Xitayning merkez karxaniliridin teshkillen'gen qoshun Uyghur élige kirdi

Xitayning merkez karxaniliridin 120 karxanining mes'ulliri 20-awghust ürümchige yighilip, Uyghur aptonom rayonluq hökümet we bingtu'en bilen birlikte Uyghur élide sana'et bazilirini berpa qilip, Uyghur élige kesipler boyiche yardem bérish namida ortaq kéngeshti. Buning bilen nishanliq yardem bérish nami bilen xitayning 19 ölke, sheherdiki karxanilardin bashqa yene, xitay merkizi hökümitining dölet mülkini nazaret qilip bashqurush komitéti teshkilligen 120 merkez karxaniliridin terkib tapqan yene bir zor bayliq échish qoshuni Uyghur élige resmiy yürüsh qilip kirdi.

Hazirghiche xitay merkez karxaniliri heqqide melum bolghan uchurlargha qarighanda, bu karxanilarning beziliri aldin ala Uyghur élige yerliship bolghan bolup, bultur yil axirghiche 44 merkez karxanisi Uyghur élige makanliship, néfit, néfit ximiye sana'iti, kömür, éléktr, énérgiye, métallurgiye qurulush matériyalliri qatarliq sahelerge meblegh sélip échishqa qatnashqan bolup, mülük omumiy sommisini 573 milyard 900 milyon yüen'ge yetküzgen. Xitayning 12-besh yilliq pilanida merkez karxanilirining Uyghur élige meblegh sélish kölimi 1 tirilyon yüendin ashurulidiken.

20-Awghusttiki yighindila merkez karxaniliri jem'iy 700 milyard yüen meblegh sélinidighan 90 din artuq türlerde kélishim imzalighan, kélishim boyiche bu türler 2012-yilining axirghiche ish bashlap bolidiken.

Kélishim yighinida xitay dölet ishliri kabinétining dölet mülkini nazaret qilip bashqurush komitétining mudiri wang yung merkez karxanilirigha shinjangning halqima tereqqiyatida bashlamchi we jenggiwarlargha aylinishni tapshurghan.

Uyghur aptonom rayonluq partkom sékrétari jang chünshen bolsa, aptonom rayonluq hökümet we bingtu'en hemde yerlik barliq karxanilarning merkez karxanilirining bayliq échish, teqsimlesh, kesipler boyiche yardem bérish ishlirigha yüksek ehmiyet bérip qollaydighanliqini, buning üchün nurghun étibar siyasetlirini yolgha qoyup merkezning bu istratégiyilik pilanining netijilik bolushi üchün emeliy heriket qilidighanliqini hödde qilghan.

Xitayning 5-iyul weqesidin kéyin shinjang xizmet yighini échip Uyghur élige nishanliq yardem bérish namida 19 ölke hem sheherning kan karxanilirini Uyghur élide bayliq échishqa orunlashturushi tüpeylidin türlük mesililer kélip chiqiwatqan shundaqla Uyghurlarning naraziliqi küchiyiwatqan bir peytte, xitay da'irilirining yenimu ilgiriligen halda Uyghur élining bayliq menbelirini échishqa merkez karxaniliridin qoshun teshkillep kirishi, chet'ellerdiki Uyghur pa'aliyetchiliri we ziyaliylirining Uyghurlar weziyitige bolghan endishilirini yenimu ashurmaqta.

Bu heqte ziyaritimizni qobul qilghan dunya Uyghur qurultiyining yawropa birlikidiki alaqileshküchisi memet toxti ependi we amérikidiki Uyghur pa'aliyetchi ilshat ependiler köz qarashlirini otturigha qoydi.