Хитайдики бир нефит туруба йолиниң партлиши хитайни әндишигә салмақта

2010 - Йили 7 - январ күни хитайниң ләнҗу шәһиридики нефит - химийә ширкити 303 - завутиниң 316 - номурлуқ нефит гази йәткөзөш линийисидә зор көләмлик партлаш вәқәси йүз бәргәндин кейин, хитай мәркизи һөкүмити һәм гәнсу өлкилик һөкүмәт, бу қетимлиқ партлаш вәқәсиниң сәвәбини ениқлаш һәм бу районда йүз бериш еһтимали болған наразилиқ һәрикәтлириниң алдини елиш үчүн җиддий тәдбир қоллинишқа киришкән.
Мухбиримиз миһрибан
2010-01-08
Елхәт
Пикир
Share
Принт
Сүрәт, 2010 - йили 7 - йанвар күни хитайниң ләнҗу шәһиридики нефит - химийә ширкити 303 - завутиниң 316 - номурлуқ нефит гази йәткөзөш линийисидә зор көләмлик партлаш вәқәси йүз бәргәндин кейинки от апитидин бир көрүнүш.
Сүрәт, 2010 - йили 7 - йанвар күни хитайниң ләнҗу шәһиридики нефит - химийә ширкити 303 - завутиниң 316 - номурлуқ нефит гази йәткөзөш линийисидә зор көләмлик партлаш вәқәси йүз бәргәндин кейинки от апитидин бир көрүнүш.
news.boxun.com Дин елинди.

Бу вәқә түнүгүн чүштин кейин саәт 5 йеримда йүз бәргән болуп, әйни чағда бу вәқә әң дәсләп телефон учури шәклидә тарқалған болуп, хитайниң шинхуа тор бетиниң хәвиридин ашкарилинишичә, бу вәқә тәхминән 1 милйон әтрапидики қол телефон учурлири арқилиқ ләнҗу шәһәр аһалисигә йәткүзүлгән.

Вәқә һәққидики дәсләпки учурларда йәнә, "Хитайниң ғәрбий шимал газ йәткүзүш турубисиниң ләнҗудин өтидиған 316 - туруба бөликидә 2 қетим қаттиқ партлаш йүз бәрди " Дегән хәвәрләрму берилгән.

Бүгүн әтигәндин башлап, хитайниң һөкүмәт хәвәр мәнбәлири вәқәниң әһвали һәққидә омумйүзлүк хәвәр беришкә башлиған . Хәлқ ториниң хәвиридә дейилишичә, 7 - январ күни чүштин кейин саәт 5:30 өткәндә ләнҗу нефит - химийә ширкити 303 - завут қармиқидики 316 - нефит гази йәткүзүш туруба линийисидә арқа - арқидин 3 қетим қаттиқ партлаш йүз бәргән болуп, мухбир вәқә йүз бәргән җайниң от деңизиға айланғанлиқини көргән. Вәқә йүз бәргән орун ләнҗу шәһәр мәркизигә 30 километир келидикән, туруба линийисидин 500 метир арилиқта аһалиләр олтурақ райони бар икән, шу әтраптики аһалиләрниң инкас қилишичә, партлаш йүз бәргинидә 17 километир неридики пуқралар қаттиқ силкинишни һес қилған. Һазирғичә вәқәдә 6 адәм өлгән болуп, 15 адәм яриланған. Вәқәдә қутқузуш хизмити үчүн, ләнҗу от өчүрүш идарисидин 37 от өчүрүш аптомобили, 284 нәпәр от өчүрүш хадими вә давалаш саһәсидики қутқузуш хадимлири сәпәрвәр қилинған.

Хәвәрләрдин мәлум болушичә, ләнҗу нефит - химийә завути хуаңхе дәряси еқини бойиға қурулған болуп,партлаш вәқәси йүз бәргәндин кейин, пуқраларниң вәқәгә нисбәтән тунҗи инкаси суниң булғинишидин әнсирәш болған, бошүн тор бетиниң бу һәқтә берилгән хәвиридә, кишиләрниң бир ‏ - биригә қисқа учур арқилиқ йәткүзгән хәвиридә, " нефит туруба йолида партлаш йүз берипту, аввал ичимлик су тәйярливелиңлар" дегәндин ибарәт болған.

Шинхуа агентлиқини мухбири нәқ мәйдандин бәргән хәвиридә, вәқә йүз бәргән мәйдандики әһвал һәққидә мәлумат берип мундақ дегән: "вәқә бәк еғир болғачқа мунасивәтлик даириләр бизниң вәқә йүз бәргән җайниң өзигә киришимизгә рухсәт қилмиди. Әмма көрүп турупсиләр, түнүгүн чүштин кейин саәт 5 йеримдин башланған от ялқуни гәрчә 37 данә от өчүрүш аптомобилниң бирла вақитта 400 миң кубметирлиқ су көлчикидин от мәйданиға 17 саәттин буян су чечиватқан болсиму, лекин һазирғичә отни өчүрүп болалмиди, уларниң дейишичә, отни пүтүнләй өчүрүп болушқа йәнә 24 саәт кетиши мумкин икән. Һазир завуттин көтүрүлгән ис - түтәк шәһәр мәркизигә қарап тарқиливатиду, бизниң зиярәт қилидиған аптомобилимизниң үстиниму қелин бир қәвәт күл тозиңи қаплиди, шу тапта ис - түтәк дәстидин нәпәс елишим қийинлишип, гелим ағриватиду."

Вәқә йүз бәргәндин кейин, хитай һөкүмитиниң вәқәгә қаратқан тунҗи инкаси қутқузуш хизмити елип бериш билән биллә, бу районда пуқралар арисида муһит булғиништин әнсирәш сәвәбидин йүз бериш еһтимали болған қалаймиқанчилиқниң алдини елиш болған. Мәркизи телевизийә истансисиниң нәқ мәйдандин бәргән хәвиридә, ләнҗу нефит - химийә ширкитиниң баш директори ли җимиң пуқраларниң көңлини тиндуруш үчүн мухбирға мундақ дегән: "биз нәқ мәйдандин әвришкә елип тәкшүрүш арқилиқ бу йәрдин техи пуқраларниң саламәтликигә зиян йетидиған зәһәрлик маддиларни байқимидуқ. Әмма вәқә йүз бәргән 800 квадрат метирлиқ даирә ичидә бу райондики чаң ‏ - тозанлар илгирики нормал мәзгилләрдикидин 8 һәссә ешип кәткән, завутниң йенида паскина суларни бир тәрәп қилидиған мәхсус көлчәк болғини үчүн бу һадисә сәвәбидин хуаңхе дәряси тәминләйдиған ичимлик су мәнбәси булғанмайду."

Әмма чәтәлләрдики хәвәр агентлиқлириниң бу вәқә сәвәбидин пәқәт ләнҗу шәһириниңла әмәс, бәлки хитайниң пүтүн ғәрбий шимал районидики бир нәччә өлкиниң һавасида һәм ичимлик сүйидә хуаңхе дәрясини мәнбә қилидиған өлкә - шәһәрләрниң ичимлик су мәнбәсидә еғир булғиниш болуши мумкин икән. Бүгүн тәйвәнниң һәм америкидики сумруғ теливизийә истансисиниң хәвәрлиридә, хитай һөкүмитиниң вәқәдин кейин аммини тарқитиш ишиға сәл қарап, пуқраларниң наразилиқидин келип чиқидиған қалаймиқанчилиқниң алдини елиш үчүн ялған тәшвиқат елип бериватқанлиқи тәнқидләнгән.

Көзәткүчиләрниң қаришичә, хитайда апәт характерлик еғир вәқәләр йүз бәргинидә, вәқәни йошуруп мәлум қилмаслиқ яки келип чиққан зиянни кичиклитип хәвәр қилиш хаһиши еғир болуп, 2008 - йиллидики сичүәндики йәр тәврәш, сәншидики көмүр кан партлап адәм өлүш вәқәси, һәтта бу йил йеңи йил кирип 4 - январ күни хебий өлкисиниң вуән шәһиридә йүз бәргән полат - төмүр ширкитиниң көмүр гази турубиси партлап 2 - тармақ завуттики 16 нәпәр ишчиниң көмүр газидин зәһәрлинип 7 адәмниң өлүш вәқәсиниму завут даирилири 20 саәт кечикип хәвәр қилғини һәм вәқәниң сәвәбини йошурғанлиқи үчүн түнүгүн 7 - январ күни хебий өлкилик һөкүмәт мунасивәтлик кишиләрни қолға алғанлиқини уқтурған иди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Толуқ бәт