Хитай һөкүмити йәр -земин мәсилиси һәққидә йеңи сиясәт бекитти


2006-09-06
Share

Сәйшәнбә күни хитай һөкүмити йәр -земин башқуруш мәсилиси һәққидә бекиткән йеңи сияситини елан қилди һәмдә бундин кейин йәр земин мәсилисини бир тәрәп қилишта, чоқум мәзкур сиясәт бойичә иш беҗириш керәкликини оттуриға қойди.

Хитай һөкүмити елан қилған бу қетимқи йәр-земин башқуруш сияситидә мундақ бәлгилимиләр оттуриға қоюлған: "бундин кейин йәр -земин қануниға хилаплиқ қилғучиларни бир тәрәп қилиш күчини техиму илгири сүрүш керәк, йәр ишлитиштә мәнпәәт тәқсиматиға хилап қилмишларға зәрбә беришни күчәйтиш керәк, дөләт земинидин пайдилиниш һоқуқини йәрликкә өткүзүп бериш арқилиқ йәрликниң қалаймиқан йәр игиләш қилмишлирини тосаш керәк".

Анализчилар гуманий қарашта

Гәрчә хитай һөкүмити йәр -земин башқуруш мәсилиси һәққидә йеңи сиясәт елан қилип, башқуруш күчини техиму чиңитиш керәкликини җакарлиған болсиму, йәр - земинидин айрилип қеливатқан, һөкүмәтниң сияситидин үмидсизләнгән хәлқ вә шундақла бу һәқтә тәтқиқат елип бериватқан бир қисим анализчилар, хитайниң бу қетимқи йеңи сияситиниң һәқиқий иҗра қилинишиға йәнила гуман билән қаримақта.

"Хитай йәр ‏- земин" җурнилиниң мәсули лю әпәнди "һазир йәрлик һөкүмәтниң йәр -земин қануниға хилаплиқ қилип, халиғанчә йәр игиләп, йәр тәстиқлиши йәрлик малийә мәсилиси билән мунасивәтлик. 94 ‏- Йили оттуриға чиққан "йәр ‏- земин сода сиясити" дин кейинла, йәрлик һөкүмәт өз иқтисади мәнпәәтинила көздә тутуп, йәр игиләш вә йәр сетиш содисиға берилип кәткән. Әгәр бу мәсилә тоғра бир тәрәп қилинмайдикән, һәр қандақ сиясәт бекитилгини билән, йәнила һечқандақ үнүми болмайду" дәп көрсәтти.

Уйғур елидики әһвал техиму еғир

Йеқинқи йиллардин буян, мәйли хитай өлкилиридә болсун яки уйғур елидә болсун, йәр земин мәсилиси һәққидә түрлүк тоқунушлар йүз бәрмәктә. Мәсилән, хитай өлкилиридә йәр мәсилиси түпәйлидин, деһқанлар билән йәрлик һөкүмәт оттурисида қаттиқ тоқунушлар йүз бәрмәктә һәтта аманлиқни сақлаш сақчилириму, өз йеридин айрилип қелип даваға кәлгән пуқраларни қоғдаш буяқта турсун, уларға тәһдит ишлитип, уларни тутқун қилидиған әһвал наһайити көп учрайдиған болған.

Уйғур елидә болса, бу хил тоқунушлар гәрчә хитай өлкилиридикидәк очуқ ‏-ашкарә оттуриға чиқмиған болмисиму, йәр ‏- земин мәсилиси һәққидә наразилиқ билдүргүчиләр йәнила хили көп санни игилигән.

Америкида турушлуқ, бундин илгири уйғур елидики ишләпчиқириш қурулуш армийисидә узун йил ишлигән уйғур зиялийси илшат әпәнди ишләпчиқириш қурулуш армийисиниң әзәлдин түрлүк зомигәрлик қилмишлири арқилиқ, уйғурларни өз маканидин қоғлап, әң яхши җайларға игә болуп келиватқанлиқини сөзләп келип, хитай һөкүмити йеқинда чиқарған бу йеңи сиясәтниң уйғур елидә һечқандақ роли болмайдиғанлиқини билдүрди. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт