'Yéngisarda déhqan bolmaq tes' (2)

Hékim siyit teyyarlighan shikayet filimide bayan qilinishiche, yéngisar nahiyilik hökümet déhqanlargha özi xalimighan, eqlidin ötmigen tériqchiliq pilanini mejburiy tangghandin bashqa, mejburiy halda bankidin qerz aldurghan.
Muxbirimiz shöhret hoshur
2009-01-09
Share
Dixan-awazi-yengisar-305 'Yéngisarda déhqan bolmaq tes' sin - alghusidin élinghan bu sürette, yéngisarliq uyghur déhqanliri özlirining shikayetnamisini oquwatqan körünüsh.
Oqurmenlirimiz ewetken 'yéngisarda déhqan bolmaq tes' namliq sin - alghudin élindi.

Déhqanlar qerz alghan pullirini özliri xejlesh hoquqigha ige bolmighan؛ ular qerz alghan pulning hemmini yaki bir qismini kent mes'ullirigha tapshurghan. Kent mes'ulliri bu pul hésabigha tériqchiliq matériyallirini teminligen.

Yeni parnikqa kéreklik plastik, ximiyiwi dora, uruqluq qatarliq matériyallirini özliri tallap we baha taliship sétiwélish hoquqidin mehrum qaldurulghan.

Nahiye déhqanlirigha mejburiy sétilghan plastik, ximiyiwi dora, parnik yotqini qatarliq nechche milyon yüenlik mehsulatning xitayning ichki ölkiliride ishlepchiqirilghanliqi éniq!

Bu yerde partkom sékrétari yi shyaw lyangning oylawatqini yéngisar déhqanlirining menpe'etimu yaki xitay fabrikichilarning menpe'etimu? eger yéngisar déhqanlirining menpe'eti üchün bolsa, néme üchün bir qétim chong ziyan'gha uchrighan jangdu térish pilani yéngisar déhqanlirigha tekrar téngilidu? nöwette mana bu so'alning jawabi mejhul.

Déhqanlarning töwendiki peryadliri meyli nahiye, meyli wilayet, meyli aptonom rayon , meyli merkizi hökümetning diqqitini tartmighan.

2000 Yüen qerzge boghulghan bir méyip déhqan, qerzni qayturush üchün mektepte oquwatqan ikki qizini mekteptin chiqiriwélishqa we bu ikki qizi yaqa yurtlarda paxta téritishqa mejbur bolghan.

Bu chaghda yene , kent kadirliri kentning ma'arip xizmitining bahalinishigha selbiy tesir körsitidu dep qarap mezkur déhqanni qizini tépishqa mejburlighan. Déhqan soraq we tutqun qilinishtin qorqup, 24 kün öyige qaytalmighan, talada qon'ghan.

Uyghur déhqanliri mana mushundaq dertler bilen peryad chékiwatqan künlerde, ürümchide xelq qurultiyi we siyasiy kéngeshtin ibaret ikki yighin échilmaqta.

Nur bekri yighinda, muqimliqni tekitlimekte we her derijilik organlarni  üch xil küchlerge zerbe bérishke chaqirmaqta.

Uyghur déhqanlirigha ziyan séliwatqan "üch xil küch" mu yaki chirik emeldarlarmu? mana bu so'alni qoyush xelq wekillirining néme üchün ésige kelmeydu? re'is nur bekrining yi shyawlyanggha oxshash xelqni ziyan'gha uchratqan partkom sékritarliridin hésab sorighidek hoquqi yoqmu yaki jasariti yoqmu?

Mana bu, yéngisar déhqanlirining shikayiti tor betlerde élan qilin'ghandin kéyin, filimni körgüchiler otturigha qoyuwatqan so'allardur.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet