Муһәммәд керим исимлик бир уйғур сақчиханида һаятидин айрилған

Йеқинда игиләнгән учурларға қариғанда, қәшқәр вилаийитиниң мәкит наһийә 3 ‏- йезида олтурушлуқ муһәммәд керим исимлик бир уйғур киши сақчилар тәрипидин тутуп кетилгән болуп, үрүмчи түрмисидә өлүп кәткән.
Мухбиримиз арислан
2010.02.04

Мәрһумниң истанбулда яшаватқан дости абдурейимҗанниң сөзләп беришичә, сақчилар мәрһумниң аилисигә оғлиниң өлүп кәткәнликини буниңдин 20 - 25 күн илгири хәвәр қилған вә үрүмчигә чақиртқан.

Мәрһум муһәммәд керимниң аилиси үрүмчигә барған вә оғлиниң җәситини тәләп қилған. Әмма сақчилар җәсәтни көрүшкә рухсәт қилған болсиму аилисигә қайтуруп бәрмәй үрүмчидә бир қәбристанлиққа елип берип аилисиниң көз алдида көмүвәткән.

Сақчилар муһәммәд керимниң аилисигә оғли һәққидә "өлүп кәтти" дейиштин башқа һечқандақ чүшәндүрүш бәрмигән. Бирақ, униң сақчилар тәрипидин урулғанлиқиниң униң өлүмигә сәвәб болғанлиқи ейтилмақта, игилинишичә, муһәммәд керим өлүп кетиштин 3 - 4 ай илгири тутуп кетилгән икән.

Абдурейимҗанниң ейтишичә, муһәммәд керим мәкит наһийиси 3 ‏- йезида олтуруш бир кадир аилиниң оғли, мәрһум бу йил 37 , 38 яш әтрапида болуп дадиси кәнт кадири икән, мәрһумниң 4 пәрзәнти бар.

Мәрһум муһәммәд керим илгири йәни 2002 - вә 2003 ‏- йилларда бир қанчә қетим сақчилар тәрипидин тутқун қилинған вә қаттиқ қийин қистаққа елинған, нәтиҗидә мәрһум муһәммәд керим гәп қилалмас болуп қалған, йәни түрмидин қоюп берилгәндә гәп қилалмас һаләттә чиққан.

Мәрһум у вақитта түрмидин чиққанда ашхана ачқан болуп, гәп қилалмиғанлиқи үчүн кишиләр билән сөзлишәлмәй хәт йезиш арқилиқ муамилә қилған икән. Мәрһум муһәммәд керим диний тәрбийә алған, кишиләрниң һөрмитигә еришкән киши икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.