Meshhur dawa qayta sehnide


2007-10-17
Share

Yaxu intérnét shirkitining xitay zhurnalist shi tawning türmige tashlinishidiki mes'uliyiti sürüshte qilinip échilghan we 2006 ‏-yili yil 2 ‏-ayda yaxu shirkiti gunahsiz dep yekünlen'gen insan heqliri dawasi, tünügün , amérika awam palatasi tashqi ishlar komitéti teripidin yéngidin kün tertipke keldi: yaxu intérnét shirkiti, bu yil 11 ‏-ayning 6 ‏- küni amérika dölet mejlisi teripidin échilidighan guwahliq yighinida, mezkur dawada gunahsizliqi heqqide qaytidin melumat béridu.

Mezkur dawa , insan heqliri közetküchiliri teripidin yéqinqi yillarning meshhur dawasi dep qaralghan idi. Bu dawani meshhur qilghan nuqta, bir zhurnalistning türmige tashlinishi emes ,belki dawada ziyankeshlikni biwaste sadir qilghuchi xitay da'iriliri shikayet qilinmay , ziyankeshlikke qoshumche sewebchi bolghuchi yaxu shirkitining shikayet qilinishi idi.

Shi tawgha ziyankeshlik qilghuchi yaxu shirkiti emes , xitayning siyasiy sistémisi

Shi taw, xitaydiki" zamaniwiy tijaret" namidiki bir gézitning muxbiri bolup, u 2004 ‏- yili chet'elde neshr qiliniwatqan bir axbarat torida, xitayda siyasiy islahat élip bérish zörürlüki teshebbus qilin'ghan bir parche maqale élan qilghan , bu maqalidiki pikirler , xitay hökümiti teripidin, dölet mexpiyetlikini ashkarilash dep qarilip, aptor shu yili qolgha élin'ghan we 2005 ‏-yili 10 yilliq qamaq jazasigha höküm qilin'ghan idi.

Shuningdin kéyin, jaylardiki insan heqliri teshkilatliri shi tawgha naheq ziyankeshlik qilghan xitay hökümitini tenqidligen ؛ buning bilen bille yene , yaxu intérnét shirkitini , xitay dölet bixeterlik saqchilirigha , shi tawning intérnétte tizimlan'ghan alaqidar uchurlirini yetküzüp bérish arqiliq , mezkür ziyankeshlikning shekillinishige sewebchi boldi dep eyibligen idi.

Bultur 2 ‏- ayda, amérika parlaméntida bu heqte mexsus guwahliq yighini échilghan , yighinda, yaxu intérnét shirkiti, xitay da'iriliri shi taw toghriliq uchur igiligende , ularning néme meqsette éniqlighinini bildurmigenlikini, bu sewebtin yaxuningmu , shi tawsha munasiwetlik intérnét tizimlik uchurini saqchilargha bergenlikini؛ shunga ,shi tawgha ziyankeshlik qilghuchi yaxu shirkiti emes, xitayning siyasiy sistémisi ikenlikini otturigha qoyghan idi.

Di'alog wexpi herkette

Bu yil 7 ‏-ayda , amérikining kaliforniye shtatidiki di'alog wexpi namliq teshkilat, , béyjing bixeterlik saqchilirining, yaxu shirkitige yazghan bir parche xétini qolgha chüshürgen bolup, u xettin melum bolushiche, , béyjing saqchiliri, yaxu shirkitige éniq qilip , shi tawning, chet'elge dölet mexpiyetlikini yetküzgenlikige a'it pakit toplawatqanliqini uqturghan.

Bu matériyal otturigha chiqish bilen, yaxu shirkiti emdi, bulturqi dölet mejliside ötküzülgen guwahliq yighinida yalghan guwahliq bergenlik eyiplimisige duch keldi , amérika awam palatasi tashqi ishlar komitétining bashliqi tom lantosning bildürüshiche, yaxu shirkitining mes'ulliridin jerriy yang bilen , micheyl kallahan'gha uqturush ewetilgen , ular 6 ‏- noyabirdiki guwahliq yighinida, shi tawning ziyankeshlikke uchrishidiki mes'uliyiti hem bulturqi guwahliq yighinida yalghan sözlep-sözlimigenliki heqqide toluq melumat béridu.

Uyghur tarixchi toxti muzat , yazghuchi nurmuhemmed yasinlarmu türmide

Hörmetlik radi'o anglighuchilar, bügün xitay zhurnalist shi tawla emes, Uyghur tarixchi toxti muzat , Uyghur yazghuchi nurmuhemmed yasin qatarliq minglarche mehbus, peqet pikir bayan qilghini üchünla türmilerde yétiwatidu, bu ziyankeshlikni sadir qilghuchi xitay hökümiti bolsa, inaq jem'iyet berpa qilish wedisini bildürüp qurultay échiwatidu؛ bir shi tawning ziyankeshlikke uchrishigha chétilip qalghan , yaxu intérnét shirkiti bolsa , bu qilmishi üchün ikki yildin béri, béshi derttin qutulmaywatidu.

Mana bu xitay kommunist partiyisi 17 ‏- qurultiyida, qet'iy egeshmeydighanliqini bildürüp ötken gherbche siyasiy tüzülme bilen , ular qet'iy tewrenmeydighanliqini bildürgen xitay sotsiyalistik tüzümining perqini roshen körsitip béreleydighan bir pakit bolsa kérek. (Shöhret hoshur)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet