Amérikida yene xitay mallirini yighiwélish uqturushi chiqirildi
2007.08.23
Bu ayning aldinqi yérimida, dunya boyiche eng chong oyunchuq shirkiti mattél, bixeterlik mesilisi tüpeyli ikki qétim xitayda ishlen'gen balilar oyunchuqlirini yighiwélish uqturushi chiqarghan idi. Aridin 3 hepte ötmey, amérikidiki yene bashqa ikki shirket, xitayda ishlen'gen balilar we ösmürler xatire hem adrés depterlirige ishlitilgen sirda ademning salametlikige ziyanliq qoghushun terkibi bayqalghanliqi üchün, yighiwélish uqturushi chiqardi.
Bu mushu ay ichide xitayda ishlen'gen balilar buyumlargha qarita 3- qétim chiqirilghan yighiwélish uqturushi bolup hésablinidu.
Bu nöwetlik yighiwélish uqturushi chiqirilghan buyumlarning sani 300ming dane
23-Awghust küni amérika istémalchilar bixeterlikini qoghdash komitéti bilen "martin dézayn cheklik shirkiti ", "shiylings esosh'eyts" qatarliq orunlar birlikte axbarat élan qilip, bu shirketler xitaydin import qilip bazargha salghan, karton filimdiki pérsonazh "sponjbob sku'éyrpénts" ning obrazliri chüshürülgen xatire we adrés depterliri qatarliq bir nechche türlük balilar buyumlirini yighiwélish uqturushi chiqardi.
Bu nöwet yéghiwélish uqturushi chiqirilghan buyumlar ichide yene "tomas we dostliri " namliq balilar poyizi qatarliq balilar oyunchuqlirimu bar bolup, bularning hemmisige oxshashla qoghushun terkiblik sir ishlitilgen iken.
Bu nöwetlik yighiwélish uqturushi chiqirilghan buyumlarning sani 300ming etrapida bolup, aldinqi hepte dunyadiki eng chong oyunchuq shirkiti, mattél pütün dunya miqyasida 18.5 Milyon dane xitayda ishlen'gen balilar oyunchuqlirini yighiwélish uqturushi chiqarghan idi.
Aldinqi hepte amérika istémalchilar bixeterlikini qoghdash komitéti diréktori nensy nord shu nöwetlik yighiwélish uqturushining balilarning bixeterlikni qoghdashta intayin muhim ikenlikini otturigha qoyghan we " bu qétimliq yighiwélish kölimi birqeder chong bolushidiki sewebi, herqandaq bir zeximlinish kélip chiqishning aldin élish üchün" dégen.
Shuninggha yandashqan halda amérika awam palatasining bir ezasi bayanat élan qilip xitaydin import qilinidighan herqandaq tawarlar choqum tekshürülüshi kéreklikini otturigha qoyghan idi. Melum bolushiche, "martin dézayn cheklik shirkiti " 2006- yili 6- aydin 2007- yili 7- ayghiche 250 ming dane xatire depter satqan.
Amérika xitay mallirigha bolghan ishenmeslik tuyghusi meydan'gha kélishke bashlidi
Aldinqi heptilerdiki bixeterlik mesilisi tüpeyli yighiwélin'ghan xitay mallirigha qarita xitay hökümiti, amérikigha mal éksport qilidighan shirketlerge nisbeten bashqurushni kücheytish arqiliq, tawarlarning süpitini östürüsh jehettiki mayilliqni ipadiligen bolsa, oyunchuq bixeterliki meslihetchisi kristofér bayrnning bildürüshiche, bu qétimliq yighiwélish uqturushi kishilerning xitay mallirigha bolghan ishenmeslik tuyghusini ulghaytiwétidiken.
Bu yil 15- mart amérika dora-dermek we yémek ichmek bixeterlikini qoghdash idarisi xitaydin import qilghan ermek haywan yémekliride zeherlik madda milamén bayqalghanliqi üchün, xitayda ishlen'gen haywanat yémeklirige qarita yighiwélish uqturushi chiqarghandin bashlap, hazirghiche, süpetsiz mashina kamiri, bulghan'ghan déngiz mehsulatliri, zeherlik ximiyilik madda arilashqan chish pastisi, qoghushun terkiblik sir ishlitilgen balilar oyunchuqliri qatarliqlarni yighiwélish uqturushi qayta-qayta körülüp turdi we pütün amérika jümlidin dunya miqyasida xitay mallirigha bolghan birxil ishenmeslik tuyghusi meydan'gha kélishke bashlidi.
