Ху пиң: 'қизил учур вә милләтләр иттипақлиқи тәшвиқати хитайниң ахирқи козури'

"5 - Июл вәқәси"дин кейин, хитай һөкүмити уйғур елида интернет вә телефон алақисини үзүп ташлиғандин башқа пүтүн хитай тәвәсидә, интернет вә телефон алақисигә болған контроллуқни күчәйткән иди. Бу йил йеңи йил киргәндин кейин болса, пүтүн хитай бойичә телефонда "қизил учур йоллаш" һәрикити елип беришқа башлиған.
Мухбиримиз миһрибан
2010-02-16
Елхәт
Пикир
Share
Принт
Сүрәт, хитайниң қәшқәр шәһәрлик партком тәшвиқат бөлүми тәшкиллигән қәшқәр шәһириниң 2010 - йиллиқ баһар байримини тәбрикләш әдәбийат - сәнәт кечиликидики көрүнүшләрдин.
Сүрәт, хитайниң қәшқәр шәһәрлик партком тәшвиқат бөлүми тәшкиллигән қәшқәр шәһириниң 2010 - йиллиқ баһар байримини тәбрикләш әдәбийат - сәнәт кечиликидики көрүнүшләрдин.
www.xjtsnews.com Дин елинди.

Америка авази радио истансисиниң мухбири җаң нәнниң бүгүн 16 - феврал күни бейҗиңдин хәвәр қилишичә, һазир хитайда пүтүн дөләт бойичә, " қизил тавар һәрикити" дәп аталған телефонда " қизил учур йоллаш" паалийити елип бериливатқан болуп, һәр қайси йәрлик һөкүмәт даирилири пуқраларни телефонда "қизил учур йоллаш паалийити елип бериш" арқилиқ, "сериқ учурларға зәрбә бериш" һәрикитини қанат яйдурушқа сәпәрвәр қилмақта икән.

Хәвәрдә, хитайда йүргүзүливатқан бу һәрикәтниң мәқсити һәққидә тохтилип: хитайда " мәдәнийәт инқилаби мәзгилидә " пролетарият үстүнлүкни игилимисә, буржуазийә үстүнлүкни игиләйду." Дәйдиған бир шоар бар иди. Һазир хитай һөкүмити аталмиш " қизил учурларни йоллаш" арқилиқ, "сериқ учур" һәм " дөләт бихәтәрликигә тәһдит учур"ни тосуп, уларға зәрбә бәрмәкчи болуватиду." Дейилгән.

"Бейҗиң баһари" журнилиниң баш муһәррири ху пиң әпәнди бүгүн радиомизниң зияритини қобул қилип, хитай һөкүмити йолға қоюватқан бу паалийәт һәққидә өз мулаһизисини оттуриға қойди.

"Һазир хитай һөкүмити үчүн буниңдин башқа амал қалмиди, улар бир мәзгил компартийини күйләйдиған инқилабий мәзмундики нахшиларни ейтиш һәрикити елип барған иди, мана әмди " қизил тавар һәрикити" дәп нам қоювалған " қизил учурлар"ни йоллаш арқилиқ өз һакимийитини мустәһкәмлимәкчи болуватса керәк. Улар бир тәрәптин өзиниң тәшвиқатини күчәйтсә, йәнә бир тәрәптин пуқраларниң алақә васитиси болған телефон учурлирини контрол қилиш мәқситигә йәтмәкчи болмақта."

Уйғур елидики учур контроллуқи техиму қаттиқ болуп, йәрлик даириләр "3 хил күчләргә зәрбә бериш"һәм " иттипақлиқ вә муқимлиқ"ни тәкитләп, 1 - февралдин башлап кимлик нами бойичә интернет вә телефонға тизимлитишни йолға қоюп, тор сақчилирини һәссиләп көпәйтип, сәзгүр темида учур йоллиғанларни тутқун қилишни башливәткән.

12 - Феврал шинхуа агентлиқиниң хәвиридә баян қилинишичә, җамаәт хәвпсизлик даирилири чаған байрими мәзгилидә, районда учур алақигә болған контроллуқни һәссиләп ашуруп, бу мәзгилидики 30 күнлүк зәрбә бериш һәрикитидә, " сериқ мәзмундики телефон учурлириға һәм бөлгүнчилик мәзмунидики учурларға нуқтилиқ зәрбә бериш" һәрикити елип баридиғанлиқини уқтурған. Қанунчилиқ гезитиниң 12 - февралдики хәвиридә баян қилинишичә, учур алақә системисиниң бихәтәрликигә капаләтлик қилиш үчүн, уйғур аптоном район тәвәсидә, телефон һәм интернет абонтлириниң өзиниң кимлики бойичә тизимлитишини тәләп қилинған.

