Amérikidiki xrist'an we musulman diniy jama'etler albaniyidiki Uyghurlargha yardem qilishqa bashlidi(2)


2007-05-28
Share

Amérikining marilan shtatigha jaylashqan jermentawn shehiridiki nikolas chérkawining bash rahibi kén wurd ependim we uning jermentawn islam jem'iyitidiki dostlirining teshebbusi bilen 5‏- ayning 12‏- küni gu'entanamu türmisidin qoyup bérilip, albaniyige orunlashturulghan Uyghurlargha yardem puli yéghish pa'aliyiti ötküzüldi. Bu pa'aliyet netijiside 5000 dollar pul yighilghan bolup, bu pul yéqinda Uyghur amérika birleshmisi arqiliq albaniyidiki Uyghurlargha ewetilip bérilidiken.

Muxbirimiz ömer qanat, albaniyidiki Uyghurlargha pul yéghish pa'aliyitini teshkilligen jermentawn shehiri nikolas chérkawining bash rahibi kén wuward ependi bilen, bu pa'aliyetning asasliq meqisidi heqqide söhbet ötküzgen. Töwende bu söhbetning dawamini diqqitinglargha sunimiz.

Su'al: "hürmetlik bash rahib ependim, albaniyidiki Uyghurlargha yardem puli yéghish pa'aliyitini qaysi yerde élip bardinglar, meschittimu yaki chérkawdimu?"

Jawab: "bu pa'aliyetni biz ibadet qilidighan bir chérkawda élip barduq. Bizning chérkaw rémont qilinwatqanliqi üchün biz hazirche rayonimizdiki yene bir chérkawda ibadet qiliwatimiz. Bu pa'aliyetni élip bérish üchün jermantawndiki meschittimu , bizning chérkawmu kichik kéletti. Shunga pa'aliyetni élip bérish üchün chongraq bir chérkawning zalini ijarige alduq. Chérkawda yekshenbe küni etigen ibadet qilinidighanliqi üchün biz pa'aliyitimizni yekshenbe küni axshmigha orunlashturduq."

Su'al: "pa'aliyetke qanchilik kishi qatnashti?"

Jawab: "bu pa'aliyitimizge yüz etrapida kishi qatnashti."

Su'al: "qatnashqanlarning qanchiliki musulman qanchiliki xristi'an idi?"

Jawab: "biz ularni éniq hésablimiduq . Lékin qatnashqanlarning yüzde % 50 musulman, yüzde % 50 i xristi'an idi."

Su'al: "pa'aliyetke qatnashqan musulmanlar qaysi döletning puqraliri idi?"

Jawab: "ularning köpinchisi asasen wérjiniya shitatida yashaydighan, beziliri amérikida tughulup chong bolghan musulmanlar idi. Beziliri bolsa, dunyaning her qaysi jayliridiki musulman döletlerdin asasen banggladésh, misir, süriye, i'ordaniye, hindonéziye qatarliq döletlerdin amérikigha kélip yashawatqan kishiler idi. Mundaqche qilip éytqanda bu pa'aliyetke dunyaning barliq rayonliridin kelgen musulmanlar qatnashti dések bolidu."

Su'al: " bu bir qétimliq yardem puli yéghish pa'aliyitimu yaki albaniyidiki Uyghurlargha yardem pa'aliyiti bundin kéyinmu dawamlishamdu?"

Jawab: "biz rayonimizdiki meschit bilen qurulghan munasiwitimizni dawamlashturup, bu qétimqi yardem puli yéghish pa'aliyitide qolgha keltürgen tejribilirimizge tayinip, albaniyidiki Uyghurlargha yardem puli yéghish herikitimizni dawamlashturushni pilanlawatimiz. Her ikki terep bu qétimqi tejribilerdin paydilinishni xalaymiz. Her ikki terep bu pa'aliyetning bir qétimliq pa'aliyet bolup qilishini xalimaydu. Albaniyidiki Uyghurlar bu yerdiki chérkaw bilen meschit otturisida bir di'alog qurulushida wasitiliq rol oynidi. Biz rayondiki islam jem'iyiti bilen alaqimizni dawamlashturup, bundin kéyin albaniyidiki Uyghurlar üchün qandaq yardem pa'aliyetliri élip baridighanliqimizni pilanlap, qararlashturimiz. Musulman jem'iyitining rehberliri kéler qétmqi pa'aliyitimizni rayonimizdiki bir sinagogta élip bérishni teklip qiliwatidu. Qisqiche qilip éytqanda, bu bir qétimliq pa'aliyet emes, bu pa'aliyitimizni bundin kéyinmu üzlüksiz dawamlashturimiz."

Su'al: "hörmetlik bash rahib ependim, albaniyidiki Uyghurlar üchün yardem puli yighishtin bashqa yene bezi pa'aliyetler élip bérishni pilanlawatimiz dédingiz bu heqte bir'az melumat béremisz?"

Jawab: "bu pa'aliyetlirimiz , islam jem'iyitidikiler bilen birlikte albaniyidiki Uyghurlargha ularning rohini kötiridighan, ularni ilhamlandurudighan xetler yézip ewetish qatarliq pa'aliyetlerni öz ichige alidu."

Bash rahib ependim bergen melumatingiz üchün köp rehmet. Pa'aliyetliringizge utuq tileymiz. (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet