Hökümetning déhqanlarning yérini mejburiy tartiwilishi netijiside bir xitay déhqan özini öltürüwalghan


2005.07.26
Share on WhatsApp
Share on WhatsApp

21 - Iyul peyshenbe küni, lyawning ölkisi wafangdi'endiki shinchéng sana'et rayonida yürgüzülgen, hökümet memuriy qanunini ijra qilish etritining ahalilarning yérini mejburi tartiwilish herikiti jeryanida, 61 yashliq jo faji öz öyining aldigha tikilgen üzüm téki astida özini partlitip ölüwalghan.

25 - Iyul küni biz, shinchéng kenti sana'et rayonini idare qilish orginigha téléfon urduq . Mezkur orundiki xadim , hökümetning bu heriketni mejburiy yosunda élip barmighanliqini éytip " bu ish héchqachan mejburiy élip bérilmidi, ju faji özining üzüm téki astida özini öltürüwaldi, u némishqa özini öltürüwaldi , bu namelum , shunga hazir jama'et xewpsizlik idarisi weqeni tekshüriwatidu, weqe yüz bergende etrapta héchqandaq adem yoq idi" dédi.

Biraq, ju fajining kilini lyu shujén bizge weqe jeryanini éniq éytip " ettigende biz üzümlükte ishlewatattuq, tuyuqsiz dadam bizning yénimizgha kélip, bügün yerlirimizni bizdin tartiwalidiken, dédi. Uzun ötmeyla hökümet memuriy qanuniy bashqurush etritidikiler kélip, dadamni urup ketti"

Lyu shujén, bizning " qéyni'atingizni ular urghanda etrapta guwahchilar barmidi ? digen su'alimizgha jawap bérip: " elwette , etrapta bizning kenttiki nurghun adem bar idi, hetta ular dadimizning meydisige qattiq dessidi , bu seweptin uning kiyimliri yirtilip kétiptu, tayaq yigen dadam öyge qaytip kirip, andin kéyin yene chiqip ketti, " gum" qilghan bir awazdin kéyin qéyin anam öydin yügrep sirtqa chiqip qarisa, memuriy bashqurush etritining ademliri hemmisi yügrigen péti qéchip kétiptu, qéyni anam hushidin ketti, eger siz neq meydan'gha kélip körsingiz nahayiti échinishliq menzirini körisiz, qéyni atamning qolliri üzülüp kétiptu"

Wafangdi'en memuriy bashqurush etritining bir mes'uli bu heqte toxtulup, heriketning héchqachan mejburiy élip bérilmighanliqini we adem urush weqesi yüz bermigenlikini éytip mundaq didi: " kimni uruptuq, kim silerge shundaq deydu? biz uning héchnersisige chéqilmiduq, héchnersisini öriwetmiduq , bu ish héchqachan mejburiy élip bérilmidi"

Lékin, kenttiki yene bir adem bizge, hökümetning yerlerni tartiwilish jeryanida, dawamliq qara jem'iyet küchlirini ishqa salidighanliqini, ularning kenttikilerni qattiq urghanliqini ashkarilidi. Bu kishi yene, ötken yili qishta kent ahalisi ehwalni erz qilish üchün béyjinggha barmaqchi bolghanda, poyiz istansisida zorawanliq bilen tosqunluqqa uchrighanliqini, hetta qanun organlirining kiyimini kiygen hökümet xadimlirining bir qisim kent ahalisining put - qollirini gurjek, jotu bilen urup sunduriwetkendin kéyin kentke qayturup élip kelgenlikini ashkarilidi.

Ju fajéning kilini, lyu shujéning éytishiche , ularning a'ilisidikiler tikken üzüm teklirige 4 yildin ashqan bolup, eslide hökümet her bir tüp üzüm tékige 100 yü'en tölem töleshni békitken bolsimu, biraq memuriy qanun ijra qilish etriti her bir tekke aran 20 yü'en pul bérip, 80 yü'en pulni bermigen , buning bilen ju fajé memuriy qanun ijra qilish etritige bérip , özining razi bolmighanliqini éytqan . Lyu shujéning bildürüshiche , eslide hökümet ulargha 310 ming yü'en tölem tölishi kérek bolsimu , emma aran 140 ming yü'en bergen.

Kenttiki yene bir neper ayal bizning ziyaritimizni qobul qilip, kenttikilerning intayin qorqup ketkenlikini, eger kim yerlirini bérishke qoshulmisa , hökümetning derhal qara jem'iyet guruhini ishqa sélip kenttikilerni edepleydighanliqini, kim qarshi chiqsa, shuning put - qoli sunup , bir qanche ay azap tartidighanliqini éytti.

Xitayda , xelqning yérini mejburiy tartiwilish qilmishi barghansiri köpiyip,buning netijiside qarshiliq heriketlirimu ewj almaqta .(Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.