Хитайниң телефон мулазимитидә кимлик түзүмини йолға қоюши җиддий инкас қозғиди

2010 - Йили 1 - сентәбирдин башлап, хитайда телефон мулазимитидә кимлик түзүми омумйүзлүк йолға қоюлушқа башлиди. Нөвәттә хитайдики һәм хәлқара мәтбуатларда, шундақла тор бәтлириниң әркин муназирә мәйданлирида, бу түзүмгә нисбәтән охшимиған инкаслар барлиққа кәлди.
Мухбиримиз миһрибан
2010-09-02
Share
Xitay-telefon-saheside-kimlik-tuzumi-305 2010 - Йили 1 - сентәбирдин башлап, хитайда телефон мулазимитидә кимлик түзүми омумйүзлүк йолға қойулушқа башлиған болуп, сүрәттә, бу түзүм тоғрилиқ чиқирилған еландин бир көрүнүш.
http://tech.qq.com Дин елинди.

Нөвәттә хитайда 1 - сентәбирдин башлап омумйүзлүк йолға қоюлушқа башлиған телефон мулазимитидә кимлик түзүми омумлаштуруш түзүмигә нисбәтән хитай пуқралири җиддий инкас қайтурди. Хитайдики һөкүмәт мәтбуатлирида, түнүгүндин башлап бу түзүмниң җайлардики қол телефони һәм қол телефон картилирини сетиш мәркәзлиридә бирла вақитта йолға қоюлғандин кейин, пуқраларниң бу түзүмгә нисбәтән қоллаш һәм қарши елиш позитсийисидә болғанлиқи һәққидики хәвәрләр көпләп бесилди.

Шинхуа агентлиқиниң бу һәқтики хәвиридә, "һөкүмәтниң нөвәттә қол телефонлирида көпләп әвәтиливатқан әхләт учурлар һәм зиядә көп сода еланлирини тосуш, шундақла бәзи яман нийәтлик кишиләрниң пуқраларниң бихәтәрликигә тәһдит селиш, дөләт бихәтәрликигә зиян йәткүзүдиған учурларни әвәтишниң алдини елиш үчүн һөкүмәтниң бу түзүмни йолға қойғанлиқи, кәң хәлқ аммисиниң һөкүмәтниң бу қарарини қарши алғанлиқи" һәққидики мәлуматлар берилди.

Әмма, хитай тилидики тор бәтлириниң әркин муназирә мәйданлирида, хитай һөкүмити узундин буян йолға қоюватқан, 2010 - йил 1 - сентәбирдин башлап рәсмий қарарлаштурулған бу түзүм һәққидики наразилиқ инкаслири көпләп йезилди. Шоху торидики бир инкаста бу һәқтә тохтилип, "қол телефон һәм қол телефон картиси сетивелишта кимлик түзүминиң йолға қоюлуши, җуңго пуқралириниң кишилик һоқуқ әркинликиниң боғулуватқанлиқиниң испати. Һазир бир партийә һөкүмранлиқи астидики коммунист һөкүмәт пуқраларниң қол телефонда учур йоллаш әркинликини тосуш, һөкүмәткә нарази болған пуқраларни бастуруш үчүн бу түзүмни қолланмақта," дәп хитай коммунист һөкүмити әйибләнди.

Түнүгүндин башлап уйғур аптоном райони даирисидиму, телефон мулазимитидә кимлик түзүми омумлаштурулғанлиқи һәққидики хәвәрләр берилди. Тәңритағ ториниң түгүнки хәвиридә пуқраларниң бу түзүмгә нисбәтән алқишлаш позитсийисидә болғанлиқи баян қилинған.

Әмма, бүгүн уйғур елидин радиомиз зияритини қобул қилған уйғурлар, бу түзүмниң йолға қоюлуши, һөкүмәтниң райондики түзүмни йәниму чиңитқанлиқиниң ипадиси дәп қарайдиғанлиқини илгири сүрди.

Телефон зияритимизни қобул мәлум бир яш нөвәттә йүргүзүливатқан, телефон мулазимитидә кимлик түзүминиң йолға қоюлуши, уйғур аптоном районида йеңилиқ әмәсликини, бултур "5 - июл үрүмчи вәқәси"дин кейинла улар туруватқан җайда қол телефони сетивалғанда кимлик түзүми йолға қоюлғанлиқини, һазир вәзийәтниң техиму чиңип кетиватқанлиқини билдүрди.

Исмини ашкарилашни халимайдиған бир нәпәр һөкүмәт хизмәтчиси бу түзүм һәққидә тохтилип, "телефон мулазимитидә кимлик түзүминиң йолға қоюлуш әсли нормал иш. Әмма, һазир бизниң бу йәрдә вәзийәт чиңип кәтти. Мана әмди телефон картилири сетивелиштиму кимлик тәкшүрүш түзүми йолға қоюлди. Әгәр һөкүмәт халиса бизниң өз - ара қилишқан параңлиримизни аңлайду. Һазир бизниң бу йәрдә телефондики нормал параңлиримизниму қилиштин еһтият қилидиған болуп қалдуқ," деди.

Дуня уйғур қурултийиниң баянатчиси дилшат ришит әпәнди бу түзүм һәққидә тохтилип, хитай һөкүмитиниң районда қоллиниватқан бу бир қатар түзүмлириниң уйғурларниң учур һәм пикир әркинликини боғуш, уйғурларға қаратқан бастуруш сияситини йәниму күчәйтиш үчүн икәнликини тәкитлиди.

Хитай вәзийитини көзитип келиватқанлар өз қарашлирида, нөвәттә коммунист һөкүмити йолға қоюватқан қол телефон һәм қол телефон картисини сетивелишта кимлик түзүмини омумлаштуруш қатарлиқ түзүмлири әмәлийәттә хитай һөкүмитиниң пуқраларниң пикир әркинликини чәкләштә қоллиниватқан тактикилири икәнликини илгири сүрүп, хитай һөкүмитини пуқраларниң учур әркинликини боғуш билән әйиблимәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт