Xujintawning chiriklikke qarshi turush chaqiriqi aqamdu?


2007-12-20
Share

Xitay kommunist partiye merkizi komitétining re'isi xu jintaw 12 ‏- ayning 18 ‏- küni siyasiy byuro yighini échip, her derijilik partkomlargha 'chiriklikke qarshi turushni muhim orun'gha qoyush, chiriklikke qarshi turush üchün 2008 ‏- yilidin 2012 ‏- yilighiche bolghan besh yilliq pilan tüzüp chiqish heqqide chaqiriq otturigha qoyghan idi. Uchur wastiliri buheqte mulahize we obzorlar élan qildi.

Xitayda dawamlishiwatqan chiriklikni chaqiriq chiqirish arqiliq tosush mumkin emes

Dunya Uyghur qurultiyining bayanatchisi dilshat réshitning qarishiche, xitayda dölet qanuni partiyini bashquralmaydighan, xelqte pikir bayan qilish erkinliki we neshriyat erkinliki bolmighan ehwal astida, chiriklikke qarshi turush heqqide chaqiriq chiqirish arqiliq xitayda dawamlishiwatqan chiriklikni tosush mumkin emes.

Kommunist partiyining özini saqlap qélish tedbiri

Dilshat réshitning tehlil qilishiche, xu jintawning hazirqi waqitta chiriklikke qarshi turush chaqiriqi otturigha qoyghanliqi, xitay kommunist hökümiti özini dunyaning bésimidin qachurush, kommunist hakimiyitini dawamliq saqlap qélish üchün qollan'ghan tedbiridinla ibaret.

Kommunist emeldarliri yuqiridin töwen'giche bir yürüsh chirikleshken

Shendung uniwérsitétining proféssori sün wén'gu'angning radi'omiz arqiliq élan qilghan mulahiziside bayan qilinishiche, xitay kommunist partiye merkizi komitéti yighin échip chaqiriq chiqiridighan shekil yéngi shekil emes. Kommunist partiyining chiriklikke qarshi turush shu'ari buningdin burunmu déyilgen gep, her qétimda 'birdemlik shamal' bolghan, aqmighan shu'ar idi.

Sün wén'gu'angning qarishiche, kommunist partiyining emeldarlirini xelq obdan bilidu, xuddi hazirqi xelq temsilliride teswirlen'gendek, mesile yighinda aldinqi üch rette olturghanlarda, chong mesile ularning ichidin re'is sehnisige chiqip olturidighanlarda, eng chong mesile re'is sehniside hemmining otturisida olturghan kishide. Kommunist emeldarliri yuqiridin töwen'giche bir yürüsh chirikleshken. Xitayda bundaq chiriklikni tosaydighan organ yaki küch yoq. Ular özidiki chiriklikni özi qandaq birterep qilidu?

'Chiriklikke qarshi turush' shu'ari otturigha qoyulghanséri chiriklik shunche ewj élip ketti

Erkin yazghuchi chénju ependining qarishiche, ishikni échiwitish- islahat élip bérish otturigha qoyulghandin kéyin, chiriklikke qarshi turush shu'ari otturigha qoyulghan, emma bu shu'ar otturigha qoyulghanséri chiriklik shunche ewj élip ketti.

Xitayda metbe'e erkinliki bolmighachqa, xelq bundaq mesililerni pash qilishi mumkin bolmidi. Yéqinda birterep qilin'ghan shangxey partkom sékritari chén lyangyü délosi peqet kommunist partiyining siyasi küresh éhtiyaji. Uningdin bashqilirini yenila yoshurup qaldi.

Kommunist emeldarliri bay bolushtiki tennerxi eng töwen tijaret‏ ‏-‏- chiriklishish

Xitayda hazir kommunist partiye ichide yuqiridin töwen'giche bir yürüsh chiriklishish dawamlashmaqta. 2006 ‏- Yili birterep qilin'ghan xiyanetchilik délosining %80 ni kommunist emeldarliri sadir qilghan.

Xitayda chiriklishishni bir terep qilidighan küch bolmighachqa, kommunist emeldarliri üchün éytqanda, bay bolush üchün tennerxi eng töwen tijaret ‏-‏-‏- chiriklishish. Bundaq jinayetni yoshurush üchün xelqning pikir erkinliki we neshriyat erkinlikini tosush, ularning qolidin kélidighan ish, hazir qiliwatqinimu shu. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet