Amérikidiki Uyghurlar yéngi yilni tebriklidi

• Muxbirimiz shöhret hoshurning bu heqtiki toluq melumati
• Download story audio

Amérikidiki Uyghurlar tünügün yeni 31 ‏- dékabir küni kechte, amérikining wirjiniye ishtatining aléksandiriye shehiride yéngi yilni tebriklep pa'aliyet ötküzdi. Pa'aliyetke, amérikining herqaysi shitatliridin bolup, 200 din artuq kishi qatnashti. Pa'aliyetni amérika Uyghur jem'iyiti uyushturdi.

Her qétimliq yéngi yilni kütüwélish pa'aliyiti chet'eldiki Uyghurlar üchün öz ‏- ara uchrishish we hal sorushush pursiti bolup qalmay, bir yilliq siyasiy we milliy pa'aliyetliridin xulase chiqirish, yéngi bir yilliq xizmetler üchün küch we ilham élish pursitidur. Bu qétimqi pa'aliyette söz qilghan, Uyghur milliy herikitining yolbashchisi rabiye qadir xanim, aldi bilen weten ichide, Uyghur milliy herikitining bügünki tereqqiyatigha ul salghan shéhitlerni eslep ötti, shéhid we mehbus a'ililirige hörmet bildürdi. Arqidin, ötken bir yil ichide, milliy herikette ishlen'gen xizmetlerning muhim nuqtilirini tilgha aldi.

Pa'aliyette, pa'aliyetke qatnashqan balilar, yashlar we anilar özliri teyyarlighan sen'et nomurlirini körsetti. Yashlar teyyarlighan sen'et nomurida, sherqi türkistan musteqilliq kürishi yolida, qolgha élin'ghan bir mehbusning, jaza meydanidiki jesur we merdane qiyapiti sehnileshtürülüp, tamashibinlarning qizghin alqishigha érishti.

Bu nomurda rol alghan yash shepqet shawket, xitay türmiside dadisining 10 yil, chong dadisining 20 yil yatqanliqini, ularning éghizidin sherqi türkistan inqilab tarixi we türme hékayilirini anglap chong bolghanliqini, shunga özining mehbuslarning rohiy dunyasini chüshinidighanliqini, ghayisiningmu weten - millet xizmitige yaramliq insan bolup yétiship chiqish ikenlikini bildürdi.

Yéngi yil kéchilikige qatnashqan abdulla ependi, yéngi yil kéchiliki tesirati heqqide toxtilip ötti.

Rabiye qadir xanim yéngi yil kéchilikidiki sözide, dunya Uyghur qurultiyining, 2008 ‏- yili, téximu japaliq xizmet élip baridighanliqini bildürüp ötti. (Shöhret hoshur)