Yaponiyidiki Uyghur, mongghul, tibet teshkilatliri xitaydiki kishilik hoquq aktipliri hem zhurnalistlarning ehwalini anglatti

5-Mart küni yaponiyidiki Uyghur, mongghul, tibet hem xitay démokratik teshkilatlirining xitay hökümiti tutqun qilghan kishilik hoquq aktipliri hem zhurnalistlarni qoyup bérishini telep qildi.
Muxbirimiz méhriban
2011.03.04
ilham-maxmut-yaponiye-305.jpg Ilham mexmut ependi 1-ayning 14-küni yaponiyining herqaysi sheherliride sinkako arilini qoghdap qélish toghrisida qanun chiqirishini telep qilip ötküzülgen pa'aliyette söz qildi.
RFA/Erkin Tarim

Yéqinqi birqanche yildin buyan, chet'ellerdiki xitaygha qarshi öktichi teshkilatlardin chet'ellerdiki Uyghur, tibet, mongghul, xitay démokrat teshkilatlirining birlikte élip barghan pa'aliyetliri janlanmaqta.

Dunya Uyghur qurultiyining yaponiyidiki mes'uli ilham mexmut ependining bildürüshiche, yaponiyidiki ichki mongghul xelq partiyisining teshebbusi bilen yaponiyidiki Uyghur, tibet, xitay démokratik teshkilatliri 5-mart küni yaponiyining tokyo shehiridiki 400 kishilik olimpik merkizi zalida birleshme pa'aliyet uyushturghan.

Ilham mexmut ependining bildürüshiche, bu qétimliq birleshme pa'aliyetning meqsiti, yaponiye jama'etchilikige hazirgha qeder xitay hökümiti teripidin nezerbend astida turuwatqan mongghul kishilik hoquq pa'aliyetchisi xada, 5-iyul ürümchi weqesidin kéyin tutqun qilinip, muddetlik muddetsiz qamaq jazalirigha höküm qilin'ghan gheyret niyaz qatarliq zhurnalistlar, dilshat perhat qatarliq tor bet bashqurghuchilirining ehwalini tonushturush hem hélighiche xitay türmiside yétiwatqan 2010- yilliq nobél tinchliq mukapati sahibi lyu shiyawboni qoyup bérish telipini otturigha qoyush iken.

Bu qétimliq pa'aliyetni uyushturushni teshebbus qilghuchi ichki mongghul xelq partiyisining yaponiyidiki bash katipi khéré'id khuwisgalt ependi ziyaritimizni qobul qildi.
Khéré'id khuwisgalt ependi öz bayanida, bu qétim yaponiyide uyushturulghan Uyghur, mongghul, tibet, xitay démokratlirining birleshme pa'aliyitining chet'ellerdiki xitaygha qarshi öktichi küchlerning öz ‏- ara hemkarliqni kücheytishide muhim ehmiyetke ige ikenlikini bildürdi.

Ilham mexmut ependi ziyaritimiz axirida, hazir yaponiyide Uyghur, tibet, mongghul mesilisige köngül bölgüchi yaponiyiliklerning barghanche köpiyiwatqanliqini tekitlidi.
Ilham mexmut ependi yene, bundin kéyin yaponiyide bu xil birleshme pa'aliyetlerning dawamliq uyushturulidighanliqini ilgiri sürüp, nöwettiki shara'itta dunya Uyghur qurultiyi qatarliq chet'ellerdiki Uyghur teshkilatlirining Uyghur milliy mesilisini dunyagha tonutush hem dunya jama'etchilikining qollishi hem yardimini qolgha keltürüshte, chet'ellerdiki xitaygha qarshi tibet, mongghul hem xitay démokrat teshkilatliri bilen birleshme pa'aliyet élip bérishining muhim ehmiyetke ige ikenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.