Хитай армийиси чегридин чиқип дуняға қәдәм басмақта


2006-12-11
Share

Шинхуа агентлиқиниң 11 ‏- декабир күнидики хәвиридә "җуңхуа хәлқ җумһурийитиниң дөләт мудапиә министирлики билән пакистан ислам җумһурийити дөләт мудапиә министирлики оттурисида түзүлгән келишимгә асасән, хитай 2006 ‏- йили 12 ‏- айниң 11 ‏- күнидин 18 ‏- күнигичә пакистанниң исламабад районида өткүзүлидиған 'достлуқ 2006 ‏- йил' намлиқ террорчилиққа бирликтә зәрбә бериш һәрбий маневириға қатнишиду, бу маниверниң тиғ учи башқа бир дөләткә қаритилмайду" дәп баян қилинған.

Пакистан ядро қораллирини елип маңалайдиған қисқа мусапилиқ башқурулидиған бомба синақ қилип бир күндин кейин бу қетимқи маневир башланди

Бирләшмә агентлиқиниң 10 ‏- өктәбир күни равалпидидин хәвәр қилишичә, хитайниң дөләт рәиси ху җинтав пакистанни зиярәт қилип икки һәптидин кейин, америка билән һиндистан оттурисида ядро қораллири җәһәттә һәмкарлиқ келишими имзалинип бир һәптидин кейин, пакистан ядро қораллирини елип маңалайдиған қисқа мусапилиқ башқурулидиған бомба синақ қилип бир күндин кейин, хитайниң азадлиқ армийиси террорчилиққа зәрбә бериш маневири өткүзүш үчүн пакистанға йетип кәлгән.

Мәзкур агентлиқиниң 11 ‏- декабир күни исламабадттин хәвәр қилишичә, бу қетимқи маневир хитай -пакистан оттурисида түзүлүп болған келишим бойичә хәвәрлишиш системиси вә алдин сигнал бериш системисини өз ичигә алған дөләт мудапиәсидә қоллинилидиған еликтронлуқ әслиһәләрни қуруш иши давамлишиватқанда, шундақла җф17 бәлгилик һәрби айропиланларни бирликтә қораштуруш, хитайниң пакистандики иккинчи ядро реактор қурулуши давамлишиватқанда башланған. Пакистан даирилири 'хитай билән пакистан бирликтә елип баридиған бу қетимқи террорчилиққа зәрбә бериш маневири 10 күн давам қилиду' дегән.

Бу қетимқи маниверни хитайниң юқури дәриҗилик һәрбий өмәклири келип көзитиду

Пакистанда чиқидиған 'сүбһи гезити', 'нәзәр гезити' қатарлиқ учур вастилириниң равалпидидин хәвәр қилишичә, хитай хәлқ азадлиқ армийиси қисимлири террорчилиққа зәрбә бериш маневири өткүзүш үчүн пакистанниң чәклалә һава армийә базисиға йетип кәлгән. Бу хитай армийисиниң тунҗи қетим өз чегрисидин чиқип пакистанға қәдәм бесиши болуп һесаблиниду. Буниңдин бурун пакистанниң қораллиқ қисимлири 2004 ‏- йили 8 ‏- айда памир игизликдики ташқорған районида хитай билән бирликтә террорчилиққа қарши бирләшмә маневир өткүзгән иди. Униңдин кейин, хитай өзиниң иқтисадий күчи өскәнсири, һәрбий вә дипломатийә даирисини қәдәмму -қәдәм кеңәйтип, чәтәлләргә һәрби өмәк, һәрби оқуғучи әвәтишкә, деңиз армийисини мунтизимлаштурушқа, бирләшкән дөләтләр тәшкилатиниң тинчлиқ сақлаш қошунлириға қатнишиш үчүн һәрби қисим әвәтишкә башлиди. Бу қетим пакистанда өткүзүлидиған һәрбий маниверниму хитайниң юқури дәриҗилик һәрбий өмәклири келип көзитиду.

Хитай җәмийити һазир башқа бирхил еғир тәһдиткә дуч кәлмәктә, шуңлашқа...

‏-‏‏ Хитай дөләт мудапиә министирлики ишханисиниң башлиқи чән лихуаниң баян қилишичә, ‏-‏ дәп йезилиду пакистанда чиқидиған 'сүбһи гезити'ниң хәвиридә, ‏-‏ хитай 2002 ‏- йили 10 ‏- айда қирғизистан билән чегрида, тунҗи қетим террорчилиққа қарши бирләшмә маневир өткүзгән иди. Униңдин кейин, әнгилийә, австралийә, һиндистан, русийә қатарлиқ дөләтләр билән һәр хил мәзмунда бирләшмә һәрбий маневир өткүзди. Чән лихуаниң ейтишичә, хитай җәмийити һазир әнәнивий бихәтәрликкә ятмайдиған башқа бирхил еғир тәһдит дуч кәлмәктә. Хитай буниңға һәр қайси дөләтләр билән бирликтә тақабил турушқа муһтаҗ. Башқа дөләтләр билән бирликтә һәрбий маневир өткүзүш һазир хитайниң һәрбий күчини өстүрүшниң муһим усули болуп қалди. Хитай армийиси һазир өзиниң дөлитини мудапиә қилиш нами билән чегридин чиқип дуня қәдәм басмақта.

Террорчилардин ибарәт 'қара еқин' афғанистандин...

Хитайда чиқидиған 'шәрқ гезити'дә баян қилинишичә, хитай 2004 ‏- йили пакистан билән һәрбий маневир өткүзгәндә, хитай билән пакистан оттурисидики сода алақиниң 'җан томури' болған қарақурум тағлирини таллиған иди. Хитай билән пакистан оттурисида бу 'томур' арқилиқ давам қиливатқан сода алақиси һәр икки дөләткә байлиқ вә аватлиқ бәхш әтти. Әмма бу сода йолида бир 'қара еқин' мәвҗут. У болсиму диний радекал күчләрдин тәркип тапқан террорчилар. Хитай -пакистан оттурисидики сода тәрәққи қилғансери, бу 'қара еқин' шунчә ямрап, бу икки дөләткә риқабәт қилиду. Бу 'қара еқин' пакистанға чегридаш болған афғанистандин тәпчирәп чиқмақта. Шуңлашқа хитай 2007 ‏- йилида йәнә шаңхәй һәмкарлиқ тәшкилати нами билән русийидә террорчилиққа, дөләт атлап җинайәт садир қилидиған тәшкилатларға қарши көп қетим һәрбий маневир өткүзиду. Буниңға хитайниң қораллиқ сақчи қисимлири қатнишип, җинайәтчиләрни дөләт сиртида қоғлап тутуш мәшқи елип бариду. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт