Gherb metbu'atliri we mutexessisler xitay kompartiyi'isning 17 ‏- nöwetlik qurultiyigha qandaq baha berdi?

• Muxbirimiz eqidening bu heqtiki toluq melumati
• Download story audio

Xitay prézidénti xu jintaw, 17 - qurultayda söz bermekte. AFP Photo

Xitay kompartiyisi merkizi hökümitining bash sékritari xu jintaw , mezkür hökümetning 17 ‏- nöwetlik qurultiyining yighinida sözligen doklatida, chiriklikning kompartiyining hayat - mamatliqi bilen biwaste munasiwetlik ikenlikini otturigha qoydi. 15 ‏- Öktebir küni échilghan qurultayning échilish murasimida , xu jintaw 2 yérim sa'et doklat sözlep, xitayning iqtisadiy, chiriklikke qarshi turush, ikki qirghaq munasiwiti we xitayning tashqi diplomatiye munasiwiti qatarliq terepler üstide alahide toxtaldi.

Xu jintaw sözide , bu qétimqi qurultayning asasiy meqsiti, junggoche sotsiyalizm qurush bayriqini igiz kötirip, ding shawping neziriyisi bilen 3"ke wekillik qilish" idiyisini bashlamchi rol qilip, pen - téxnika tereqqiyatini ishqa ashurush ikenlikini tekitlidi.

Xu jintaw tekitligen pen - téxnika tereqqiyatini ishqa ashurush neziriyisi, maw zédung , ding shawping , jang zéminlar otturigha qoyghan neziriye bilen teng orunda bolup, bu xu jintawning 4 ‏- ewlat xitay rehbiri sépidin orun alghan shexs ikenlikining namayendisi hésablinidu.

Biraq 17 ‏- qurultayning échilish murasimida, xu jintawgha egiship yighin zaligha kirip kelgen, xitay siyasiy byurosining komissari wu banggo bolmastin, belki sabiq xitay merkizi herbiy ishlar komitétining re'isi jang zémin idi.

Metbu'atlarning 17 ‏- nöwetlik qurultaygha bergen bahasi

Qurultay bayanatchisi bu qétimqi qurultay heqqide muxbirlargha mezkür qurultayda partiye nizamnamisigha özgertish kirgüzidighanliqini bildürüsh bilen birge, junggoche sotsiyalizmning nishanini alahide tekitligen.

Xitay ishliri mutexessislirining qarishiche, 17 ‏- nöwetlik qurultay xu jintaw we wén jyabawlarning warislirini békitish bolmastin, qurultay bir partiye tüzümini mustehkemlesh, partiye nizamnamisigha özgertish kirgüzüsh shuningdek muhimi yene xu jintawni merkez qilghan rehberlik guruppisining 5 yildin buyanqi pen - téxnika tereqqiyat netijisini tarix deptirige turghuzushtin ibaret iken.

Qurultay re'isliri 15 ‏- öktebir küni chüshtin kéyin birinchi qétimliq yighinni resmiy échip, qurultay da'imiy komitéti ezalirining isimlikini élan qildi, hemde qurultayning mu'awin katiblirini békitti.

Xu jintaw öz warisini tikleshke ehmiyet bermekte

Amérika birleshme agéntliqining maqaliside éytilishiche, bir hepte möhlet bilen échilidighan bu qétimqi qurultayda, xu jintaw xitayni idare qilghan 5 yildin buyanqi weziyetni tarazigha qoyush, bolupmu öz ittipaqdashlirini hoquqqa teyinlesh küchini tarazilash we ittipaqdashlar ichidin bir neper warisni muhim orun'gha olturghuzush, qurultayda wujutqa keltüridighan muhim bir meqset hésablinidiken.

Amérika birleshme agéntliqining bildürüshiche , lyawning ölkisining bash sékritari li kéchang, xu jintawning yürikidiki waris bolup, li kéchangni waris qilip teyinlesh üchün, xu jintawning aldi bilen rehberlik guruppisidikilerni gepke kirgüzüshi, li kéchangning salahiyitining xitay merkizi komitéti siyasiy byurosining da'imiy hey'iti bolushqa layiq ikenliki ispatlishi tolimu muhim iken.

Eksiche , li kéchangning riqabetchisi shangxey shehirining bash sékritari shi jingping bolup , oxshashla uning xitayning aliy derijilik rehberlik guruhigha kirishi uning qollighuchilirining küch chiqirishigha baghliq bir mesile.

Shi jingpingning hoquqqa teyinlinish éhtimalliqi bir qeder yuqiri

Yawrupadiki mutexessislerning bildürüshiche, li kéchang xu jintaw teripidin biwaste yuqiri qatlamgha kötürülgen muhim kadirlarning biri, emma shi jingpingning xu jintawning iz basari bolush éhtimalliqi köprek, chünki u xu jintaw we jang zémin her ikkisining himayisige érisheleydighan muhim pérsunazh .

Biraq , kanadaliq xitay mutexessis jang wébrenning qarishiche, xu jintawning 5 yildin buyan , özining kadirlirini yétishtürüshke alahide ehmiyet bérip kelgenliki éniq , biraq uning wezipe tapshurush mudditi 2012 ‏- yilghiche bolghachqa, nöwette xitay kompartiyisi merkizi komitétining nöwettiki jiddiy wezipisi hoquq tengpungluqini tengshesh mesilisi emes iken, xu jintaw wezipisini tapshurghan'gha qeder özini himaye qilidighan kadirlarni rehberlik guruppisigha orunlashturush xizmitini béjirip bolidiken.

Xitay kommunistik partiyisining démokratiye yoligha qarap méngishidin ümid kütmeslik kérek

17 ‏- Nöwetlik qurultayning bayanatchisi li dungshéng muxbirlarni kütiwélish yighinida qilghan sözide, xitayning démokratiye islahati élip bérishidin chong ümid kütmeslik kérekliki otturigha chiqqan bolup, qurultayda " junggoche sotsiyalizm yolida méngish, bir partiye tüzümide ching turush, hergizmu gherb siyasitini özige tedbiqlash yolini tutmasliq " qa oxshash mesililer alahide tekitlen'gen. (Eqide)