Хитай һөкүмити уйғур миллий мәдәнийитини қандақ қоғдимақчи?

Шинхуа ториниң 6 - айниң 2 - күнидики хәвиригә асасланғанда, 6 - айниң 1 - күни уйғур аптоном районлуқ 11 - нөвәтлик хәлқ қурултийи даимий комитетиниң 16 - қетимлиқ йиғиниға " аптоном районниң тарихи мәдәний намлардики кочилири вә тарихий қурулушлирини қоғдаш бәлгилимиси" қарарға сунулған.
Мухбиримиз әкрәм
2010.06.03
Share on WhatsApp
Share on WhatsApp
Xitay-cheqiwatqan-Qeshqer-305.jpg Сүрәт, мухбир паул мозорниң 15 - өктәбир күни елан қилған "хитай уйғур мәдәнийитини йилтизидин йоқатмақчи" дегән мақалиси тор бәттики көрүнүши.
www.asiasentinel.com Дин елинди.

Хәвәрдә көрситилишичә, илгири бундақ бир ениқ қанун болмиғанлиқи үчүн, һөкүмәтниң шәһәр қияпитини өзгәртиш қурулуши елип бериши җәрянида уйғур вәтинидики бир қисим тарихий, мәдәний қурулушлар уқушмаслиқтин чеқип ташланған.

Уйғурларниң тарихий намлардики шәһәр, коча вә қурулушлирини қоғдаш партийә - һөкүмәтниң муһим сиясити икәнлики тилға елинған мәзкур йеңи бәлгилимидә қәшқәр, турпан, хотән қатарлиқ шәһәр - районлардики мәдәний мирасларни қоғдашқа юқири дәриҗидә әһмийәт берилидиғанлиқи тәкитләнгән.

Қанчә миң йиллиқ тарихқа игә қәшқәр қәдимий шәһири харабилиққа айлинип болғандин кейин оттуриға қоюлған бу бәлгилимә, чәтәлдики уйғур зиялийлирида наразилиқ вә шүбһиләрни пәйда қилмақта. Хитай һөкүмити уйғур миллий мәдәнийитигә һәқиқәтән көңүл бөлмәкчи болса, немә үчүн қәшқәр қәдимий шәһирини чеқип ташлайду?
 
Шветсийидә яшаватқан уйғур зиялийси абдурешит һаҗи керими әпәнди бу һәқтә көз қаришини баян қилип өтти.

Хитайниң бу йеңи бәлгилимини оттуриға қоюшиға хәлқара җәмийәтниң күчлүк бесимлири сәвәб болғанлиқини тилға алған абдурешит һаҗи керими әпәнди, хитайниң түп ғәризиниң уйғур миллитигә вәкиллик қилидиған барлиқ тарихий, мәдәний изларни пүтүнләй өчүрүп ташлап, уйғур миллитини үзүл - кесил йоқитиштин ибарәт икәнликини тәкитлиди.

Абдурешит һаҗи керими әпәнди хитай һөкүмитиниң бүгүн уйғур вәтинини хитайдики 19 өлкә, шәһәргә бөлүп бериштики түп ғәризиниң уйғурларниң мустәқиллиқ ғайисини йоқитиштин ибарәт икәнликини әскәртти.

Қәшқәр қәдимий шәһириниң чеқилиши вә уйғур вәтинидики миллий мәдәний мирасларниң бузғунчилиққа учриши хәлқара җәмийәтниң җиддий диққитини тартип келиватқан бир мәсилә болуп, көзәткүчиләрниң қаришичә, хитайниң бу йеңи бәлгилимини йолға қоюши күчлүк җамаәт бесимидин қутулушни мәқсәт қилған икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.