Һөкүмәтниң деһқанларниң йерини мәҗбурий тартивилиши нәтиҗисидә бир хитай деһқан өзини өлтүрүвалған


2005-07-26
Share

21 - Июл пәйшәнбә күни, лявниң өлкиси вафаңдиәндики шинчең санаәт районида йүргүзүлгән, һөкүмәт мәмурий қанунини иҗра қилиш әтритиниң аһалиларниң йерини мәҗбури тартивилиш һәрикити җәрянида, 61 яшлиқ җо фаҗи өз өйиниң алдиға тикилгән үзүм теки астида өзини партлитип өлүвалған.

25 - Июл күни биз, шинчең кәнти санаәт районини идарә қилиш оргиниға телефон урдуқ . Мәзкур орундики хадим , һөкүмәтниң бу һәрикәтни мәҗбурий йосунда елип бармиғанлиқини ейтип " бу иш һечқачан мәҗбурий елип берилмиди, җу фаҗи өзиниң үзүм теки астида өзини өлтүрүвалди, у немишқа өзини өлтүрүвалди , бу намәлум , шуңа һазир җамаәт хәвпсизлик идариси вәқәни тәкшүриватиду, вәқә йүз бәргәндә әтрапта һечқандақ адәм йоқ иди" деди.

Бирақ, җу фаҗиниң килини лю шуҗен бизгә вәқә җәрянини ениқ ейтип " әттигәндә биз үзүмлүктә ишләвататтуқ, туюқсиз дадам бизниң йенимизға келип, бүгүн йәрлиримизни биздин тартивалидикән, деди. Узун өтмәйла һөкүмәт мәмурий қануний башқуруш әтритидикиләр келип, дадамни уруп кәтти"

Лю шуҗен, бизниң " қейниатиңизни улар урғанда әтрапта гуваһчилар бармиди ? дигән суалимизға җавап берип: " әлвәттә , әтрапта бизниң кәнттики нурғун адәм бар иди, һәтта улар дадимизниң мәйдисигә қаттиқ дәссиди , бу сәвәптин униң кийимлири йиртилип кетипту, таяқ йигән дадам өйгә қайтип кирип, андин кейин йәнә чиқип кәтти, " гум" қилған бир аваздин кейин қейин анам өйдин йүгрәп сиртқа чиқип қариса, мәмурий башқуруш әтритиниң адәмлири һәммиси йүгригән пети қечип кетипту, қейни анам һушидин кәтти, әгәр сиз нәқ мәйданға келип көрсиңиз наһайити ечинишлиқ мәнзирини көрисиз, қейни атамниң қоллири үзүлүп кетипту"

Вафаңдиән мәмурий башқуруш әтритиниң бир мәсули бу һәқтә тохтулуп, һәрикәтниң һечқачан мәҗбурий елип берилмиғанлиқини вә адәм уруш вәқәси йүз бәрмигәнликини ейтип мундақ диди: " кимни уруптуқ, ким силәргә шундақ дәйду? биз униң һечнәрсисигә чеқилмидуқ, һечнәрсисини өривәтмидуқ , бу иш һечқачан мәҗбурий елип берилмиди"

Лекин, кәнттики йәнә бир адәм бизгә, һөкүмәтниң йәрләрни тартивилиш җәрянида, давамлиқ қара җәмийәт күчлирини ишқа салидиғанлиқини, уларниң кәнттикиләрни қаттиқ урғанлиқини ашкарилиди. Бу киши йәнә, өткән йили қишта кәнт аһалиси әһвални әрз қилиш үчүн бейҗиңға бармақчи болғанда, пойиз истансисида зораванлиқ билән тосқунлуққа учриғанлиқини, һәтта қанун органлириниң кийимини кийгән һөкүмәт хадимлириниң бир қисим кәнт аһалисиниң пут - қоллирини гурҗәк, җоту билән уруп сундуривәткәндин кейин кәнткә қайтуруп елип кәлгәнликини ашкарилиди.

Җу фаҗениң килини, лю шуҗениң ейтишичә , уларниң аилисидикиләр тиккән үзүм тәклиригә 4 йилдин ашқан болуп, әслидә һөкүмәт һәр бир түп үзүм текигә 100 йүән төләм төләшни бекиткән болсиму, бирақ мәмурий қанун иҗра қилиш әтрити һәр бир тәккә аран 20 йүән пул берип, 80 йүән пулни бәрмигән , буниң билән җу фаҗе мәмурий қанун иҗра қилиш әтритигә берип , өзиниң рази болмиғанлиқини ейтқан . Лю шуҗениң билдүрүшичә , әслидә һөкүмәт уларға 310 миң йүән төләм төлиши керәк болсиму , әмма аран 140 миң йүән бәргән.

Кәнттики йәнә бир нәпәр аял бизниң зияритимизни қобул қилип, кәнттикиләрниң интайин қорқуп кәткәнликини, әгәр ким йәрлирини беришкә қошулмиса , һөкүмәтниң дәрһал қара җәмийәт гуруһини ишқа селип кәнттикиләрни әдәпләйдиғанлиқини, ким қарши чиқса, шуниң пут - қоли сунуп , бир қанчә ай азап тартидиғанлиқини ейтти.

Хитайда , хәлқниң йерини мәҗбурий тартивилиш қилмиши барғансири көпийип,буниң нәтиҗисидә қаршилиқ һәрикәтлириму әвҗ алмақта .(Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт