Ishlepchiqirish qurulush armiyiside ishligen Uyghur ziyaliysi yer -zémin mesilisi heqqide toxtaldi

• Muxbirimiz méhribanning bu heqtiki toluq melumati
• Download story audio

Yéqinqi yillardin buyan, gerche xitay hökümiti yer - zémin mesilisi heqqide dawamliq yéngi siyasetlerni chiqirip, yer -zémin qanunigha yéngi mezmunlarni qoshup kéliwatqan bolsimu, puqralarning yer -zémini yerlik hökümet teripidin xalighanche tartiwélinidighan hetta tartiwélin'ghan jayning tölem heqqini bermeydighan ehwallar xitayning hemmila jayida dégidek mewjut bolup turmaqta. Xitay ölkiliride bu xil ehwal künséri éghirlashqanliqtin, yerlik xelq merkizi hökümet orunlirigha bérip dawa qilishqa bashlighan. Lékin dawa qilghuchilar dawamliq saqchilar teripidin basturulup hetta qolgha élinip, ziddiyet téximu küchiyishke bashlighan. Uyghur élide bolsa, gerche bu xil toqunushlar ochuq ashkara halda otturigha chiqmighan bolsimu, öz makanidin ayrilip qéliwatqan Uyghur xelqining hökümetke bolghan naraziliqi barghanséri kücheygen.

Yéqinda radi'omizning ziyaritini qobul qilghan, bundin ilgiri uzun yil ishlepchiqirish qurulush armiyiside ishligen Uyghur ziyaliysi élshat ependi "yer mesilisige kelsek, xitay ölkiliride, meyli qandaq bolushtin qet'iy nezer, yer zéminidin ayrilip qalghanlar yuqirilap dawa qilish erkinlikige ige. Lékin Uyghur élide bolsa, öz makanidin ayrilip qéliwatqan Uyghurlar hergizmu xitaylar bilen teng turalmaydu " dep tekitlep, özi turghan ishlepchiqirish qurulush armiyisining yer mesiliside neqeder zomigerlik qilidighanliqini ashkarilidi.

Élshat ependi söhbet jeryanida, yer zéminidin ayrilip qalghan bir qisim Uyghurlar gerche yer mesilisi heqqide ishlepchiqirish qurulush armiyisini erz qilip dawa qilishqa tirishqan bolsimu, axirqi hésabta sotta yenila yéngelmeydighanliqini hetta tölem pulighimu toluq érishelmeydighanliqini tekitlidi.

Élshat ependi söhbet jeryanida yene, xitay ölkiliride yersiz qalghan xitay déhqanlirining Uyghur élige kélip, binem yer achimiz dep, nurghun yerge ige boluwatqanliqini hetta namrat Uyghur déhqanlirini qul qilip ishlitidighanliqini éytti. (Méhriban)