Японийә уйғур җәмийити асия - тенч окян иқтисади һәмкарлиқ тәшкилатиға әза дөләтләргә қарарнамә йоллиди

Шәнбә күни японийидики әң чоң өктичи тәшкилатлардин бири болған "дәс тур японийә" тәшкилати токйода кәң көләмлик паалийәт уюштуруп, һазирқи һөкүмәтни хитай билән болған дипломатик мунасивәтләрдә қаттиқ қол болушқа чақирған.
Мухбиримиз ирадә
2010-11-08
Share
Yaponda-xitaygha-qarshi-yighilishta-Ilham-mahmut-sozde-305 Сүрәт, шәнбә күни йапонийидики әң чоң өктичи тәшкилатлардин бири болған "дәс тур йапонийә" тәшкилати уйуштурған паалийәттә, йапонийә уйғур җәмийитиниң башлиқи илһам мәһмут әпәнди сөз қиливатқан көрүнүш.
Сүрәтни илһам мәһмут әпәнди тәминлигән.

Бу паалийәткә японийә уйғур җәмийитиниң башлиқи илһам мәһмут әпәнди алаһидә тәклип қилинған Болуп, у паалийәттә уйғур мәсилиси һәққидә доклат бәргән. Бундин сирт японийә уйғур җәмийити йәнә японийидә ечилиш алдида турған асия - тенч окян иқтисади һәмкарлиқ тәшкилатиниң йиғини мунасивити билән бир қарар мақуллап чиққан.

Японийә билән хитай арисида кемә соқулуп кетиш вәқәси билән мәйданға кәлгән дипломатик сүркилишләр японийидә зор тәсир пәйда қиливатқан бир пәйттә, японийидики"дәс тур японийә" намлиқ өктичи тәшкилат шәнбә күни токйо шәһиридә зор көләмлик бир паалийәт елип барған. " Дәс тур японийә" тәшкилати японийидә тәсир күчи зор болған тәшкилат болуп, улар паалийәт арқилиқ кейинки күнләрдә японийә билән хитай арисида мәйданға кәлгән кемә вәқәси, япон ширкәтлири хитайда учраватқан қийинчилиқлар, хитайниң японийигә қиливатқан дипломатийилик бесимлири қатарлиқ нурғун мәсилиләрни оттуриға қоюп, японийини хитайға қарши күчлүк болушқа чақирған.
Yaponda-xitaygha-qarshi-yighilishta-Ilham-mahmut-meydan-305
Сүрәт, шәнбә күни йапонийидики әң чоң өктичи тәшкилатлардин бири болған "дәс тур йапонийә" тәшкилати уйуштурған паалийәт мәйданидин көрүнүш.

Игилинишичә, паалийәткә 4000 дин артуқ киши иштирак қилған болуп, йиғинда японийиниң сабиқ һава армийиси қомандани тамугами вә сабиқ дөләт мудапиә министири койико ханимлар сөз қилған. Йиғинда уйғурларниң мәсилиси һәққидә сөз қилишқа алаһидә тәклип қилинған илһам мәһмут әпәнди юқиридики икки сабиқ министирдин кейинла 3 - болуп уйғур мәсилиси вә японийиниң хитай мунасивәтлиридики мәйдани һәққидә доклат бәргән.

Буниңдин сирт паалийәттә йәнә, японийидики һәрқайси муһим өктичи партийә вәкиллиридин башқа тибәт вә тәйвәнлик вәкилләрму сөз қилған. Паалийәтниң доклат бериш қисми аяқлашқандин кейин паалийәткә иштирак қилған 4000 дин артуқ киши кочиларға чиқип намайиш өткүзгән. Паалийәт интайин қизғин елип берилған болуп, бундақ болушида, японийидә техи бир күн бурун хитай кемисиниң япон кемисигә қәстән урулғанлиқиға даир видео көрүнүшиниң ютуб тори арқилиқ ашкарилинип кетишиму муһим бир амил болған болуп, бу көрүнүшләр япон хәлқидә қаттиқ бир силкиниш пәйда қилип, зор җамаәт пикри яритип, паалийәтниң техиму юқири пәллигә чиқишиға сәвәб болған. Һәрқайси телевизийә қаналлири паалийәтни хәвәр қилған.

Японийидә хитайға қарши авазлар мушундақ йүксиливатқан бир пәйттә, асия - тенч окян иқтисади һәмкарлиқ тәшкилатиниң йиғини 14 - 16 ‏ - ноябир күнлири японийиниң йокохома шәһиридә ечилиш алдида турмақта. японийә уйғур җәмийити бу мунасивәт билән йокохома шәһиридә асия тенч окян иқтисади һәмкарлиқ тәшкилатиниң йиғини чақирилидиған орунға йеқин бир орунда паалийәт уюштурған. "Боғулған һәқиқәтни асия тенч окян иқтисади һәмкарлиқ йиғинида ашкара қилиш" намида ечилған бу йиғинға, йокохома шәһиридин икки парламент әзаси, токйо мәркәз парламентидин бир парламент әзаси вә уйғур мәсилисигә көңүл бөлидиған башқа япон әрбаплардин болуп, җәмий 200 әтрапида адәм қатнашқан.

Йиғин ахирида японийидә ечилиш алдида турған асия - тенч окян иқтисади һәмкарлиқ тәшкилатиниң йиғиниға қатнишидиған һәрқайси дөләт рәһбәрлиригә сунуш үчүн бир қарарнамә мақулланған болуп, қарарнамидә хитай һөкүмитидин, уйғурларниң сиясий, мәдәний, иқтисадий һәқлиригә охшаш асасий кишилик һоқуқлириға һөрмәт қилишни тәләп қилиш, халиғанчә уйғурларни тутқун қилишни тохтитиш, қануни сот тәртипини йолға қоюш, хәлқаралиқ мустәқил тәкшүрүш органлириниң уйғур районида 5 - июл вәқәсини тәкшүрүшигә йол қоюш, террорлуққа қарши ортақ күрәш нами билән уйғурларни бастурушни тохтитиш вә атом синиқи һәққидә очуқ мәлумат берип, атомниң зиянкәшликигә учриған уйғурларға төләм төләш қатарлиқ 5 мадда турғузулуп чиқилған.

Қарарнамидә йиғинға қатнишидиған һәрқайси дөләтләрниң йиғинда буни оттуриға қоюши тәләп қилинған. Мәзкур қарарнамә америка, канада, русийә, йеңи зеландийә, австралийә, һиндонезийә қатарлиқ 20 дин артуқ дөләтниң японийидә турушлуқ әлчиханиси вә японийә парламентиға әвәтилгән.

Японийә уйғур җәмийитиниң рәиси илһам мәһмут әпәнди асия - тенч окян иқтисади һәмкарлиқ тәшкилатиниң йиғини алдида мундақ бир қарарнаминиң мақуллинишиниң асия дөләтлири ичидә уйғур мәсилисиниң күн тәртипкә келиши җәһәттин муһим әһмийәткә игә икәнликини ейтти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт