Gérmaniyidiki xitay oghriliri


2006-08-01
Share

Gérmaniyidiki "dunya" gézitining ikki kün ilgiriki xewirige asaslan'ghanda, xitay oghriliq guruhlirining gérmaniyidiki jinayi qilmishliri heddidin éship ketken. Fédéral jinayi ishlar saqchi idarisining melumatida körsitilishiche, yéqinqi bir nechche yildin buyan, xitayning oghriliq guruhliri peyda qilghan jinayi enziler gérmaniye puqralirini éghir parakendichilikke salghan. Mis, alyumin we bashqa renglik métallarni tonnilap oghrilap, paraxot arqiliq xitaygha toshup kétiwatqan bu jinayi guruhlarning qoli gérmaniye fédéral jumhuriyitining barliq shtatlirigha qeder sozulghan.

Hannowér sheherlik jama'et xewepsizlik idarisining ashkarilishiche, xitaylarning xelq'ara bazarda qimmiti yuqiri bolghan renglik métallarni oghrilash weqesi kishini chöchütidighan derijige yetken. 2006 – Yili axirlashmay turupla, Nordheim – Westfalin shtatining özidila 500 qétimdin artuq mis oghrilash enzisi sadir bolup, ötken yildikidin 29% éship ketken.

Oghrilan'ghan nersiler ushshaq métallardin tartip, tonniliq tok simi oramlirighiche öz ichige alidiken. Yalghuz hannowér shehrining etrapidiki yézilardila bir qanche ay ichide 20 qétimdin artuq mis oghrilash dilosi yüz bérip, kishilerni qattiq bi'aram qilghan. Jinayi ishlar saqchi xadimlirining bildürishiche, qolgha chüshken pakitlar bu enzilerning xitay bilen munasiwetlik ikenlikini ispatlighan.

Ötken heptidin bashlap, xelq ara bazarda misning bahasi birdinla örlep ketken. Saqchilarning éytishiche, mis bahasining örlishi, mis oghrilirining bazirini chiqirip qoyghan. Xitay oghriliq goruhliri buni yaxshi bir tijaret yoli qiliwalghan.

Yéqinqi bir yildin buyan, her qaysi shtatlardiki gérman puqraliri saqchi da'irilirige türlük renglik métallarning oghrilan'ghanliqini, hetta qebrilerde ornitilghan métal zinnet buyumliriningmu namelum kishiler teripidin oghrilinip kétiwatqanliqini melum qilghandin kéyin, gérmaniye fédéral saqchi idarisi bu weqege jiddi mu'amile qilghan.

Nieder Sachsen Shitati jama'et xewepsizlik idarisining ashkarilishiche, bu kespiy oghrilar adettiki yerlik oghrilar bolmastin, yaxshi teshkillen`gen we aldin teyyarliq bilen heriket qilidighan pilanliq bir oghriliqq guruhi iken.

Nieder Sachsen Shitati jama'et xewepsizlik idarisining razwétchikliri ötken heptidiki axturup tutush herikiti jeryanida, qurulush ornidin oghrilan'ghan neq malni qolgha chüshürgen. Gerche saqchilar oghrilan'ghan bu mallarning xitay bilen munasiwetlik ikenlikini bildürüp ötken we mallarning iqtisadi qimmiti heqqide melumat bergen bolsimu, qolgha chüshken oghrilarning salahiyitini ashkarilimighan. Emma oghrilan'ghan nersilerning bir yük mashinisigha qachilan'ghanliqini, bu zang mal ichide uzunluqi 1700 métir kélidighan 1.5 Tonna éghirliqtiki signal üchün ishlitidighan qimmetlik simlarningmu barliqini körsitip ötken.

Saqchilar teminligen deslepki yip uchigha asaslan'ghanda, her qaysi ellerdin oghrilan'ghan renglik métallarni xitay oghriliq guruhliri aldi bilen sherqiy yawropa döletlirige toshup apiridiken. Andin u yerde métallarni türge ayrip, éritip, sortliri boyiche qachilap, paraxotqa bésip xitaygha élip kétidiken.

Gérmaniye saqchilirining qarishiche, xitayning renglik métalgha bolghan jiddi éhtiyaji, ularni oghriliq derijisigiche élip kelgen. (Ekrem)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet