4 ‏- Қетимлиқ хәлқара йетим балилар учришиш паалийити истанбулда давамлашмақта

4 ‏- Қетимлиқ хәлқара йетим балилар учришиш паалийитигә қатнишиш үчүн инсаний ярдәм вәхпи тәрипидин дуняниң һәр қайси җайлиридин истанбулға кәлтүрүлгән йетим балилар бир қанчә күндин бири истанбулни сәйлә қилип, муһим тарихий орунларни, музийларни зиярәт қилди вә шәһәр башлиқлирини, иҗтимаий тәшкилат мәркәзлирини зиярәт қилди.
Мухбиримиз арислан
2009-10-15
Share
Istanbul-sheher-bashlighi-Uyghur-yetim-balilar-305.jpg Сүрәт, 4 ‏- қетимлиқ хәлқара йетим балилар учришиш паалийитигә қатнашқан балилар билән биргә уйғур балиларға вакалитән 4 нәпәр уйғур өсмүр қизи қатнашқан болуп, сүрәттә истанбул шәһириниң муавин валийси мустафа алтунташ валийлиқ залида уларни қизғин қарши алған көрүнүшләрдин бири.
RFA Photo / Arslan

Бу паалийәткә уйғур йетим балилириму тәклип қилинған болуп, уйғур балиларға вакалитән 4 нәпәр уйғур өсмүр қизи қатнашти.

Дуняниң һәр қайси җайлиридин кәлгән йетим балилар гурупписи 10 - айниң 15 - күни истанбул валийилиқини зиярәт қилди. Истанбул шәһириниң муавин валийси мустафа алтунташ валийлиқ уларни залида қизғин қарши алди. Зиярәткә йетим балилар билән биргә инсаний ярдәм вәхпиниң рәиси буләнт йилдирим вә рәис вәкили явуз дәдә қатарлиқ кишиләрму иштирак қилди.

Муавин валий мустафа алтунташ охшимиған дөләтләрдин кәлгән йетим балилар билән айрим ‏ - айрим сөһбәтләшти. Балиларға һәр хил һәдийә ‏ - совға қилди. Муавин валий мустафа алтунташ зиярәт ахирида йетим балилар билән биргә хатирә рәсимгә чүшти.

10 - Айниң 17 ‏- күни түркийә вақти саәт 19:30 да истанбулниң сүтлүчә районидики халич қурултай йиғин залида башланмақчи болған 4 ‏ - қетимлиқ хәлқара йетим балилар учришиш паалийити үчүн инсаний ярдәм вәхпи тәрипидин дуняниң һәр қайси җайлиридин түркийигә кәлтүрүлгән болуп, бу йетим балиларни истанбулниң шәһәр башлиқлири, сиясий партийә мәсуллири вә идарә ‏ - җәмийәт рәһбәрлири қучақ ечип қизғин қарши алди.

Бу учришиш паалийитигә ливан, пәләстин, ирақ, ефопийә, судан, чичәнистан, шәрқий түркистан, пакистан, македонийә вә түркийә қатарлиқ дөләт вә районлардин йетим балилар тәклип билән қатнашқан.

Йетим балиларға йәнә әсәнләр шәһәр башлиқи тәйфик гөксу әпәнди әсәнләр мәдәнийәт мәркизидә кәчлик тамақ зияпити бәрди вә һәдийә тәқдим қилди. Униңдин башқа йәнә сиясий партийә вә шәһәр башлиқлири уларни қизғин күтүвелип зияпәт бәрди. Бу әснада йетим балилар истанбулниң султан әхмәт мәсчити, минятүрк, 1453 - йил панорама музейи вә фәсһанә қатарлиқ тарихй орунларни вә музийларни зиярәт қилди вә лонапарк бағчисида оюн ойниди. Йетим балилар йәнә, бир тәрәптин 10 - айниң 17 - күни өткүзүлидиған 4 ‏- қетимлиқ хәлқара йетим балилар учришиш паалийитидә номур көрситиш үчүн тәйярлиқ қилмақта. Паалийәткә йәнә түркийидин өмәр қара оғлу, америкидин тайсун амир вә барака билу, германийәдин аммар, ливандин фиркәт әлмаҗид қатарлиқ мәшһур сәнәтчиләр қатнишип нахша, музика тәқдим қилидикән.

Бу паалийәткә 10 миң дин артуқ кишиниң қатнишдиғанлиқи пәрәз қилинмақта

10 ‏- Айниң 15 - күни йәнә, кишилик һоқуқ, әркинлик вә инсаний ярдәм вәхпиниң рәиси буләнт йилдирим, дуняниң һәр қайси җайлиридин кәлгән йетим балилар билән биргә мухбирларни күтивелиш йиғини ечип, уруш вә ишғалийәт астида қалған дөләтләрдә йүзләрчә йетим балиларниң орган әткәсчилири вә инсан тиҗарәтчиләрниң қолиға чүшүп кәткәнликини билдүрүп, кишилик һоқуқ вә әркинлик вә инсаний ярдәм вәхпи бу йитим балиларниң сағлам вә бихәтәрлик шараитларда өсүп йетилиши үчүн хизмәт ишләватқанлиқини билдүрди.

Буләнт йилдирим йәнә мундақ деди: "бизниң мәқситимиз, йүз миңларчә йетимларға игә болуш, шуниң үчүн йетимлар үчүн капаләтлик қилиш систими башлидуқ. Йәни һәр балиға айлиқ расхот чиқим орунлаштуруп турмушиға капаләтлик қилдуқ. Капаләт сестими билән давамлиқ беқип келиватқан йетим балиларниң сани һазир 15 миңға йәтти."

Биз, бу һәқтә толуқ мәлуматқа еришиш үчүн паалийәткә қатнишиватқан уйғур балилар вә у балиларниң, уйғурлар һәққидә программа тәқдим қилишиға йетәкчилик қиливатқан рәна ханим билән сөһбәт елип бардуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт