Улуғчатта йәр тәвриди
2007.04.16

Тәңритағ тор бетидә берилгән хәвәрдин мәлум болушичә, 16 - април күни үрүмчи вақти таң сәһәр 4 тин 20 минот өткәндә, уйғур елиниң улуғчат наһийисидә 4.9 Бал йәр тәвригән. Гәрчә бу қетимқи йәр тәврәштә адәм өлүш вәқәси йүз бәрмигән болсиму, мәзкур наһийиниң оқсалур дегән кәнтидики һөкүмәт бинаси вә бир қисим аилиликләрниң өйлиригә охшимиған дәриҗидә дәз кәткән. Биз мәзкур вәқәдин хәвәрдар болғандин кейин, мунасивәтлик орунларға вә шундақла йәр тәврәш мәркизигә телефон қилип, тәкшүрүш елип бардуқ.
Йәр тәврәш мәркизи болуп һисабланған оқсалур кәнтиниң һөкүмәт бинаси вә шундақла мәзкур җайдики аилиликләр олтурушлуқ өйләрниң тоққузиға охшимиған дәриҗидә дәз кәткән, һәмдә дәз кәткән аилиликләр олтурушлуқ өйләрниң 5 и хәтәрлик өйләр қатариға киргән.
Биз аптоном районлуқ йәр тәврәш идариси, улуғчат наһийилик һөкүмәт орни вә шундақла йәр тәврәш мәркизи дәп көрситилгән уқсалур кәнтигә телефон қилип, тәпсилий әһвалларни игилимәкчи болдуқ. Лекин зияритимизни қобул қилған аптоном районлуқ йәр тәврәш идарисидикиләр өзлириниң бу һәқтә чәтәл радио истансилириға һечқандақ мәлумат берәлмәйдиғанлиқини билдүрди.
Йәрлик һөкүмәт орунлиридикиләр болса " кәчүрисиләр, бу һәқтики әһвални юқиридин адәм келип егиләп болған. Мунасивәтлик материялниң һәммисини улар елип кәтти. Биз бу һәқтә силәрниң зияритиңларни қобул қилалмаймиз" дәп зияритимизни рәт қилди. Лекин оқсалур кәнтиниң дәз кәткән һөкүмәт бинасида диҗорнилиқ қиливатқан бир хизмәтчи бу қетимқи йәр тәврәштә һөкүмәт бинасидин башқа йәнә аилиликләр өйлириниң тамлириғиму асасий җәһәттин чак кәткәнликини етирап қилди.
Биз бу қетимқи йәр тәврәш вәқәси йүз бәргән оқсалур кәнтидики бир қисм аилиликләр биләнму сөһбәттә болдуқ. Зияритимизни қобул қилған мәзкур кәнттики бир қирғиз деһқан бу қетимқи йәр тәврәш вәқәсидин бурун кәнт рәһбәрлириниң һәрбир өйгә кирип, аһалиләрни һөкүмәт селип бәргән бир еғизлиқ йәр тәврәшниң алдини елиш өйигә кирип турушқа буйруқ қилғанлиқини мәлум қилди.
Зияритимизни қобул қилған бу деһқанниң мәлум қилишичә, һөкүмәт йеқинқи 3 йилдин буян мәзкур йезидики аилиликләргә, мәйли уларниң җан сани қанчә болушидин қәтий нәзәр, пәқәт бир еғиздинла йәр тәврәшниң алдини елиш өйи селип беришкә башлиған. Шуңа җан сани көпләр бир еғиз өйгә патмиғанлиқтин, йәр тәврәш хәвири кәлгәндә вақитлиқ шу бир еғиз өйгә чиқип турғини билән, йәр тәврәш хәтири өткәндин кейинла йәнә өзлириниң кона өйигә чиқивалидикән. Зияритимизни қобул қилған бу деһқан өзиниң өйидиму җәми 7 җан бар икәнликини, қошумчә йәнә бир еғиз өй селишқа пули йоқ икәнликини сөзләп бәрди. Зияритимизни қобул қилған бу деһқан сөһбәт җәрянида йәнә, һазир мәзкур кәнттә, кадирларниң һәммиси кәңташа , йәр тәврәшниң алдини алидиған симонт өйләрдә олтуруватқанлиқини, лекин деһқанларниң йәнә 3 тән бириниң му шу бир еғизлиқ өйгиму еришәлмәйватқанлиқини мәлум тәкитлиди. (Меһрибан)
Мунасивәтлик мақалилар
- Йәр тәврәшкә чидамлиқ өйләр қурулушиниң бу йиллиқ пилани орунлиниш җәрянида мәсилиләр көпәймәктә
- Ғәмгә патқан йәр тәврәш бәлвеғи
- Уйғур аптонум райони тәбиий җуғрапийилик апәтләрниң алдини елишқа мәбләғ аҗратмақчи
- Хотәндә 3. 4 Бал йәр тәвриди
- Уйғур елиниң қиш пәслидә көрүлүватқан иллиқлиқ тәбиий апәтләрдин дерәк бәрмәктә
- Йеқин кәлгүсидә тәңритағда еғир йәр тәврәши мумкин икән
- Хитайниң бихәтәр өй қурулуши уйғурларға қандақ мәнпәәт илип кәлди?
- Уйғур елиниң җәнуби аз учрайдиған қар апитигә дуч кәлди