'Йеңисарда деһқан болмақ тәс' (2)

Һеким сийит тәйярлиған шикайәт филимидә баян қилинишичә, йеңисар наһийилик һөкүмәт деһқанларға өзи халимиған, әқлидин өтмигән териқчилиқ пиланини мәҗбурий таңғандин башқа, мәҗбурий һалда банкидин қәрз алдурған.
Мухбиримиз шөһрәт һошур
2009-01-09
Share
Dixan-awazi-yengisar-305 'Йеңисарда деһқан болмақ тәс' син - алғусидин елинған бу сүрәттә, йеңисарлиқ уйғур деһқанлири өзлириниң шикайәтнамисини оқуватқан көрүнүш.
Оқурмәнлиримиз әвәткән 'йеңисарда деһқан болмақ тәс' намлиқ син - алғудин елинди.

Деһқанлар қәрз алған пуллирини өзлири хәҗләш һоқуқиға игә болмиған; улар қәрз алған пулниң һәммини яки бир қисмини кәнт мәсуллириға тапшурған. Кәнт мәсуллири бу пул һесабиға териқчилиқ материяллирини тәминлигән.

Йәни парникқа керәклик пластик, химийиви дора, уруқлуқ қатарлиқ материяллирини өзлири таллап вә баһа талишип сетивелиш һоқуқидин мәһрум қалдурулған.

Наһийә деһқанлириға мәҗбурий сетилған пластик, химийиви дора, парник йотқини қатарлиқ нәччә милйон йүәнлик мәһсулатниң хитайниң ички өлкилиридә ишләпчиқирилғанлиқи ениқ!

Бу йәрдә партком секретари йи шяв ляңниң ойлаватқини йеңисар деһқанлириниң мәнпәәтиму яки хитай фабрикичиларниң мәнпәәтиму? әгәр йеңисар деһқанлириниң мәнпәәти үчүн болса, немә үчүн бир қетим чоң зиянға учриған җаңду териш пилани йеңисар деһқанлириға тәкрар теңилиду? нөвәттә мана бу соалниң җаваби мәҗһул.

Деһқанларниң төвәндики пәрядлири мәйли наһийә, мәйли вилайәт, мәйли аптоном район , мәйли мәркизи һөкүмәтниң диққитини тартмиған.

2000 Йүән қәрзгә боғулған бир мейип деһқан, қәрзни қайтуруш үчүн мәктәптә оқуватқан икки қизини мәктәптин чиқиривелишқа вә бу икки қизи яқа юртларда пахта теритишқа мәҗбур болған.

Бу чағда йәнә , кәнт кадирлири кәнтниң маарип хизмитиниң баһалинишиға сәлбий тәсир көрситиду дәп қарап мәзкур деһқанни қизини тепишқа мәҗбурлиған. Деһқан сорақ вә тутқун қилиништин қорқуп, 24 күн өйигә қайталмиған, талада қонған.

Уйғур деһқанлири мана мушундақ дәртләр билән пәряд чекиватқан күнләрдә, үрүмчидә хәлқ қурултийи вә сиясий кеңәштин ибарәт икки йиғин ечилмақта.

Нур бәкри йиғинда, муқимлиқни тәкитлимәктә вә һәр дәриҗилик органларни  үч хил күчләргә зәрбә беришкә чақирмақта.

Уйғур деһқанлириға зиян селиватқан "үч хил күч" му яки чирик әмәлдарларму? мана бу соални қоюш хәлқ вәкиллириниң немә үчүн есигә кәлмәйду? рәис нур бәкриниң йи шявляңға охшаш хәлқни зиянға учратқан партком секритарлиридин һесаб сориғидәк һоқуқи йоқму яки җасарити йоқму?

Мана бу, йеңисар деһқанлириниң шикайити тор бәтләрдә елан қилинғандин кейин, филимни көргүчиләр оттуриға қоюватқан соаллардур.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт