23 - Mart xoten ayallar namayishi: yéngi melumatlar

• Muxbirimiz shöhret hoshurning bu heqtiki toluq melumati
• Download story audio

Xoten ayalliri. Süret Youtube tin élindi. Source: Youtube

Aldinqi kündiki programmimizda, 23 ‏ - we 24 ‏ - mart künliri xoten shehiride yüz bergen namayish heqqide melumat bergen iduq. Uningdin kéyin radi'o anglighuchilarning inkasi we téléfon ziyaretliri arqiliq yene bir qatar toluqlima melumatlargha érishtuq. Xotendin yéngila xitayning ichkiri ölkisige kelgen bir tijaretchining bildürüshiche, namayish, xoten shehirining lop aptowuz békitidin bashlan'ghan. Bu béket, xoten shehirige, xotendiki, chiriye, kiriye, lop qatarliq nahiyidin yoluchi kélidighan awat bir qatnash békiti bolup, 600 neper ayal shu küni sa'et 10 da bu béketke toplan'ghan.

Namayishchilar qoshuni 1000 din éship ketken

Bashlirigha Uyghurlarning milliy kiyim - kéchekliridin bolghan romal artqan namayishchilar, lop békitidin shu'ar towlap sheher merkizige qarap yolgha chiqqan, yol üstide namayishchilar qoshuni köpiyip, sheher merkizidiki chong bazar dep atilidighan jaygha kelgende, namayishchilar qoshuni 1000 din éship ketken.

Namayishchilar qoshuni chong bazargha kelgende, saqchilarning pütünley qorshawida qalghan. Saqchilar namayishchilarning dawamliq ilgirilishige yol qoymighan. Saqchilar deslep yumshaq waste qollinip, namayishchilarni ténch tarqilip kétishke chaqirghan. Emma namayishchilar tarqilishni ret qilghan.

Saqchilar tutqun qilishqa bashlighanda, weqeni közitip turghan xelq namayishchilar sépige qétilip saqchilargha naraziliq bildürgen, buning bilen namayishchilar we namayishni qollighuchilar bilen saqchilar arisida toqunush kélip chiqqan. Buning bilen namayishqa qatnashqan we namayishni qollighuchilar bolup, weqege shahid bolghuchilarning sani 2000 din ashqan.

Saqchilar, köpinchisi ayallardin teshkil tapqan 400 kishini qolgha alghan

Saqchilar shu küni, köpinchisi ayallardin teshkil tapqan 400 kishini qolgha alghan. Toqunushta bir qisim xitay tijaretchilerning dukini urup chéqilghan. Buning bilen sheherdiki bir qisim xitay tijaretchiliri dukanlirini taqighan. Bir tijaretchining bildürüshiche, xitay tijaretchiler dukinini ikki kun taqighan, yene birining bildürüshiche, jüme künige qeder bir qisim xitay tijaretchiliri dukanlirini taqighan.

Xoten ayalliri. Süret Youtube tin élindi. Source: Youtube

Namayish ikkinchi küni oxshash shekilde yene dawam qilghan, bu qétim 200 kishi qolgha élin'ghan. Hökümet da'iriliri namayishchilar qoshunining téximu kéngiyip kétishining aldini élish üchün, sheher ichidiki asasi qatlamlarda, kishilerge öydin talagha chiqmasliq buyruqi chüshürgen.

Namayish qozghidi we qutratquluq qildi dep qarighanlarni qachurup qoymasliq uchun, hem sheher xelqining namayishchilargha qétilip kétishining aldini élish üchün, saqchilar sheher kochilirigha tosaqlarni qurup qatnash ‏ - transport we uchur alaqini qamal qilghan.

23 ‏ - Mart namayishini bashlighan 600 ayal béshigha "romal" artqan

Xotenning qaraqash nahiyilik hökümitining tor bétide 26 ‏ - mart küni xewer qilishiche, xotende yéqinqi aylardin béri 4ni birleshtürüsh xizmiti élip bérilghan. Buning biri olimpikni kütiwélish bilen muqimliqni saqlashni birleshtürüsh bolup, mezkur xewerde bildürüshiche, olimpikni kütiwélish bilen muqimliqni birleshtürüshte alahide netije qolgha keltürülgen. Hökümet tor bétidiki bu bayanlar, bizge élxet arqiliq kelgen bir qisim inkaslarning toghriliqini ispatlimaqta.

Inkaslarda bildürülüshiche, xoten shehiride, muqimliqni saqlash herikitide, ayallarning béshigha romal artishi diniy radikalliq dep qaralghan we romal artmasliq terghibati élip bérilghan. Bu sewebtin, 23 ‏ - mart namayishini bashlighan 600 ayal béshigha romal artqan.

Ular namayishta, xitay hökümitining örüp ‏ - adetke qopalliq bilen arilishishini eyiblesh bilen bille, bu yil 3 ‏ - mart küni saqchilar teripidin jesiti a'ilisige qayturulghan mutellip haji isimlik tijaretchining ölümige qarita naraziliqinimu ipadilen'gen. Mehbuslargha qaritilghan qiyin - qistaqqa xatime bérilishi we siyasiy mehbuslarning qoyup bérilishi telep qilin'ghan.

Toluqsiz melumatlargha qarighanda, 23 ‏ - we 24 ‏ - mart weqeside 6 kishi ölgen, qolgha élin'ghan 600 ayalning yérimidin köpreki qoyup bérilgen. Emma bu weziyetni ispatlighudek pakit téxi mewjut emes. (Shöhret hoshur)