Хитай өлкилиридә ишқа орунлаштурулуватқан уйғур яшлирини қандақ ақивәтләр күтиватиду?
2007.04.03
Хитай ахбарат вастилири 29 - март вә 31 - март күнлири уйғур елиниң йәкән наһийисидин 500 нәпәр қизни, йеңи шәһәр наһийисидин 330 нәпәр яшни хитайниң шәндуң өлкиси чиңдав шәһиридики кейим - кечәк завутлирида ишләш үчүн елип кәткәнликини хәвәр қилди.
Мәтбуатларда илгири, буниңға охшаш хәвәрләр изчил түрдә елан қилинип кәлгән болуп, техи иккинчи айдила йәкән әмгәк күчлирини хитайға йөткәш пилани бойичә, чиңдавдики шиңюңән кейим - кечәк завутиға 500 нәпәр қиз елип кетилгән иди. Хәвәрләрдин мәлум болушичә, бу йил йәкән наһийисидин хитай өлкә вә шәһәрлиригә йөткилидиған әмгәк күчиниң сани 6000 дин ашурулидикән.
Хитайға йөткилидиған уйғурларниң сани давамлиқ ашурулмақта
Қәшқәрниң йеңишәһәр наһийисидә болса 3 - айдин буян 3 түркүм, җәми 564 киши хитай өлкилиридә ишләшкә йолға селинған. Бу нөвәт йәни 31 - март күни чиңдавға йолға селинған яшлар асасән йеңи шәһәр базири, бағча йезиси, қумуш ериқ йезиси вә ханериқ базиридин тәшкилләнгән. Хитай мәтбуатида 2006 - йили йеңи шәһәр наһийисидин сиртқа йөткәп ишлитилгән адәм сани 36 миң 700 адәм қетимға йәткәнлики ашкариланған һәмдә бу йил йеңи шәһәр наһийисидин хитай өлкисидә узун муддәт ишләйдиған адәм санини 8000 ға йәткүзүш пилан қилинған.
Илгири истансимиз игилигән мәлуматтин, бу йил пәқәт пичан наһийисидин хитай шәһәрлиригә орунлаштуридиған ишчи қизларниң саниниң 5000 икәнлики испатланған иди.
Буниңдин сирт йеңисар наһийисидин хитай өлкисигә 185 нәпәр қиз йолға селинған болуп, әң кечикиниң йеши 16, чоңиниң 22 яш икән.
"Ғәмхорлуқ" арқисидики хорлуқ
Хитай орган мәтбуатлири вә истансимизниң бивастә игилигән мәлуматлиридин қариғанда, хитай даирилириниң уйғур елидики әмгәк күчлирини болупму яш уйғур қиз - чоканлирини асас қилған ишчиларни хитай шәһәрлиридики завут - карханиларға орунлаштуруштики мәқсити, ишсизлиқ мәсилисини һәл қилиш вә ишсиз қалған намрат уйғур деһқанлирини һаллиқ сәвийигә йәткүзүш болуп, бу хитай һөкүмитиниң хитай болмиған милләтләргә йәткүзиватқан ғәмхорлуқ сиясити һесаблинидикән.
Лекин уйғур елидин истансимизға кәлгән инкаслардин мәлум болушичә, ишқа орунлаштурулидиған ишчилар чоқум 30 яштин төвән болуши вә яш қизларни ишқа қобул қилиш шәрт қилинған болуп, бәзи җайларда һәтта ата - аниларниң рәт қилишиға қаримай, уларниң балилири мәҗбурий елип кетилгән.
Чәтәлләрдики уйғур тәшкилатлиридин, дуня уйғур қурултийи иҗраийә комитетиниң рәиси вә америка уйғур бирләшмисиниң баш катипи, алим сейитоф әпәнди, дуня уйғур қурултийиниң баянатчиси дилшат решит әпәнди бу һәқтә зияритимизни қобул қилип, хитай һөкүмитиниң уйғур қизлирини хитай өлкилиригә йөткәштики муддиаси һәққидә қарашлирини оттуриға қойди. (Әқидә)
Мунасивәтлик мақалилар
- Уйғур елидә, хитай өлкилиригә сәнәтчи қиз қобул қилиш еланлири барғансери көпәймәктә
- Чәтәлләрдики уйғур аяллар уйғур елидики аялларниң кишилик һоқуқ мәсилилиридин әндишә қилмақта
- " Бир аилидин бирни" елип меңиш сиясити буйичә уйғур яшлири хитай өлкилиригә беришқа мәҗбурланмақта
- Хитай һөкүмитиниң уйғур деһқан әмгәк күчлирини хитай өлкилиригә йөткишидики мәхпий вә ашкара тәрәпләр
- Уйғур деһқанлири хитай өлкилиригә ишчилиққа елип кетилгән балилириниң һалидин әндишә қилмақта
- Хитайда яш өсмүрләрни җинайәт өткүзүшкә мәҗбурлаш қилмишлири йәнила еғир һалда мәвҗут
- Пичан наһийисидики уйғур қизлар хитай өлкисидә қандақ ақивәтләргә дуч келиду ?
- Пичан наһийисидики бир түркүм уйғур қизлири хитай өлкисигә хизмәткә орунлаштурулди
- Сәргәрдан уйғур балилириға көңүл бөлүшни күчәйтмисә болмайду
- Хитай өлкилиригә елип кетилгән уйғур қизлириниң тәқдири уйғурларда әндишә пәйда қилмақта