Америка кеңәш палатаси хитай йемәкликлириниң бихәтәрлик мәсилисини музакирә қилди

• Мухбиримиз әркинниң бу һәқтики толуқ мәлумати
• Download story audio

Ахирқи күнләрдә хитай - америка сода мунасивитидики әқлий мүлүк һоқуқи, хитай пулиниң қиммити вә сода қизил рәқими қатарлиқ әнәнивий ихтилапларға йәнә бир йеңи ихтилап қошулди. У болсиму америкиға експорт қилинидиған хитай таварлириниң бихәтәрлик мәсилисидур. Америка хитайниң тоқулма вә турмуш буюмлирини експорт қилидиған әң чоң базири болупла қалмай, йәнә йемәклик експорт қилидиған муһим базири. Шуңа експорт таварлириниң лаяқәтлик мәсилиси вә йемәкликләрниң бихәтәрлики америка дөләт мәҗлиси һәм буш һөкүмитини һәрикәткә кәлтүрмәктә. Америка дөләт мәҗлисиниң кеңәш палатаси чаршәнбә күни хитай таварлириниң бихәтәрлик мәсилиси һәққидә испат бериш йиғини чақирип, буш һөкүмитидики мунасивәтлик әмәлдарлар вә мутәхәссисләрниң пикирини алди.

Тавар маркисиға мәһсулатниң қәйәрдә ишләпчиқирилғанлиқи йезилиши керәк

Хитайниң америкиға експорт қилған таварлар вә йемәкликләрдә бихәтәрлик вә саламәтликкә пайдисиз елементларниң мәвҗут икәнлики һәққидики әндишиләр ахирқи күнләрдә буш һөкүмити вә америка кеңәш һәм авам палаталириниң диққитини қозғайдиған мәсилә болупла қалмай, җиддий тәдбир қоллиниш зөрүрийити һес қиливатқан мәсилигә айланди. Америка авам палатаси чаршәнбә күни йемәкликләр маркисиға даир бир қанун лайиһисини авазға қоюп, импорт қилинған йемәкликләр вә йемәклик хам әшялириниң тавар маркисиға мәһсулатниң қәйәрдә ишләпчиқирилғанлиқини йезиш тәләп қилинди.

Америка дөләт мәҗлисиниң авам палата әзаси роза делавро мәзкур қанун лайиһисини оттуриға қойғучи затларниң бири. Униң әскәртишичә, хитай експорт қилған таварлар кишиләр саламәтликигә тәһдит елип келиватқан әһвал астида, йемәклик вә йемәклик хам әшялириниң ишләпчиқирилған орнини билиш барғансери муһим мәсилә болуп қалмақта. Авам палатасиниң мәзкур қанун лайиһисидә хитай ашкара тилға елинмиған болсиму, лекин бу қанун лайиһиси йемәкликләрниң бихәтәрлик мәсилисидә хитай - америка арисида кәскин сүркилиш келип чиққан мәзгилдә оттуриға қоюлди.

Америка авам палата әзаси Frank Wolf алдинқи күни дөләт мәҗлисиниң омуми йиғинидики муназиридә хитайни америкиға сүпәтсиз мәһсулатларни експорт қилиш билән әйибләп, бәзи мәһсулатларға химийилик маддилар арилаштурулғанлиқини тәкитлигән. У, "хитай америкиға үзлүксиз түрдә лаяқәтсиз вә ялған марка чапланған йемәкликләрни, болупму химийилик маддилар арилашқан мевиләр, бактирийилик белиқлар, химийилик маддилар билән өстүрүлгән ишәк мәдики вә рак кесили пәйда қилғучи химийилик маддиларда қурутқан алма қеқини експорт қиливатиду " дәп көрсәтти.

Америка йемәкликләр - дора башқуруш идариси хитайдин импорт қилинған йемәкликләрни тәкшүрүшкә җиддий қаримиди

Америка йемәкликләр вә дора башқуруш идариси 7 - айниң 10 - күни хитайлар експорт қилған 5 түрлүк деңиз мәһсулатида зәһәрлик елементлар байқалғанлиқини җакарлап, бу мәһсулатларниң тутуп қелинғанлиқини вә көлдә баққан су мәһсулатлирини импорт қилиш чәклинидиғанлиқини билдүргән.

Америкиға импорт қилинған сүпитидә мәсилә бар мәһсулатларниң түри хели көп болуп, бу аптомобил балуни, күндилик буюмлар, оюнчуқлар, чиш пастиси вә һайванатлар йемәклики қатарлиқларни өз ичигә алиду. Буниң ичидә хитай експорт қилған һайванлар йемәклики америкида өй һайванлириниң өлүшини кәлтүрүп чиқарди. Америка авам палатасиниң енергийә вә сода комитети алдинқи күни чақирған бу һәқтики йәнә бир испат бериш йиғинида, америка йемәкликләр тәминатиниң бихәтәрлики вә йемәкликләр - дора башқуруш идарисиниң импорт йемәкликләрни тәкшүрүш әһвалини сүрүштүргән. Йиғинда америка йемәкликләр - дора башқуруш идариси хитайдин импорт қилинған йемәкликләрни тәкшүрүшкә җиддий қаримиди, дәп тәнқидләнди.

Җумһурийәтчи авам палата әзаси Marsha Blackburn," биз өзимизниң аҗизлиқимизни билимиз. У болсиму бизниң чәтәлдә ишләпчиқирилған мәһсулатларниң бизгә салидиған зийинидин сақлинишқа аҗизлиқ қиливатқанлиқимиздур" дәйду.

