refik saydam sehiye doxturxanisi bir xizmet pilani teyyarlidi, déyilgen. Xewerde bu ish pilanini yawropa birlikining qollawatqanliqi üstide toxtilip mundaq dep yézilghan:

"Xitayda ishlepchiqirilghan boyumlar bashqa sahelerdikige oxshashla oyunchuq sahesidimu kishilerning béshini aghritmaqta. Emma bu qétim tijari jehettin emes, balilar üchün yaratqan xewpi jehettin kishilerni endishige salmaqta. Shunga xitayda ishlepchiqirilghan oyunchuqlarning türkiye bazirigha kirip balilarning salametlikige tesir yetküzushining aldini élish üchün refik saydam doxturxanisi heriketke ötti. Buning bilen ular xitay oyunchuqliri heqqide oyunchuq bixeterliki namliq xizmet pilanini tuzup chiqti. Bu pilan yawropa birliki teripidin qollashqa érishken".

Bu ish pilani heqqide tepsili melumat élish üchün ish pilanini élip bériwatqan atilla saka ependi bilen körüshtuq. U mundaq dédi:

"Yawropa bilikige maslishish pilanimiz ichide sehiye ministirliki bezi qararlarni chiqardi. Bu qarargha asasen xitaydin kelgen oyunchuqlarning süpet ölchimini tekshurushimiz kérek idi. Bu meqset bilen biz ‘oyunchuq bixeterliki’ ismi astida bir xizmet pilani tuzup chiqip yawropa birlikige sunduq. Ularmu bu pilan'gha qoshuldi we qollaydighanliqini bildürdi. Hazir putun teyarliqlirimiz axirlashti. Yéqinda resmiy ishqa bashlaymiz".

Atilla saka ependi oyunchuq bixeterliki ish pilanida nimilerni qilidighanliqini anglitip mundaq dédi:

"Bu xizmet pilanigha asasen biz 0 -14 yash arisida ders béridighan mekteplerning ders programmisigha kirgüzüsh üchün bir telim terbiye CD pilastinkisi teyyarlaymiz. Bu arqiliq biz balilargha, ata–anilargha, oyunchuq ishlep chiqarghuchi we import qilghuchilargha oyunchuqning süpet körsetküchliri, oyunchuqlarning bixeter yaki emesliki, qandaq oyunchuqlarni sétiwélishni kerekliki heqqide melumat bérimiz".

Atilla saka ependi bu xizmet pilanigha qatnishiwatqan döletler heqqide melumat bérip mundaq dédi:

"Bizge yardem qiliwatqan nurghun orunlar bar. Ular bu telim terbiye CD plastinkisini teyarlishimizgha yardemde boldi. Bu orunlar hajitöpe uniwérsitéti balilaring yétilishi bölümi, türkiye milli ma'arip ministirliki, portugaliyedin akadémik xususi meslihet we tetqiqat merkizi, ispaniyedin asi'al bashqurghuchilar birliki, italiye oyunchuq bixeterliki tetqiqat orni we türkiyidin bezi shirketlerdur".

Bu ish pilanigha yardem bergen orunlardin biri bolghan pilsan plastik we oyunchuq sana'iti shirketler guruhi bashliqi rashid akar ependi bilenmu söhbet élip barduq:

"Menche xitayning ziyinigha uchrighan sahelerning eng béshida kélidighini oyunchuq sahesidur. Biz 152 xil oyunchuq ishlep chiqiriwatqan bir shirket turuqluq xitay bilen riqabet qilalmaywatimiz. Chünki, biz aldi bilen süpetke ehmiyet bérimiz. Süpet ölchemlirige layiq ishlep chiqirish élip barimiz. Shunga chong türdiki oyunchuqlarda xitay bilen riqabet qilalisaqmu kichik tiptiki oyunchuqlarda riqabet qilalmaywatimiz".

Rashid akar ependi istimal qilghuchilarni diqqet qilishqa chaqirip mundaq dédi:

Xitay bügün shundaq bir halgha keldi, yani yawropa we amérika tashliwetken kéreksiz ham eshyalarni ishlitidighan derijige yetti. Ular bu ham eshyalarni apirip oyunchuq ishlep chiqiridu. Ular yene ishlitilip tashliwetilgen sulyaw xaltilarni, su botulkilirini yighip ekilip oyunchuq ishlep chiqiriwatidu. Buning rak késili peyda qilish nisbiti intayin yuqiri. Boyaq maddilarda korbondiyoksidimu intayin yuqiri. Bumu rak peyda qilidighan bir madda. Shunga istimal qilghuchilar, balilirigha oyunchuq alghanda amal bar xitaydin kelgen süpetsiz oyunchuqlarni almisun. (Erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet