4 ‏- Qétimliq xelq'ara yétim balilar uchrishish pa'aliyiti istanbulda dawamlashmaqta

4 ‏- Qétimliq xelq'ara yétim balilar uchrishish pa'aliyitige qatnishish üchün insaniy yardem wexpi teripidin dunyaning her qaysi jayliridin istanbulgha keltürülgen yétim balilar bir qanche kündin biri istanbulni seyle qilip, muhim tarixiy orunlarni, muziylarni ziyaret qildi we sheher bashliqlirini, ijtima'iy teshkilat merkezlirini ziyaret qildi.
Muxbirimiz arislan
2009-10-15
Share
Istanbul-sheher-bashlighi-Uyghur-yetim-balilar-305.jpg Süret, 4 ‏- qétimliq xelqara yétim balilar uchrishish paaliyitige qatnashqan balilar bilen birge uyghur balilargha wakaliten 4 neper uyghur ösmür qizi qatnashqan bolup, sürette istanbul shehirining muawin waliysi mustafa altuntash waliyliq zalida ularni qizghin qarshi alghan körünüshlerdin biri.
RFA Photo / Arslan

Bu pa'aliyetke Uyghur yétim balilirimu teklip qilin'ghan bolup, Uyghur balilargha wakaliten 4 neper Uyghur ösmür qizi qatnashti.

Dunyaning her qaysi jayliridin kelgen yétim balilar guruppisi 10 - ayning 15 - küni istanbul waliyiliqini ziyaret qildi. Istanbul shehirining mu'awin waliysi mustafa altuntash waliyliq ularni zalida qizghin qarshi aldi. Ziyaretke yétim balilar bilen birge insaniy yardem wexpining re'isi bulent yildirim we re'is wekili yawuz dede qatarliq kishilermu ishtirak qildi.

Mu'awin waliy mustafa altuntash oxshimighan döletlerdin kelgen yétim balilar bilen ayrim ‏ - ayrim söhbetleshti. Balilargha her xil hediye ‏ - sowgha qildi. Mu'awin waliy mustafa altuntash ziyaret axirida yétim balilar bilen birge xatire resimge chüshti.

10 - Ayning 17 ‏- küni türkiye waqti sa'et 19:30 da istanbulning sütlüche rayonidiki xalich qurultay yighin zalida bashlanmaqchi bolghan 4 ‏ - qétimliq xelq'ara yétim balilar uchrishish pa'aliyiti üchün insaniy yardem wexpi teripidin dunyaning her qaysi jayliridin türkiyige keltürülgen bolup, bu yétim balilarni istanbulning sheher bashliqliri, siyasiy partiye mes'ulliri we idare ‏ - jem'iyet rehberliri quchaq échip qizghin qarshi aldi.

Bu uchrishish pa'aliyitige liwan, pelestin, iraq, éfopiye, sudan, chichenistan, sherqiy türkistan, pakistan, makédoniye we türkiye qatarliq dölet we rayonlardin yétim balilar teklip bilen qatnashqan.

Yétim balilargha yene esenler sheher bashliqi teyfik göksu ependi esenler medeniyet merkizide kechlik tamaq ziyapiti berdi we hediye teqdim qildi. Uningdin bashqa yene siyasiy partiye we sheher bashliqliri ularni qizghin kütüwélip ziyapet berdi. Bu esnada yétim balilar istanbulning sultan exmet meschiti, minyatürk, 1453 - yil panorama muzéyi we fes'hane qatarliq tarixy orunlarni we muziylarni ziyaret qildi we lonapark baghchisida oyun oynidi. Yétim balilar yene, bir tereptin 10 - ayning 17 - küni ötküzülidighan 4 ‏- qétimliq xelq'ara yétim balilar uchrishish pa'aliyitide nomur körsitish üchün teyyarliq qilmaqta. Pa'aliyetke yene türkiyidin ömer qara oghlu, amérikidin taysun amir we baraka bilu, gérmaniyedin ammar, liwandin firket elmajid qatarliq meshhur sen'etchiler qatniship naxsha, muzika teqdim qilidiken.

Bu pa'aliyetke 10 ming din artuq kishining qatnishdighanliqi perez qilinmaqta

10 ‏- Ayning 15 - küni yene, kishilik hoquq, erkinlik we insaniy yardem wexpining re'isi bulent yildirim, dunyaning her qaysi jayliridin kelgen yétim balilar bilen birge muxbirlarni kütiwélish yighini échip, urush we ishghaliyet astida qalghan döletlerde yüzlerche yétim balilarning organ etkeschiliri we insan tijaretchilerning qoligha chüshüp ketkenlikini bildürüp, kishilik hoquq we erkinlik we insaniy yardem wexpi bu yitim balilarning saghlam we bixeterlik shara'itlarda ösüp yétilishi üchün xizmet ishlewatqanliqini bildürdi.

Bulent yildirim yene mundaq dédi: "bizning meqsitimiz, yüz minglarche yétimlargha ige bolush, shuning üchün yétimlar üchün kapaletlik qilish sistimi bashliduq. Yeni her baligha ayliq rasxot chiqim orunlashturup turmushigha kapaletlik qilduq. Kapalet séstimi bilen dawamliq béqip kéliwatqan yétim balilarning sani hazir 15 minggha yetti."

Biz, bu heqte toluq melumatqa érishish üchün pa'aliyetke qatnishiwatqan Uyghur balilar we u balilarning, Uyghurlar heqqide programma teqdim qilishigha yétekchilik qiliwatqan rena xanim bilen söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet