خىتاي ھۆكۈمىتى يېزىلارنى تەرەققى قىلدۇرۇش ھەققىدە يېڭى پىلان تۈزدى
2006.03.09
خىتايدا ئېچىلىۋاتقان 10 - نۆۋەتلىك مەملىكەتلىك خەلق قۇرۇلتىيى جەريانىدا، يەنى چارشەنبە كۈنى خىتاينىڭ ھەرقايسى ئۆلكىلىرىدىكى يېزىلارنى تەرەققى قىلدۇرۇش مەسىلىسى ھەققىدە مەخسۇس ئاخبارات ئېلان قىلىش يىغىنى ئېچىلدى ھەمدە بۇ ھەقتە بىر يۈرۈش يېزا تەرەققىياتىغا مۇناسىۋەتلىك يېڭى سىياسەتلەر ئوتتۇرىغا قويۇلدى.
مەزكۇر يىغىنغا قاتناشقان مۇخبىرلار يېزىلاردا مەۋجۇت بولۇپ تۇرىۋاتقان، دېھقانلارنىڭ ئۆز يېرىدىن ئايرىلىپ قىلىش مەسىلىسى ھەققىدە تەكرار سوئاللارنى ئوتتۇرىغا قويغاندا، يېزا ئىگىلىك مىنىستېرلىقىنىڭ مۇئاۋىن مىنىستىرى يى چىنجې يەر مەسىلىسىنىڭ دېھقانلار ئۈچۈن ھەقىقەتەن ناھايىتى ئېغىر بىر مەسىلىگە ئايلانغانلىقىغا ھەمدە يىلىغا ئاز دېگەندە 1 مىليون دېھقاننىڭ ئۆز يېرىدىن ئايرىلىپ قېلىۋاتقانلىقىغا ئىقرار بولغان. خىتاي دۆلەت تەرەققىيات ۋە ئىسلاھات كومىتېتىنىڭ مۇئاۋىن مۇدىرى دۇ يىن " دېھقانلارنىڭ يېرىنى ئەرزان باھادا سېتىۋېلىشنىڭ ئۆزى دېھقانلارنىڭ مەنپەئەتىگە زىيانكەشلىك قىلغانلىق. ھازىر بۇ خىل ئەھۋال ھەقىقەتەن ئېغىر. شۇڭا بۇ ھەقتە چوقۇم ئىسلاھات ئېلىپ بېرىشىمىز كېرەك " دەپ بىلدۈردى.
خىتاي ھۆكۈمىتى بۇ قېتىمقى خەلق قۇرۇلتىيىدا، مەملىكەت بويىچە دېھقانچىلىق بېجىنى پۈتۈنلەي بىكار قىلىدىغانلىقىنى، 2007 - يىلىغا قەدەر يېزىلار مەجبۇرى مائارىپىدا، ئومۇميۈزلۈك ھالدا ئوقۇش پۇلى ۋە كىتاب پۇلى قاتارلىقلارنى بىكار قىلىدىغانلىقىنى ھەمدە 2008 - يىلىغا بارغاندا، يېزىلاردا ھەمكارلىشىپ داۋالاش تۈزۈمىنى ئومۇميۈزلۈك ئىجرا قىلىدىغانلىقىنى جاكارلىغان.
بېيجىڭدا ئېچىلىۋاتقان مەملىكەتلىك 10 - نۆۋەتلىك خەلق قۇرۇلتىيىغا قاتناشقان ئۇيغۇر ئاپتونوم رايونىنىڭ كومپارتىيە باش سېكرېتارى ۋاڭ لېچۈەن بۇندىن كېيىنكى 11 - بەش يىللىق پىلان مەزگىلىدە، ئۇيغۇر ئېلىدە يېزىلارنى تەرەققى قىلدۇرۇش خىزمىتىنى ئەڭ ئاساسىي ئورۇنغا قويىدىغانلىقىنى ھەمدە ھۆكۈمەتنىڭ يېڭى سىياسىتىگە ئەگىشىپ، پۇرسەتتىن پايدىلىنىپ، بارلىق كۈچ بىلەن ئۇيغۇر يېزىلىرىنى تەرەققى قىلدۇرىدىغانلىقىنى بىلدۈردى.
بۇ مۇناسىۋەت بىلەن، ئامېرىكا ئۇيغۇر بىرلەشمىسىنىڭ باش كاتىپى ئالىم سېيىتوف ئەپەندى ۋە ئامېرىكىدا تۇرۇشلۇق ئۇيغۇر زىيالىيسى سىدىق ھاجى روزى ئەپەندى زىيارىتىمىزنى قوبۇل قىلىپ، ئۆزلىرىنىڭ بۇ ھەقتىكى قاراشلىرىنى ئوتتۇرىغا قويدى.
مۇناسىۋەتلىك ماقالىلار
- ئۇيغۇر ئېلىگە قۇرۇق قول كەلگەن بىر خىتاي ئايال ئون يىلدا 100 مو يەرگە ئىگە بولغان
- دېھقانلارنىڭ بېجى قىسقارتىلغان بولسىمۇ يۈكى يېنىكلىمىدى
- خىتاي ھۆكۈمىتى "11- بەش يىللىق پىلان" دا ئۇيغۇر ئېلىنى يەنىمۇ تېز سۈرئەتتە ئېچىشنى پىلانلىماقتا
- ئۇيغۇر ئېلىدە مىليونلىغان نامرات ئامما جىددىي ياردەمگە مۇھتاج
- ھۆكۈمەتنىڭ باج بىكار قىلىش چارىلىرى ھەقىقەتەن ئۇيغۇر دېھقانلىرىنىڭ يۈكىنى يېنىكلەتتىمۇ؟
- مەجبۇرىي پاختا تېرىشتىن ئەمدىلا قايتىپ كەلگەن دېھقان ئەمدى ھاشارغا ئېلىپ كېتىلدى