Xitay mallirining bixeterliki amérikiliq siyasiyonlar alahide köngül bölidighan mesilige aylanmaqta
Hazir amérikida xitay mallirigha nisbeten her xil endishe tuyghuliri shekilliniwatqan bolup, xitay malliri bixeterliki, xitay amérika soda munasiwetliri jeryanida kep chiqqan tengsiz tashqi péréwot, qatarliqlar amérikiliq siyasiyonlar alahide köngül bölidighan mesilige aylandi.
Amérika -xitay soda munasiwetliri mesilisi, 4 -awghust illono'is shtatining chikago shehiride élip bérilghan 2008- yilliq amérika prézidént saylimi kandidatlirining munaziriside alahide salmaqni igiligen bolup, jon édwardz xitay bilen bolghan munasiwetler ichide soda bixeterlik mesilisini tilgha élip " xitaydin import qilinip yighiwélish uqturushi chiqirilghan 2 milyon. Oyunchuqni" néme deymiz?" dégen we hilariy kilinton " biz xitaydin import qilinidighan tawarlargha qattiq chek qoyushimiz kérek! méning xitaydin keltürülgen süpetsiz yémekliklerni yégüm yoq!" dep xitab qilghan idi.
Xitay soda-sana'et ministirliki:"xitayda ishlen'gen tawarlarni ishlep chiqirishqa bashqa döletlermu qatnishidu"
Xitay mallirigha qarita dunya miqyasida peyda boluwatqan gumanlinish tuyghusi xitay soda saheside mu'eyyen ensiresh peyda qilghan bolup, 22- awghust etigende xitay soda ministirliki muxbirlarni kütüwélish yighin échip, xitayda ishlen'gen tawarlarni ishlep chiqirishta bashqa döletlerningmu qatnishidighanliqini otturigha qoyghan.
Xitay soda-sana'et ministirliki ministir yardemchisi wang chaw, xitay éksport qilghan tawarlarning yérimidin köprekining pishshiqlap ishlinip, chet'el shirketliri qolida éksport qilinidighanliqini körsetken hemde " dunyadiki nurghun döletler nurghun tereptin xitayning ishlep chiqirish sahesige qatnashmaqta. Eger xitayning ishlep chiqirishi ziyan'gha uchrisa, melum menidin élip éytqanda dunyaning herqaysi jayliridiki döletlermu ziyan'gha uchraydu" dep agahlandurush bergen. ( Jüme)
Munasiwetlik maqalilar
- Kanada xitaydin kélidighan mallargha qarita tekshürüshni kücheytmekchi
- Xitayda ishlep chiqirilghan oyunchuqlar türkiyidimu yighiwélinmaqta
- Yawrupada xitay malliridin endishe qilish dolquni qayta qozghaldi
- Amérika kéngesh palata ezasi xitayni eyiblidi
- Balilar oyunchuqi shirkiti - mattél, xitayda ishlen'gen bir milyondin artuq oyunchuqni yighiwélish uqturushi chiqardi
- "Xitayning mehsulatlirini tekshürüsh téxnikisi yéterlik emes"
- Yawrupa ittipaqi xitay mehsulatlirining süpitini yaxshilashni , saxta mallarni qattiq chekleshni telep qildi
- Xitayning balilar oyunchuqliri se'udi erebistani baliliri üchün xeter yaratmaqta
- Xitayning sodidiki saqtiliqi 8 dölet yighinining muhim tenqid témisi
- Uyghur éli balilirining qent- gézek we oyunchuqlirining köp qismi ölchemsiz
- Gherb metbu'atliri xitayni yémeklikler bixeterliki sistémisini yaxshilashqa mejburlimaqta
- Saxta pulgha aldan'ghan déhqanlarning menpe'etini kim qoghdaydu?