Xitay ölkiliride ishqa orunlashturuluwatqan Uyghur yashlirini qandaq aqiwetler kütiwatidu?


2007-04-03
Share

Xitay axbarat wastiliri 29 ‏- mart we 31 ‏- mart künliri Uyghur élining yeken nahiyisidin 500 neper qizni, yéngi sheher nahiyisidin 330 neper yashni xitayning shendung ölkisi chingdaw shehiridiki kéyim - kéchek zawutlirida ishlesh üchün élip ketkenlikini xewer qildi.

Metbu'atlarda ilgiri, buninggha oxshash xewerler izchil türde élan qilinip kelgen bolup, téxi ikkinchi aydila yeken emgek küchlirini xitaygha yötkesh pilani boyiche, chingdawdiki shingyung'en kéyim - kéchek zawutigha 500 neper qiz élip kétilgen idi. Xewerlerdin melum bolushiche, bu yil yeken nahiyisidin xitay ölke we sheherlirige yötkilidighan emgek küchining sani 6000 din ashurulidiken.

Xitaygha yötkilidighan Uyghurlarning sani dawamliq ashurulmaqta

Qeshqerning yéngisheher nahiyiside bolsa 3 ‏- aydin buyan 3 türküm, jem'i 564 kishi xitay ölkiliride ishleshke yolgha sélin'ghan. Bu nöwet yeni 31 ‏- mart küni chingdawgha yolgha sélin'ghan yashlar asasen yéngi sheher baziri, baghcha yézisi, qumush ériq yézisi we xan'ériq baziridin teshkillen'gen. Xitay metbu'atida 2006 ‏- yili yéngi sheher nahiyisidin sirtqa yötkep ishlitilgen adem sani 36 ming 700 adem qétimgha yetkenliki ashkarilan'ghan hemde bu yil yéngi sheher nahiyisidin xitay ölkiside uzun muddet ishleydighan adem sanini 8000 gha yetküzüsh pilan qilin'ghan.

Ilgiri istansimiz igiligen melumattin, bu yil peqet pichan nahiyisidin xitay sheherlirige orunlashturidighan ishchi qizlarning sanining 5000 ikenliki ispatlan'ghan idi.

Buningdin sirt yéngisar nahiyisidin xitay ölkisige 185 neper qiz yolgha sélin'ghan bolup, eng kéchikining yéshi 16, chongining 22 yash iken.

"Ghemxorluq" arqisidiki xorluq

Xitay organ metbu'atliri we istansimizning biwaste igiligen melumatliridin qarighanda, xitay da'irilirining Uyghur élidiki emgek küchlirini bolupmu yash Uyghur qiz - chokanlirini asas qilghan ishchilarni xitay sheherliridiki zawut ‏- karxanilargha orunlashturushtiki meqsiti, ishsizliq mesilisini hel qilish we ishsiz qalghan namrat Uyghur déhqanlirini halliq sewiyige yetküzüsh bolup, bu xitay hökümitining xitay bolmighan milletlerge yetküziwatqan ghemxorluq siyasiti hésablinidiken.

Lékin Uyghur élidin istansimizgha kelgen inkaslardin melum bolushiche, ishqa orunlashturulidighan ishchilar choqum 30 yashtin töwen bolushi we yash qizlarni ishqa qobul qilish shert qilin'ghan bolup, bezi jaylarda hetta ata - anilarning ret qilishigha qarimay, ularning baliliri mejburiy élip kétilgen.

Chet'ellerdiki Uyghur teshkilatliridin, dunya Uyghur qurultiyi ijra'iye komitétining re'isi we amérika Uyghur birleshmisining bash katipi, alim séyitof ependi, dunya Uyghur qurultiyining bayanatchisi dilshat réshit ependi bu heqte ziyaritimizni qobul qilip, xitay hökümitining Uyghur qizlirini xitay ölkilirige yötkeshtiki muddi'asi heqqide qarashlirini otturigha qoydi. (Eqide)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet