Yer tewreshke chidamliq öyler qurulushida mesile köp

• Muxbirimiz gülchéhrening bu heqtiki toluq melumati
• Download story audio

Xitay hökümitining Uyghur élining apet rayon hemde namrat yézilarda élip bériwatqan yer tewreshke chidamliq öyler qurulushi kéler yilighiche tamamlanmaqchi. Emma igiligen melumatlirimizgha qarighanda hökümet mexsus meblegh ajratqan bu qurulush jeryanida nurghun saxtiliqlar mewjut bolup, déhqanlarni chidamliq öylerge köchürüsh xizmitige mes'ul yerlik kadirlar bu jeryanda hoquqidin paydilinip xiyanetchilik qilmishliridin saqlinalmighan.

Lékin xitay da'irliri yenila bu yer tewreshke chidamliq öyler qurulushi ishlirining mesililerdin xali halda intayin yaxshi teltöküs élip bérilghanliqini teshwiq qilmaqta.

Yer tewresh apitining ziyanliri

2003 - Yili 24 - féwral peyziwat we maralbéshi nahiyilirini asas qilip yüz bergen 6.8 Bal derijidiki yer tewresh, Uyghur éli tarixida yüz bergen eng éghir yer tewresh apiti bolup, 50 mingdin artuq xelq apetke uchridi.Xitay hökümet metbu'atliri eyni chaghda, mezkur yer tewreshte ölgenler sani 268, yarilan'ghanlar 4000 din ashti, 8800 öy örüldi, yene 900din artuq siniplar örüldi dep xewer élan qildi, emma chet'el metbu'atliri hemde yerlik amma, apetke uchrash emeliy ehهwalining uningdinmu éghir bolghanliqini bildürgen idi.

Mezkur apettin kéyin xitay hökümiti mushuninggha oxshash tebi'iy apetlerning téximu köp ziyanlar keltürüp chiqirishning aldini élish üchün Uyghur élidiki yer tewresh belwéghigha jaylashqan qeshqer, atush, aqsu, xotenning bezi jaylirini asas qilghan, namrat hem apet rayonlirida 2004 - yili2 - aydin bashlap besh yil ichide, namrat déهhqanlarni yer tewreshke chidamliq öylerge köchürüsh üchün, jem'iy bir milyard yüen meblegh sélip buni üch yilgha bölüp emeliyleshturidighanliqini élan qildi.Hazir xitay hökümitining yer tewreshke chidamliq öylerni sélish qurulushining axirqi mezgili hésablinidu.

Xitay da'irilirining xeliqqe bergen wediliri

Da'iriler bu qurulushni 2008 - yilining axirighiche pütünley tamamlap Uyghur éli buyiche jem'iy ikki milyon 10 ming namrat déhqanni pishshiq xishlarda sélin'ghan chidamliq yéngi öylerge köchürüp kirmekchi.

Bir qanche kündin buyan qeshqer wilayetlik hökümetning tor bétide qeshqerde séliniwatqan yer tewreshke chidamliq öyler qurulushining % 99 ning ölchemge layiq ikenliki,her bir a'ilining pishshiq késektin sélin'ghan chidamliq öylerge köchüp kirishi üchün kishi béshigha toghra kélidighan yardem sommisining 18ming 700yüen etrapida ikenlikini, dölet hemde yerlik hökümet da'irliri ajratqan bu mebleghning jayida ishlitilip qurulush jeryanida héchqandaq mesile körülmigenliki, qurulushning pilanlighan waqittin burun pütküzüshke kapaletlik qilidighanliqi heqqide mexsus xewerler bérildi.

Qurulushning chidamlighi toghrisidiki téléfon ziyaritimiz

Biz qeshqer yézilirida séliniwatqan yer tewreshke chidamliq öyler qurulushining ehwali heqqide téximu tepsili melumat élish üchün melum yézining kent kadirini ziyaret qilghan bolsaqmu u kishi so'allirimizgha chala - puchuq jawab qayturdi.

Gerche bu kent kadiri yer tewreshke chidamliq öyler qurulushining yaxshi ünümlük élip bériliwatqanliqini éytqan bolsimu emma del shu yézidiki bir déhqan bolsa bu qurulushning hökümet teshwiqatida éytilghandek emeslikini yenila köp sandiki déhqanning öyni püttürüshke qurbi yetmeywatqanliqini bildürdi.

Ilgirimu bu heqte qeshqerdiki bezi déhqanlar radi'omizgha inkas qilip, hetta bezi yézilarda yer tewreshke chidamliq öyler qurulushigha mes'ul yerlik kadir hem orunlarning yuqiri derijilik orunlarning tekshürüshidin ötüsh üchünla yasalmiliq qilip déhqanlarning öylirining kocha terepke qaraydighan tamlirinila pishshiq késekte qurup qoyghanliqini bu jeryanda shekilwazliq, xiyanetchilik qilmishlirining éghirliqini melum qilghan idi. (Gülchéhre)