Amérika kéngesh palatasi xitay yémekliklirining bixeterlik mesilisini muzakire qildi

• Muxbirimiz erkinning bu heqtiki toluq melumati
• Download story audio

Axirqi künlerde xitay - amérika soda munasiwitidiki eqliy mülük hoquqi, xitay pulining qimmiti we soda qizil reqimi qatarliq en'eniwiy ixtilaplargha yene bir yéngi ixtilap qoshuldi. U bolsimu amérikigha éksport qilinidighan xitay tawarlirining bixeterlik mesilisidur. Amérika xitayning toqulma we turmush buyumlirini éksport qilidighan eng chong baziri bolupla qalmay, yene yémeklik éksport qilidighan muhim baziri. Shunga éksport tawarlirining layaqetlik mesilisi we yémekliklerning bixeterliki amérika dölet mejlisi hem bush hökümitini heriketke keltürmekte. Amérika dölet mejlisining kéngesh palatasi charshenbe küni xitay tawarlirining bixeterlik mesilisi heqqide ispat bérish yighini chaqirip, bush hökümitidiki munasiwetlik emeldarlar we mutexessislerning pikirini aldi.

Tawar markisigha mehsulatning qeyerde ishlepchiqirilghanliqi yézilishi kérek

Xitayning amérikigha éksport qilghan tawarlar we yémekliklerde bixeterlik we salametlikke paydisiz éléméntlarning mewjut ikenliki heqqidiki endishiler axirqi künlerde bush hökümiti we amérika kéngesh hem awam palatalirining diqqitini qozghaydighan mesile bolupla qalmay, jiddiy tedbir qollinish zörüriyiti hés qiliwatqan mesilige aylandi. Amérika awam palatasi charshenbe küni yémeklikler markisigha da'ir bir qanun layihisini awazgha qoyup, import qilin'ghan yémeklikler we yémeklik xam eshyalirining tawar markisigha mehsulatning qeyerde ishlepchiqirilghanliqini yézish telep qilindi.

Amérika dölet mejlisining awam palata ezasi roza délawro mezkur qanun layihisini otturigha qoyghuchi zatlarning biri. Uning eskertishiche, xitay éksport qilghan tawarlar kishiler salametlikige tehdit élip kéliwatqan ehwal astida, yémeklik we yémeklik xam eshyalirining ishlepchiqirilghan ornini bilish barghanséri muhim mesile bolup qalmaqta. Awam palatasining mezkur qanun layihiside xitay ashkara tilgha élinmighan bolsimu, lékin bu qanun layihisi yémekliklerning bixeterlik mesiliside xitay - amérika arisida keskin sürkilish kélip chiqqan mezgilde otturigha qoyuldi.

Amérika awam palata ezasi Frank Wolf aldinqi küni dölet mejlisining omumi yighinidiki munaziride xitayni amérikigha süpetsiz mehsulatlarni éksport qilish bilen eyiblep, bezi mehsulatlargha ximiyilik maddilar arilashturulghanliqini tekitligen. U, "xitay amérikigha üzlüksiz türde layaqetsiz we yalghan marka chaplan'ghan yémekliklerni, bolupmu ximiyilik maddilar arilashqan méwiler, baktiriyilik béliqlar, ximiyilik maddilar bilen östürülgen ishek mediki we rak késili peyda qilghuchi ximiyilik maddilarda qurutqan alma qéqini éksport qiliwatidu " dep körsetti.

Amérika yémeklikler - dora bashqurush idarisi xitaydin import qilin'ghan yémekliklerni tekshürüshke jiddiy qarimidi

Amérika yémeklikler we dora bashqurush idarisi 7 - ayning 10 - küni xitaylar éksport qilghan 5 türlük déngiz mehsulatida zeherlik éléméntlar bayqalghanliqini jakarlap, bu mehsulatlarning tutup qélin'ghanliqini we kölde baqqan su mehsulatlirini import qilish cheklinidighanliqini bildürgen.

Amérikigha import qilin'ghan süpitide mesile bar mehsulatlarning türi xéli köp bolup, bu aptomobil baluni, kündilik buyumlar, oyunchuqlar, chish pastisi we haywanatlar yémekliki qatarliqlarni öz ichige alidu. Buning ichide xitay éksport qilghan haywanlar yémekliki amérikida öy haywanlirining ölüshini keltürüp chiqardi. Amérika awam palatasining énérgiye we soda komitéti aldinqi küni chaqirghan bu heqtiki yene bir ispat bérish yighinida, amérika yémeklikler teminatining bixeterliki we yémeklikler - dora bashqurush idarisining import yémekliklerni tekshürüsh ehwalini sürüshtürgen. Yighinda amérika yémeklikler - dora bashqurush idarisi xitaydin import qilin'ghan yémekliklerni tekshürüshke jiddiy qarimidi, dep tenqidlendi.

Jumhuriyetchi awam palata ezasi Marsha Blackburn," biz özimizning ajizliqimizni bilimiz. U bolsimu bizning chet'elde ishlepchiqirilghan mehsulatlarning bizge salidighan ziyinidin saqlinishqa ajizliq qiliwatqanliqimizdur" deydu.

Shuning bilen birge awam palatasi sirtida amérika kéngesh palatasining soda, ilim - pen we transport komitéti charshenbe küni amérika hökümitining sehiye we ammiwiy salametlik organliridiki emeldarlarni, istimalchilar hoquqini qoghdighuchi organlar hem tetqiqat orunlirining xadimlirini dölet mejliside ispat bérishke chaqirip, import mehsulatliri bolupmu xitaydin import qilin'ghan yémeklik we kündilik turmush buyumlirining bixeterliki, amérika puqralirining salametlikige kapaletlik qilish mesilisini muzakire qildi.

Yighinda kéngesh palata ezasi Sherrod Brown ning eskertishiche, u, yémek - ichmek teminatining bixeterlikige kapaletlik qilish üchün "import yémekliklirining bixeterlik qanun layihisi" teyyarlighan bolup, mezkur qanun amérika yémeklikler - dora bashqurush idarisining hoquqi we iqtidarini kücheytishke qaritilghan.

Balilar mehsulatlirining bixeterlik qanun layihisi otturigha qoyuldi

Yighinda kéngesh palata ezasi Bill Nelson, xitaydin import qilin'ghan balilar oyunchuqlirining bixeterlik mesilisini otturigha qoydi. U mundaq deydu, " shunisi nahayiti éniqki, xitay oyunchuq karxanilirining özliri chapliwalghan markilar balilarning bixeterlikige kapaletlik qilalmaydu. Men bügün 'balilar mehsulatlirining bixeterlik qanun layihisi'ni otturigha qoymaqchi.

Bu qanun buyiche balilar oyunchuqining bixeterlikige xitay hökümiti qarar qilmasliqi kérek. Oyunchuqlarning bixeter yaki emesliki terepsiz xususiy bir organ teripidin békitilishi lazim "dep körsetti. Amérika kéngesh we awam palatalirida yéqinqi 2 - 3 kündin béri xitay mehsulatlirining bixeterlik mesilisi keng - kölemde munazire qilinmaqta.

Dölet mejlisining aldinqi künki munaziriside awam palata ezasi Frank Wolf, xitayni zeherlik madda arilashqan chish pastilirini ottura amérika we asiya - tinch okyan rayonidiki döletlerge éksport qilish bilen eyiblep, "eng qorqunchluqi xitay hökümitining öz puqralirigha ziyankeshlik qilipla qalmay, panama, dominika jumhuriyiti we awstiraliyilik balilarni zeherlik madda arilashqan chish pastisida zeherligenliki" dep körsetti.

Amérika prézidént ishxanisi import mehsulatlirining bixeterlikige kapaletlik qilish xizmet guruppisi qurmaqchi

Amérikining - 4 iyuldiki dölet bayrimini tebriklesh pa'aliyitide étilghan saliyotlarning xitayda ishlepchiqirilghanliqini tekitligen Frank Wolf, "méning yurtum wirjiniyining wiyena qatarliq sheherliridiki 4 - iyulni tebriklesh pa'aliyetliride, xitayda ishlepchiqirilghan süpetsiz saliyotlar sewebidin arisida balilar bolup 11 adem yarilandi" deydu.

Amérika kéngesh we awam palatalirining bésimi axiri bush hökümitini éksport mehsulatlirining bixeterlik mesiliside tedbir élishqa mejbur qildi. Amérika prézidént ishxanisi aqsaray, charshenbe küni amérikigha import qilinidighan mehsulatlarning bixeterlikige kapaletlik qilish xizmet guruppisi qurmaqchi boluwatqanliqini jakarlap, bu guruppigha amérika sehiye ministiri léwitning nazaretchilik qilidighanliqini élan qildi.

Aqsarayning bayanatchisi tony snow bu heqtiki bayanatida, "hökümet amérika xelqi yeydighan we ishlitidighan import mehsulatlirining bixeterlikige diqqet qilmaqta shundaqla biz, bu jehettiki saqliniwatqan konkrét mesililerni hel qilmaqchimiz " dep körsetti. Lékin tony snow, bu tedbirning xitaygha qaritilghanliqini ret qilip, "bu xizmitimizning normal bir qisimi. Biz dunyadiki 150 dölettin yémeklik mehsulatlirini sétiwalimiz. Bularni küzitish biz üchün muhim ehmiyetke ige, " deydu.

Xitay amérikining dunyadiki eng chong soda shériki bolup, import mehsulatlirining bixeterlik mesilisidiki ixtilaplar ikki döletning soda hejimi 350 milyard dollardin ashidighan soda munasiwitige tehdit salmaqta. Xitay döletlik ölchem we süpet tekshürüsh idarisining yuqiri derijilik bir emeldari, yéqinda amérika metbu'atlirini xitayning éksport mehsulatlirida körülgen ayrim mesililerni prinsipqa kötürüp xewer qilish bilen eyibligen. (Erkin)