Шуниң билән биргә авам палатаси сиртида америка кеңәш палатасиниң сода, илим - пән вә транспорт комитети чаршәнбә күни америка һөкүмитиниң сәһийә вә аммивий саламәтлик органлиридики әмәлдарларни, истималчилар һоқуқини қоғдиғучи органлар һәм тәтқиқат орунлириниң хадимлирини дөләт мәҗлисидә испат беришкә чақирип, импорт мәһсулатлири болупму хитайдин импорт қилинған йемәклик вә күндилик турмуш буюмлириниң бихәтәрлики, америка пуқралириниң саламәтликигә капаләтлик қилиш мәсилисини музакирә қилди.

Йиғинда кеңәш палата әзаси Sherrod Brown ниң әскәртишичә, у, йемәк - ичмәк тәминатиниң бихәтәрликигә капаләтлик қилиш үчүн "импорт йемәкликлириниң бихәтәрлик қанун лайиһиси" тәйярлиған болуп, мәзкур қанун америка йемәкликләр - дора башқуруш идарисиниң һоқуқи вә иқтидарини күчәйтишкә қаритилған.

Балилар мәһсулатлириниң бихәтәрлик қанун лайиһиси оттуриға қоюлди

Йиғинда кеңәш палата әзаси Bill Nelson, хитайдин импорт қилинған балилар оюнчуқлириниң бихәтәрлик мәсилисини оттуриға қойди. У мундақ дәйду, " шуниси наһайити ениқки, хитай оюнчуқ карханилириниң өзлири чапливалған маркилар балиларниң бихәтәрликигә капаләтлик қилалмайду. Мән бүгүн 'балилар мәһсулатлириниң бихәтәрлик қанун лайиһиси'ни оттуриға қоймақчи.

Бу қанун буйичә балилар оюнчуқиниң бихәтәрликигә хитай һөкүмити қарар қилмаслиқи керәк. Оюнчуқларниң бихәтәр яки әмәслики тәрәпсиз хусусий бир орган тәрипидин бекитилиши лазим "дәп көрсәтти. Америка кеңәш вә авам палаталирида йеқинқи 2 - 3 күндин бери хитай мәһсулатлириниң бихәтәрлик мәсилиси кәң - көләмдә муназирә қилинмақта.

Дөләт мәҗлисиниң алдинқи күнки муназирисидә авам палата әзаси Frank Wolf, хитайни зәһәрлик мадда арилашқан чиш пастилирини оттура америка вә асия - тинч окян районидики дөләтләргә експорт қилиш билән әйибләп, "әң қорқунчлуқи хитай һөкүмитиниң өз пуқралириға зиянкәшлик қилипла қалмай, панама, доминика җумһурийити вә австиралийилик балиларни зәһәрлик мадда арилашқан чиш пастисида зәһәрлигәнлики" дәп көрсәтти.

Америка президент ишханиси импорт мәһсулатлириниң бихәтәрликигә капаләтлик қилиш хизмәт гурупписи қурмақчи

Америкиниң - 4 июлдики дөләт байримини тәбрикләш паалийитидә етилған салийотларниң хитайда ишләпчиқирилғанлиқини тәкитлигән Frank Wolf, "мениң юртум вирҗинийиниң вийәна қатарлиқ шәһәрлиридики 4 - июлни тәбрикләш паалийәтлиридә, хитайда ишләпчиқирилған сүпәтсиз салийотлар сәвәбидин арисида балилар болуп 11 адәм яриланди" дәйду.

Америка кеңәш вә авам палаталириниң бесими ахири буш һөкүмитини експорт мәһсулатлириниң бихәтәрлик мәсилисидә тәдбир елишқа мәҗбур қилди. Америка президент ишханиси ақсарай, чаршәнбә күни америкиға импорт қилинидиған мәһсулатларниң бихәтәрликигә капаләтлик қилиш хизмәт гурупписи қурмақчи болуватқанлиқини җакарлап, бу гуруппиға америка сәһийә министири левитниң назарәтчилик қилидиғанлиқини елан қилди.

Ақсарайниң баянатчиси тонй снов бу һәқтики баянатида, "һөкүмәт америка хәлқи йәйдиған вә ишлитидиған импорт мәһсулатлириниң бихәтәрликигә диққәт қилмақта шундақла биз, бу җәһәттики сақлиниватқан конкрет мәсилиләрни һәл қилмақчимиз " дәп көрсәтти. Лекин тонй снов, бу тәдбирниң хитайға қаритилғанлиқини рәт қилип, "бу хизмитимизниң нормал бир қисими. Биз дунядики 150 дөләттин йемәклик мәһсулатлирини сетивалимиз. Буларни күзитиш биз үчүн муһим әһмийәткә игә, " дәйду.

Хитай америкиниң дунядики әң чоң сода шерики болуп, импорт мәһсулатлириниң бихәтәрлик мәсилисидики ихтилаплар икки дөләтниң сода һәҗими 350 милярд доллардин ашидиған сода мунасивитигә тәһдит салмақта. Хитай дөләтлик өлчәм вә сүпәт тәкшүрүш идарисиниң юқири дәриҗилик бир әмәлдари, йеқинда америка мәтбуатлирини хитайниң експорт мәһсулатлирида көрүлгән айрим мәсилиләрни принсипқа көтүрүп хәвәр қилиш билән әйиблигән. (Әркин)