Yaponiye - xitay munasiwitide sürkilishler meydan'gha kelmekte


2005.02.18
Share on WhatsApp
Share on WhatsApp

Ötken hepte, xitay tashqi ishlar ministirliqi bayanat élan qilip, yaponiyining sikaku taqim aralliridiki mayakqa ige chiqqanliqini eyibligen idi.

Xitay tashqi ishlar ministirliqining bayanatchisi köng chüen bu munasiwet bilen ötküzülgen muxbirlarni kütüwélish yighinida, sikaku arilining ezeldin xitayning zémini ikenlikini, shundaqla yaponiye hökümitining mezkur aralgha qaratqan her qandaq bir tereplimilik herikitining qanunsiz we inawetsiz ikenlikini bildürdi. Amma u, xitay hökümitining bu heqte ilgiriligen halda bir tedbir qollinidighanliqi heqqide ipade bildürmidi.

Arqa körünüsh

Yaponiye hökümiti bolsa, xitay hökümiti bu bayanatni élan qilishtin burun yeni ötken charshenbe küni , sikaku taqim aralliridiki mayakning 1988 -yili yaponiye ongchi éqimdiki pa'aliyetchiler teripidin yasalghanliqini, shuning üchün buningdin étibaren sikaku arilidiki mezkur mayakni yaponiye déngiz qirghiqi saqchi etritining bashqurdighanliqini bildürgen idi.

Biraq xitay tashqi ishlar ministirliqining bayanatchisi kong chüen shu künila yaponiye hökümitining mayakqa ige chiqqanliq herikitini yene " inawetsiz", "qanunsiz" dep eyiplidi.

1895 -Yili yaponiye ching sulalisini meghlub qilighandin kéyin, sékaku arilini yaponiyige tewe dep élan qildi. Biraq, ikkinchi dunya urushidin kéyin amérika sikaku aralni özining igidarchiliqigha ötküzüwélip, 1972 -yili yaponiyige qayturup berdi.

1970 -Yillirigha kelgende, mezkur araldin néfit zapisi bayqaldi. Buning bilen xitay hemde teywen her ikki terep bu rayonning igidarchiliq hoquqini telep qilishqa bashlidi.

Xitayning térishchanliqi

Yuqirida tekitligen sewebler tüpeylidin, xitay bilen yaponiye arisida sürkilish meydan'gha kelgen bolup, 17 - féwral küni, xitay tashqi ishlar minisitiri li jawshing yaponiye tashqi ishlar ministiri nabutaka machimuragha téléfon urup, ikki dölet otturisidiki bu nazuk mesilini éghir bésiqliq bilen bir terep qilip, hemkarliqni kücheytish kéreklikini bildürdi.

Li jawshing sözide yene, ikki terepning sikaku ariligha igidarchiliq qilish sewebidin kélip chiqqan toqunushining, ikki dölet menpe'etige biwaste ziyan salidighanliqini alahide tekitlidi.

Ortaq istratégiyilik nishani

Xitay tashqi ishlar ministiri li jawshing, yaponiye tashqi ishlar ministiri tabutaka machimuragha téléfon urup bir kün ötkendin kéyin, yaponiyining mezkur tashqi ishlar minisitiri yaponiye mudapi'e emeldari yoshinori ono bilen 18 -féwral küni washin'gton'gha yétip keldi.

Amérikida chiqidighan "washin'gton pochta géziti" de körsitilishiche, yaponiye tashqi ishlar minisitiri nabutaka machimura, yaponiye dölet mudapi'e emeldari yoshinori ono hemde amérika tashqi ishlar minisitiri kondoliza rayis we amérika dölet mudapi'e minisitiri donald ramisféldlar birlikte teywen boghizining bixeterliki yaponiye bilen amérikining "ortaq istratégiyilik nishani" ikenlikini jakarlaydiken.

"Washin'gton pochta géziti" ning ashkarilishiche, mezkur kélishim shenbe küni resmiy yosunda élan qilinidiken.

Bu yaponiyining teywen mesiliside tunji qétim öz ipadisini éniq bildürüshi bolup, ilgiri yaponiye teywen mesiliside ipade bildürüshtin özini qachurup kelgen, bir qisim küzetküchiler "sikaku arili sewebidin yirikliship kéliwatqan xitay - yaponiye munasiwiti yenimu bir qedem nacharlishi mumkin" dep perez qilishmaqta. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.