Yaxu intérnét shirkiti, amérika dölet mejlisi we shi tawning a'ilisidin epu soridi

2007-11-08
Élxet
Pikir
Share
Print

2007 - Yil 6 ‏- noyabir küni, amérika dölet mejliside yaxu intérnét shirkitining amérika dölet mejilisige yalghan melumat bergenliki heqqide guwahliq bérish yighini échildi, yighinda, yaxu shirket mes'ulliri özini tekshürüp, palata ezaliridin we ziyankeshlikke uchrighan xitay zhornalist shi tawning anisidin epu soridi. Yighinda söz qilghan palata ezaliridin tom lantosning achchiq tenqidliri, yighinning diqqet merkizige aylandi.

Yaxu saxta melumat bergen

Xitay zhornalisti shitaw, 2004 ‏- yili xitay hökümitining, axbarat erkinlikini boghuwatqanliqi heqqidiki bir parche doklatni chet'el metbu'atlirigha yollap bergini üchün, qolgha élin'ghan we 10 yilliq qamaq jazasigha yoluqqan idi. Kéyin, shi tawning mezkur pa'aliyitining pash bolup qélishigha, yaxu shirkitining xitayning dölet bixeterlik idarisi bilen hemkarlishishi sewep bolghanliqi otturigha chiqip, bultur 2 ‏- ayda, amérika dölet mejliside, bu heqte guwahliq bérish yighini échilghan, u qétimqi yighinda, yaxu shirkiti, xitayning shi tawni tekshürüsh meqsitini chüshenmey qalghanliqini bildürüp mes'uliyettin mes'uliyettin qachqan idi؛ uningdin kéyinki éniqlashlarda, xitay terepning, mezkur tekshürüsh heqqide, yaxu shirkitige, dölet mexpiyetlikini pash qilish mesiliside tekshürüsh élip barghanliqini bildürgenliki otturigha chiqqan idi.

Tom lantos: buyruq, emma qanuniy buyruq emes

Bu qétimqi yighinda, shirket sahipliri jerry yang bilen mikayil kollahan, ilgiri, shirket ichidiki xizmetchilerning sewenliki tüpeyli, shitawning tekshürülüsh jeryani heqqide, toluq melumatqa ige bolalmay qalghini üchün,bulturqi yighinda xata melumat bérip qalghanliqini otturigha qoyghan bolsimu, palata ezaliri bu sewepke qayil bolmidi.

Yaxu shirkiti, yaxuning xitay tarmiqini xitaydiki alibaba shirkitige sétiwetkenlikini otturigha qoyup, mesilini xitaydiki shirket mes'ullirigha artishqa urun'ghan bolsimu, alibaba shirkitining % 39 lik paydisigha yaxuning ortaq ikenliki we, yaxuning sahibidin biri bolghan jerry yangning, alibaba shirkitining bashqurush hey'etliridin ikenliki seweplik ret qilindi؛ yaxu shirkiti yene xitay terepning tekshürüsh buyruqidiki, dölet mexpiyetliki dégen sözdin éniq tehdit his qilalmay qalghanliqini otturigha qoyghan bolup, buninggha tom lontas: "herqanche sadda ademmu xitayda dölet mexpiyetlikini ashkarilash dégen gepning tehditini hés qilalaydu" dep ret qilghan. Yighin jeryanida mikayil kollahan, xitayning tekshürüsh buyruqini xitayning qanuniy buyruqi dep tilgha alghinida, tom lantos, "qanunluq buyruq dep emes, buyruq" dep atishini körsetken.

Tom lantos:yaki epu qilinmas diqqetsizlik we yaki qip - qizil aldamchiliq

Tom lantos sözide yene, yaxu shirkitining bulturqi guwahliq bérish yighinidiki xata melumat bérish mesilisini " eger mesilini eng yaxshi terepke tartip chüshensekmu, bu yerdikisi epu qilinmas diqqetsizlik؛ eger yaman'gha tartip chüshensek qip-qizil aldamchiliqtur" dégen.

Yaxu shirkitining ipadisini anglap bolghan yighin mundaq xulase chiqarghan: yaxu shirkiti, amérika dölet mejlisige yalghan melumat bergen؛ shirket mes'ulliri bergen melumatning saxtiliqi pash bolghandin kéyin, özligidin kélip, xata melumatigha tüzütüsh bermigen؛ yalghan melumatning sewebliri heqqide shirket ichide tekshürüsh élip barmighan؛ hich bir xizmetchisi bu qilmish toghruluq jazagha uchrimighan؛ we mundaq qilmishning aldini alidighan hich qandaq bir chare tüzüm hazirghiche otturigha qoyulmighan. Shunga yaxu shirkiti, saxta melumati üchün, amérika dölet mejlisi awam palata tashqi ishlar komitétidin, amérika we amérika xelqidin ashkara kechürüm sorishi kérek.

Tom lantos, " bay, bilimlik emma peskeshsiler"

Tom lantos, xulasisidin kéyin, shirket sahipliri, jerriy yang we mikayil kollahan'gha xitap qilip, " siler pen téxnika jehette, iqtisadiy bayliq jehette, yüksek pellide turiwatqan kishiler bolsanglarmu, exlaqiy jehette pes kishilersiler. Arqanglardiki qatarda olturghan momay, erkinlik üchün küresh qilghan shi tawning anisi bolidu, uningdin epu sorishinglar kérek" dégen. Buning bilen shirket sahipliri ornidin turup shitawning anisi gawchinshéngdin epu sorighan.

Bu yighinda epu soralghanlar ichide xitayda oxshash sewep bilen qolgha élin'ghan wang shiyawningning ayali yu lingmu bar. Shitawning anisi söz qilip, soralghan epu üchün, minnetdar ikenlikini, emma eng muhimi, xitayda türmide yétiwatqan oghlining teqdiri ikenlikini bildürgen؛ u sehnide yene xitay hökümitige xitap qilip,oghlining qoyup bérilishini telep qilghan. Wang shiyawningning ayali bolsa, "epu tolimu kéchikken bir epu boldi؛ méning kütidighinim epula emes, kütidighinim, yoldishimning qoyup bérilishi, yaxu bu xataliqidin sawaq élishi kérek" dégen.

Közetküchiler, bu qétimqi yighin xulasisining yalghuz yaxu shirkitigila emes, shi taw mesilisining esli jawapkari bolghan xitay döliti we uning terepdarlirighimu qarita bir tenqid ikenlikini bildürüshmekte. (Shöhret hoshur)

Pikirler (0)
Share
Toluq bet