Xitayning soda ishliri mu'awin ministiri süriyide resmiy ziyarette boldi


2007-06-29
Share

Xitay xelq jumhuriyiti soda ishliri ministirlikining mu'awin ministiri chin jiyen 2007- yili 6- ayning 25 - küni süriye paytexti demeshiq shehirige resmi ziyaret bilen kelgen bolup, süriye bash ministirining mu'awini abdulla derderining qarshi élishigha érishken idi.

Ikki terep mes'ullirining orunlashturghan chong yighinida süriye bash ministirining mu'awini abdulla derderi xitay shirketlirining süriyide ish bashlighandin béri ikki dölet otturisidiki soda ishlirining nahayiti tézlikte tereqqi qilghanliqini we mundin kéyinmu ikki dölet ish ademlirining ortaq kélishish we hemkarlishish bilen ish élip bérip xitay - süriye ikki döletning iqtisadi alaqisini téximu zor tereqqi qildurushigha tilekdash ikenlikini, shundaqla süriyining xitay shirketlirini qarshi alidighanliqini bildürdi.

Xitay - süriye diplomatiye alaqisining tarixi

Xitay bilen süriye ikki döletning diplomatiye alaqisi 1956- yili qurulghan bolup, shundin biri ikki dölet dostluqi dawam qilip kelgen. 2001- Yilidin bashlap bu dostluq téximu yuqiri pellige kötürülgen. Shu yili xitay xelq jumhuriyitining re'isi xujintaw süriyide resmiy ziyarette bolghan bolsa, 2004- yili süriye re'isi beshshar el esed béyjingda resmiy ziyarette bolghan idi. 2005- Yilidin bashlap xitay - süriye ikki dölet otturisida kélishimler tüzülüshke bashlighan bolup, hazirghiche ikki dölet otturisida 10 din köprek chong kélishimler imzalan'ghan.

Xitay - süriye ikki dölet hemkarliq komitétining 3- nöwetlik chong yighini chaqirildi xitay xelq jumhuriyiti soda ishliri ministirlikining mu'awin ministiri chin jiyen süriye bash ministirining mu'awini abdulla derderi bilen élip barghan söhbiti netijiside xitay - süriye ikki dölet hemkarliq komitétining 3- nöwetlik chong yighinini chaqirish ishlirini muzakire qilishqan bolup, 26- iyun küni xitay - süriye ikki dölet hemkarliq komitétining 3- nöwetlik chong yighini bashlinip 27 - küni kechte ayaqlashti.

Süriye bash ministirining mu'awini abdulla derderi bu yighinning netijisidin memnun bolghanliqini ipadilep mundaq dédi:" xitaydek chong bir dölet bilen soda - sana'et ishlirida hemkarliq komitéti qurup chiqip, shu komitétning teqezzasi boyiche ish élip baralighanliqimiz biz üchün chong utuq bolup hésablinidu. Mundin kéyinmu ikki dölet munasiwitining pütün sahelerde tereqqi qilishni arzu qilimiz."

Ikki dölet otturisida 6chong soda kélishimi imzalandi

Xitay soda ishiliri mu'awin ministiri chin jiyen süriye iqtisad we soda ishliri ministiri ghessan hebesh bilen xitay - süriye ikki dölet otturisida iqtisad, soda - sana'et, pen téxnika we bashqimu mesililer toghruluq 6 chong kélishim imzalidi. Xitay soda ishliri mu'awin ministiri chin jiyen süriye paytexti demeshq shehiride muxbirlargha bergen bayanatida, özining yighin ishtirakchilirigha xitay - süriye ikki dölet soda we iqtisadi hemkarliqining ötken 3 yil ichide qolgha keltürgen netijilirini bir - birlep sözlep bergenlikini we bu ilgirleshtin xitay hökümitining intayin memnun ikenlikini bildürdi.

Chin jiyenning éytishiche, 2006- yili xitay bilen süriye otturisidiki soda kölimi 15 milyard dollargha yetken bolup, 2004- yilidiki soda kölümidin hessilep éship ketken. Kélidighan besh yil ichide xitay - süriye ikki dölet otturisidiki soda kölümining 30 milyard amérika dollirigha yétidighanliqi mölcherlenmekte iken.(Toxti)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet