Хитайда хәлқниң шуари рас, рәһбәрләрниң шуари ялған

Бүгүн интернеттә хәлқниң шуарлири билән хитай һөкүмиитниң шуарлириниң мәзмуни һәққидә муназирә болди. Униңда хәлқниң шуарлири рас, әмма хитай рәһбәрлириниң шуари ялған дегән қараш үстүнлүкни игилиди.
Өз мухбиримиз вәли
2011.11.22

Гуаңдуң өлкисидики бу шәһәрчидә, бүгүн йәнә онмиң кишилик намайиш йүз бәрди. Хоңкоң учур вастилириниң баян қилишичә, хәлқ бүгүнки намайиштиму “мустәбитликкә қарши туримиз”, “кишилик һоқуқимизни қайтуруп алимиз”, “ әмәлдар билән содигәрниң тил бириктүрүшигә қарши туримиз”, “терилғу йәрлиримизни қайтуруп бәрсүн”, “черикликни җазалаймиз” дегән хәтләр йезилған лозункиларни көтүрүвалған.

Хоңкоңдики обзорчи ло җүнҗениң ейтишичә, сәнвей районидики луфең шәһәрчисидә йүз бәргән намайиш интайин тәртиплик елип берилған тинч намайиш. Хәлқ өзиниң дәйдиған гепини лозункиларға йезип уни көтүрүвалған, шу көтүрүвалған лозункидики шуарларни товлап маңған. Әмма тосаттин бир нәччә аптомобилда сақчи келип, намайишчиларниң алдини тосқан. Намайишчилар төт миң бәш йүз адәм имза қоюп тәйярланған “тәләпнамә” ни шәһәрлик һөкүмәткә тапшурмақчи болғанлиқини ейтқанда, сақчилар уларни шәһәрлик һөкүмәт тәрәпкә маңғузмиған. Намайишчилар чиш - тирниқиғичә қоралланған һөкүмәткә қаршилиқ көрситишкә қурби йәтмигәндин кейин, буниңдин кейин қораллинип келип намайиш қилидиғанлиқини җакарлиған.

Америкида хитайчә чиқидиған “довей” тор гезити бүгүн, хитай дөләт кабинтиниң наһийә дәриҗиликтин юқири мәмури органларниң һөкүмәт хираҗитини сәрп қилиши очуқ - ашкара болуш һәққидә бәлгилимә чиқарғанлиқини хәвәр қилди. Буни хитай һөкүмитидә һазир черикликкә қарши туруш җәһәттә пәйда болған илгириләш дәп тәсвирлиди. Униңда йәнә, бу йил баш министир вен җябав ислаһат тоғрисида әң көп сөз қилған, мәркизи комитет қанун комитети һәр дәриҗилик мәмури органларда тәссис қилинған “қара хәзинә” ләрни байқиған шундақла мәмури орган рәһбәрлири меһман күтүш дегән нам билән чиқимни көп мәлум қилип хиянәт қилиш омумлашқан яман илләт түзитилишкә башлиған бир йил дәп тәсвирлигән.

Хоңкоңда чиқидиған “бәс - бәстә сайраш” журнилида елан қилинған хитай мәркизи комитетиниң образи күндин - күнгә начарлишип кетиватқанлиқиниң пакитлири көрситилгән мақалидә, вен җябавниң җәмийәттә әхлақ гумран болған мәсилини тилға алғанда, униң йилтизи һакимийәт сестимисидики әхлақ гумран болуш икәнликини, һакимийәт сестимисидики әхлақ гумран болуш черикликтин башланғанлиқини етирап қилиштин өзини қачурғанлиқи, бәлки мәсилини төвән дәриҗилик әмәлдарларға, һәтта хәлққә артип қоюшқа урунғанлиқи тәнқидләнгән.

Бүгүн бу мақалини көчүрүп басқан “хитайға нәзәр” тор гезитидә, бу һәқтә техиму тәпсилий муназирә болди. Униңда, хәлқ хиянәтчиликкә, чериклишишкә қарши туруш дегән шуарни ағзидин чүшүрмәй келиватиду, ху җинтавму ағзидин чүшүрмәйду. Буниң бири рас, бири ялған. Хитайда сиясий ислаһат елип бериш шуарини хәлқ ағзидин чүшүрмәй келиватиду, вен җябавму ағзидин чүшүрмәйду, буниңму бири рас, бири ялған. Хәлқниң шуари рас, рәһбәрләрниң шуари ялған. Җәмийәттики ялғанчилиқ, алдамчилиқ әхлақ гумран болғанлиқниң ипадиси. Әхлақ гумран болуш“коммуист партийә” пәйда болғандила башланған. Гәрчә хәлққә бәргән вәдиләрниң бирсиму рас чиқмиғанлиқи аллиқачан испатланған болсиму, әмма улар шу қелин йүзи билән йәнә давамлиқ ялған вәдә бериватиду дегән көз қараш үстүнлүкни игилиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.