Йеқинқи йиллардин буян телефон учур - алақисиниң тәрәққиятиға әгишип, уйғур елидиму пуқралар арисида телефонда қисқа учур йоллаш омумлашқан. Техи йеқинда уйғур елидин чәтәлгә оқушқа чиққан бир оқуғучиниң дейишичә, болупму яшлар арисида бир - биригә телефонда қисқа учур йоллаш арқилиқ алақилишиш омумий кәйпиятқа айланған икән.

Бу оқуғучи яшлар арисида йоллинидиған бу хил учурларниң мәзмуни сағлам икәнликини, һөкүмәт дәватқан "сағлам болмиған сериқ мәзмундики әхләт учурлар"ниң интайин аз икәнликини, һөкүмәтниң әмәлийәттә сәзгүр мәзмундики учурларға диққәт қилидиғанлиқини һәм чәкләйдиғанлиқини баян қилди.

Ху пиң әпәнди, хитай һөкүмитиниң пуқралар арисида әң омумлашқан телефонда қисқа учур йоллаш арқилиқ өз -ара алақилишиш, пикир алмаштуруш әркинликигиму йол қоймай, пуқраларниң кишилик әркинликини дәпсәндә қиливатқанлиқи һәққидә тохтилип мундақ деди: "әмәлийәттә коммунист һөкүмәтниң қарши турудиғини қандақтур "сериқ мәзмундики учурлар әмәс, улар пуқраларниң сөз әркинликини боғмақчи. Хитай һөкүмити "5 - июл"дин кейин интернет һәм узун йоллуқ телефонни үзүп ташлап учурни қамал қилди. Әмма пүтүн дуня бойичә хитайда әң омумлашқан телефонда қисқа учур йоллашни тосушқа амал қилалмиди. Ички хитай өлкилиридә һазир һөкүмәткә болған наразилиқлар һәм шу җайларда йүз бәргән пәвқуладдә вәқәләр телефонда қисқа учур йоллаш арқилиқ тарқитиливатиду. Шуңа әмди телефондики учурларни контрол қилиш арқилиқ өз һакимийитигә зиян йетидиған барлиқ наразилиқларни басмақчи болуватиду."

Хупиң әпәнди сөзидә йәнә, хитай һөкүмитиниң чаған мәзгилидә уйғур елидә "муқимлиқ" һәм "милләтләр иттипақлиқи"ни тәкитләп "30 күнлүк қаттиқ зәрбә бериш" һәрикити елип бериш билән биллә бейҗиң, үрүмчи, қәшқәр қатарлиқ шәһәрләрдә, чоң типтики сәнәт кечилики орунлаштуруп, хитайниң чағинида уйғур артисларни сәһнигә чиқирип компартийә һәм милләтләр иттипақлиқини мәдһийиләйдиған нахшиларни ейтқузуватқанлиқини " хитайниң дуняға қиливатқан көз боямчилиқи" һәм "маймун оюни ойнатқанлиқи" дәп әйиблиди.

"Уйғур, тибәт, моңғулларни сәһнигә чиқирип, компартийини һәм милләтләр иттипақлиқини мәдһиләйдиған нахшиларни ейтқузуш, Компартийә һөкүмитиниң 60 йилдин буян давамлаштуруп келиватқан маймун оюни. Улар ашундақ тәшвиқатлар арқилиқ хәлқараға "хитайда милләтләр иттипақ, милләтләр баравәр" дегәнни тәшвиқ қилиду. Өз ичидә болса қаттиқ бастуруш сиясити қоллиниду. Алайлуқ олимпик мәзгилидә уйғур қатарлиқ милләтләргә олимпик мәшилини көтүргүзди, хитай балилирини 56 милләт қияпитидә ясап сәһнигә чиқарди, бултур дөләт байримида тйәнәнмен мәйданиға 56 милләткә вәкиллик қилидиған 56 түврүкни тиклиди... Әмма һәммә милләтләр баравәр яшайдиған демократик дөләт америка қатарлиқ ғәрб дөләтлири һечқачан бундақ ясалмилиқларни қилмайду. Бу хитайниң көз боямчилиқи һәм маймун оюни ойнатқанлиқиниң әң яхши пакитлири. Мән кесип ейтимәнки, қизил учур йоллаш һәм милләтләр иттипақлиқи тәшвиқати, хитай коммунист һөкүмитиниң ахириқи козури, улар өз һакимийитиниң әң ахириқи мәзгилгә кәлгинини билиду, шуңа барлиқ вастиларни ишқа селиватиду."

Көзәткүчиләрниң қаришичә, һазир хитай һөкүмити қайтидин мав зедуң дәвридин қалған компартийини мәдһийиләйдиған инқилабий нахшиларни ейтишни тәшәббус қилиш, қизил учур йоллаш, милләтләр иттипақлиқини тәшәббус қилиш,чәтниң бөлгүнчилик күчлиригә зәрбә бериш қатарлиқ һәрикәтләрни елип бериш арқилиқ өз һакимийитини мустәһкәмлимәкчи икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт