Gherb metbu'atliri xitayni yémeklikler bixeterliki sistémisini yaxshilashqa mejburlimaqta

• Muxbirimiz méhribanning bu heqtiki toluq melumati
• Download story audio

Xitaydin import qiliniwatqan yémekliklerde, zeherlik maddilar terkibi bar ikenliki ispatlan'ghandin kéyin, gherb metbu'atlirida nurghunlighan tenqidiy maqaliler élan qilindi. Istémalchilar bolsa özlirining bu heqtiki qattiq naraziliqini ipadilimekte.Lékin béyjing hökümiti xitaydiki yémeklikler bixeterliki sistémisini yaxshilashta, ta hazirghiche kishini qayil qilalighudek ünümlük chare tedbirlerni qollanmighan.

Xitaydin amérikigha import qiliniwatqan haywanatlar yémeklikide zeherlik maddilar terkibi bolghanliqtin , yéqinda mezkur jaydiki nurghunlighan öy haywanlirining ölüshini keltürüp chiqarghan. Amérika metbu'atlirida bériliwatqan bu heqtiki uchurlar mezkur jaydiki xelqning qattiq diqqitini qozghash bilen bir waqitta, xitayning yémeklikler bixeterlik sistémisigha bolghan naraziliqi téximu kücheymekte.

Amérika awazi radi'osining xewerler tor bétide béyjing hökümitining xitaydiki yémeklikler bixeterliki sistémisini yaxshilash mesiliside, ta hazirghiche kishini qayil qilalighudek ünümlük chare tedbirlerni qollanmaywatqanliqi hemde istémalchilarning bu heqtiki qattiq naraziliqliri otturigha qoyulmaqta.

Hazirning özide shimaliy amérika rayonliridiki nechche yüzligen öy haywanliri xitaydin import qilin'ghan haywanatlar yémeklikidin zeherlinip ölgen. Amérika we yawrupa birliki xitayning yémeklikler bixeterliki sistémisidin intayin narazi bolup, béyjing hökümitini mezkur sistémini yaxshilashqa chaqirmaqta.

Xitayning yémek ‏-ichmeklerni nazaret qilish sistémisi bekmu arqida qalghan

Yéqinda dominika jumhuryitige xitaydin import qilin'ghan nechche minglighan chish pastisida insan hayatigha xewp élip kélidighan ximiyiwiy madda barliqi bayqalghan. Seyshenbe küni dominika hökümet da'iriliri dukanlardiki xitaydin import qilin'ghan barliq chish pastilirining hemmisini yoq qilish buyruqini chüshürgen hemde munasiwetlik orunlarni bu heqte mexsus tekshürüsh élip bérishqa chaqirghan.

Béyjing yéza igilik uniwérsitétining proféssori xu shiyawsung ependi gherb metbu'atlirining bésimi tüpeyli, xitayning yémeklikler bixeterlik bashqurush organliri yémeklik ishlepchiqirishqa bolghan nazaret qilish küchini ilgirikige qarighanda bir qeder kücheytiwatqanliqini bildürdi. Lékin uning bildürüshiche, xitaydiki yémeklik ishlepchiqirishini nazaret qilish sistémisi yenila arqida qalghanliqtin , ünümning yaxshi bolushi mumkin bolmighan.

Uning üstige, xitaydiki yerlik hökümetlerning mezkur mesilige bolghan inkasi bekmu asta bolup, nazaret qilish muhiti yoq diyerlik halette qalghan. Bundaq ehwal astida, herqaysi nahiye we yézilardiki chong -kichik yémek -ichmek zawutlirida ishlepchiqirilghan yémekliklerge kapaletlik qilish hergizmu mumkin emes iken.

Tashqi dunya xitayning yémeklikler bixeterliki mesiliside qollanmaqchi boluwatqan chare -tedbirlirige guman bilen qarimaqta

Deslepte ,xitaydin import qilin'ghan zeherlik yémeklikler tüpeyli kélip chiqqan hadisiler yéngi ashkarilan'ghan mezgilide, xitay da'iriliri tashqi dunyagha " bu peqet bir qisim qanunsiz qurulghan zawutlar teripidin ishlepchiqirilghan yémeklikler bolup, munasiwetlik orunlar bu heqte bir yürüsh chare - tedbirlerni qollanmaqta" dep bildürgen.

Gherb döletlirining bu heqtiki naraziliqining küchiyishi we shundaqla gherb metbu'atlirinng qattiq tenqidi tüpeylidin, seyshenbe küni xitay hökümiti bixeter yémeklik mesiliside, nazaret qilish ölchimini örlitish, tüzümge xilapliq qilghuchilargha jerimane qoyush qatarliq qattiq wastilarni qollanmaqchi boluwatqanliqini bildürgen. Lékin mutexessisler, xitay hökümitining bu xil chare -tedbirlerni qollinish arqiliq, xitaydiki yémeklikler bixeterliki mesilisini hel qilalishigha guman bilen qarimaqta.

Chünki, xitay hökümiti bu heqtiki uchurlarni ta hazirghiche izchil halda qattiq kontrol qilip kelgen. Mesilen, yéqinda xitay hökümiti bir yaqtin amérika yémeklikler tekshürüsh ömikining xitaygha bérip tekshürüsh élip bérishigha maqul bolghan bolup, yene bir tereptin xitaygha barghan tekshürüsh ömigidikilerning mezkur jaydiki munasiwetlik shirket xadimliri bilen biwaste süzlishish yaki körüshüshige ruxset qilmighan.

Yéqinda, xitay kündilik gézitide élan qilin'ghan bir maqalide, xitayning yémeklikler bixeterlik bashqurush organlirining mes'uliyetsizlik qilmishliri qattiq tenqidlen'gen hemde xelq'ara jem'iyetni bu xil ehwalgha yéqindin köngül bölüshke chaqirghan.

Mutexessisler yémeklikler bixeterliki mesiliside xitay hökümitini metbu'atni échiwétishke chaqirmaqta

Xongkung pen ‏- téxnika uniwérsitétining xitay xelq'ara munasiwet merkizining mudiri déywid ependi xitay hökümitining chet'ellerge ékisport qilin'ghan saxta we zeherlik yémeklikler heqqidiki uchurlarni tosuwatqanliqi heqqide toxtilip, " béyjing hökümiti xewer tekshürüsh tüzümini yoq qilip, uchur yollirini pütünley échiwétishi kérek, ammidin heqiqetni yoshurmay, hemmini ehwalning hemmisini ashkarilishi kérek. Shundaq qilghandila saxta we zeherlik yémekliklerning ékisport qilinishini tosup qalghili bolidu" dep bildürdi.

Nyuyork waqit gézitide bérilgen bu heqtiki melumatta körsitilishiche, gerche xitaydin import qilin'ghan zeherlik yémeklikler heqqidiki xewerler amérikida zor ghulghula qozghighan bolsimu, xitayda, köp sandiki kishiler ta hazirghiche buningdin toluq xewerdar bolmighan. Chünki xitay teshwiqat ministirliqi bir mezgil bu heqte xelqqe héchqandaq melumat bermeslik heqqide buyruq qilghan.

Bu hepte amérikida ötküzülgen xitay ‏- amérika iqtisadi istratégiye dé'alogida, amérika yéza igilik ministérliqining bashliqi joné ependi xitaydiki yémeklikler bixeterliki mesilisini yene bir qétim otturigha qoyup, amérika dölet mejlisi we amérika istimalchilirining mezkur mesilide intayin zor endishide qéliwatqanliqini bildürgen.(Méhriban)