Yawro-asiya medeniyetliri uchrishish pa'aliyitide Uyghurlarmu muhim orunni igilidi

2011-Yili, 15-mart gollandiyining amistérdam shehiridiki bir zalda ötküzülgen, yawro-asiya medeniyetliri uchrishishida Uyghurlarmu yer aldi.
Ixtiyariy muxbirimiz pida'iy
2011.04.18
yawro-asiya-medeniyetler-uchrushishida-Uyghur-305.jpg Gollandiyidiki yawro-asiya medeniyetliri uchrishish pa'aliyitide Uyghurlarmu muhim orunni igilidi. 2011-Yili 15-mart.
RFA/Pidaiy

Pa'aliyetke Uyghur, türk, noghay, tatar qatarliq türk sistémisidiki we misir we iraq qatarliq ellerdin kelgen ereb sistémisidiki milletlerning aktipliri we teshkilatliridin bashqa, afghanistan hem bosiniyiliklermu qatnashti.

Pa'aliyet ikki qisimdin terkib tapqan bolup, birinchi qismida herqaysi milletlerning en'eniwi qol-hünerwenchiliki asas qilin'ghan türlük sowghat buyumliri, kiyim-kéchekliri we yémekliri körgezme qilindi. Ikkinchi qismida naxsha-usul we shé'ir-qoshaqliri orundilip, özgiche bir tuyghu bexsh etti. Maddiy we meniwi jehettin gireleshken türlük medeniyetlerning bir yerde jem bölishi güzel eslimilerni qaldurdi. Shu yer waqti chüshtin kéyin 6de bashlinip, 4 sa'ettin artuq dawam qilghan bu pa'aliyette ishtirakchilar öz-ara dostlashti, sowghat teqdim qilishti we xatire resimlerge chüshti.

Yawro-asiya-medeniyetler-uchrishishi-385.jpg
Gollandiyidiki yawro-asiya medeniyetliri uchrishish pa'aliyiti. 2011-Yili 15-mart.
RFA/Pidaiy

Türlük milletlerdin namayan bolghan rengdar xasliqlar arisida Uyghurlarning göshlük polusi we pétir mantisi, kanway köynekliri, etlesliri we neqishlik buyumliridin bashqa, dutar bilen orundalghan xelq naxshiliri ziyaretchilerning alqishigha sazawer boldi.

Uyghurlarni uzundin biri qollap kéliwatqan weys gün'gür ependi pa'aliyet heqqide chüshenche bérip, “Bügünki bu pa'aliyet gollandiyide yashawatqan yawro-asiya jughrapiye boshluqidin kelgen milletlerni tunji qétim bir yerge ekélishimiz bolup, ikki qisimgha bölündi.

Aldinqi qismida milliy qiyapetliri we yémekliri körgezme qilindi. Bir-biri bilen tonushush hasil qildi. Kéyinki qismida sen'et programmiliri namayan boldi.

Biz buni bundin kéyin téximu tereqqiy qildurup izchil dawamlashturushqa tirishimiz. Buningdin meqset bu qérindashlarning we bu medeniyetlerning öz-ara dostlishishini, hemkarlishishini ilgiri sürüsh we gollandiyidiki hersahe ehlilirigimu yetküzüp, bu yerdiki mewjut imkaniyetlerdin köprek paydilinishini qolgha keltürüshtur. Misal üchün bir az ilgiri afghanistanliq bir qérindishimiz teripidin oqulghan bir shé'irda afghanistandiki ösmürlerning ilim igilishi üchün depter-qelem qatarliq oqush eslihelirige éhtiyaji barliqi teswirlendi. Mana bu bizning u yerge qilishqa tégishlik yardimimizni éniqlap berdi. Uyghur qérindashlirimizmu mushundaq emeliy mesililer heqqide pilan-layihe teyyarlisa ularghimu yardem qilimiz” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.