Xelq wekilliri yighin achsa xelqni tutamdu?


2005.03.03

Béyjingde her yili bir qétim ötküzilidighan ikki chong yighinning biri bolghan memliketlik siyasi kéngeshning chong yighini 3 - chisla échildi. Yene biri, memliketlik xelq qurultiyining chong yighini shenbe küni échilidiken.

Memliketlik siyasi kéngesh re'isi ja chinglin "inaq jemiyet qurush" ni tekitligen

Shinxu'a agéntliqining xewer qilishiche, memliketlik siyasi kéngeshning re'is ja chinglin bu chong yighinda xu jintawning "inaq jemiyet qurush" toghrisidiki yolyoruqini yaxshi öginishni tekitligen.

B b s ning xewer qilishiche, siyasi kéngesh yighinini birinji qedemde "döletning parchilinishigha qarshi turush qanuni" we xongkong alahide rayonining bashliqi dong jenxu'aning wezipisidin istipa bérish mesilisidin ibaret ikki chong mesilige yighinjaqlan'ghan. Teywen terep xitayning "döletning parchilinishigha qarshi turush qanuni "teywen boghuzidiki ikki terepning hazirqi halitini özgertitidu, biz teywenning tinchliqini saqlaymiz" dégen. Xongkongning alahide rayon bashliqi dong jenxu'a wezipisidin istipa bergendin kéyin, merkizi hökümet ichki qisimda alliqachan bikitip bolghan memliketlik siyasi kéngeshning mu'awin re'isiliq wezipisini yighinning axirida "saylam" resmiyitini ötigendin kéyin élan qilidiken

Yighinda emeldarlarning dewatqini bilen jemiyette xelqning dewatqini oxshimaydu

Jemiyette xelq néme dewatidu? töwende biz béyjingdin nex meydandin élin'ghan awazlarni anglayli. Xelq sarayining jenubidiki dölet kabinitining dert eytip kelgüchilerni kütiwélish ishxanisining aldida dert éytqili kelgen adem nahayiti köp, ularni tutidighan saqchilarmu shunche köp. Munasiwet barghansiri jiddileshken. Saqchilar bu etrapqa bir nechche yüz dane saqchi mashinisi orunlashturghan. Der t éytqili kelgen xelqning qolida qeghezdin bashqa nerse yoq, emma saqchilarning qorallinishi intayin heywetlik, ularning otturisidiki küch sélishturmisida nahayiti chong perq bar. Sherqi shimaldin kelgen bir ayal mundaq dégen : buyil dert éytqili kelgenler bek köp, ularni tutidighan saqchilarmu nahayiti köp. Bügün dölet kabinitining aldida dert éytqili kelgen adem 2000 din ashidu, bu jayda 200 din artuq saqchi mashinisi turdi. Birer yüz métir yerde bir top saqchi bar. Xelq bilen saqchi hazir bir- birini düshmen dep bilidu, hökümet chirikliship, fashistliship ketti.

Amérikining foto muxpiri mayk ependi dert eytqili kelgenlerni kütüwélish ishxanisining aldida turup resimge alsa, saqchilar uni qoshuwélip urghan, tepken, bulupmu béqinidiki jiger, börek bar jaygha qattiq urghan. Uning kinishkisini körgendin kéyinmu 30 nechche minut tutup turghan. Saqchi organliri bu heqte izahat bérishni ret qilghan. Xitay tashqi ishlar ministirlikini bayanatchisi lyu jenchaw "men bu gepni hazir anglawatimen, biz éniqlap köreyli" dep özini qachurghan. Bu weqeni körgen bir ayal, bundaq weqening yüz bergenlikige heyran qalmaymen. 2004 - Yilidimu bundaq bir weqe bolghan. Saqchilar chet'ellik bir ayal muxbirni tutup ketken idi.

Shangxeylik bir ayal mundaq dégen: biz xelq qurultiyining yighini échilishini kütüp turuwatimiz, yighin meydanigha barimiz, xelq wekillirige qilidighan gépimiz bar, yetküzüp béridighan xétimiz bar, gépimizni qiliwalghandin kéyin tutup ketse meyli, undaq qilmisaq ular mesilini hel qilmaydu.

Béyjingliq bir'ayal : ikki chong yighin bashlan'ghandin étibaren bizge 24 sa'et nazaret qiliwatidu, nege barsaq bizni saqchi mashinisi élip baridu, dokkanlargha kirsek saqchilar bille kiridu. Dostlirimzining öyige barsaq, saqchilar aldi bilen öyge kirip olturidu. Bizde héchqandaq kishilik hoquq qalmidi.

Xitay saqchiliri 3 - ayning 14 - künigiche chong heriket qollinidiken

Chong quruqluqtiki "sina tor béti" de bayan qilinishiche, béyjing sheherlik saqchi idarisining bashliqi ma jénchu'en 3 - ayning 3 - künidin 14 - künigiche bolghan waqit jama'et xewpsizliki pilanini omumyüzlük emelge ashurilidighan waqit bolidu؛ jama'et xewpsizlik ministirliki bilen merkizi téléwiziye istansisi birlikte qanun programmisi körsitidu. Béyjing, shangxey qatarliq sheher we ölkilerde jama'et xewpsizliki idarisining bashliqliri xewpsizlik istratégiyisi boyiche emeliyetke tetbiqlap heriket qollinidu. Bu pütünley xu jintawning démokratik, qanunluq, adil, dostluq, tinch we inaq sotsiyalistik jemiyet qurush dégen yolyoruruqini ijra qilish üchün qilinidighan heriket, dégen.

Siyasi kéngesh xelqqe ziyankeshlik qilidighan ishlargha qulaq yupurmasliqi kérek

Ulugh ira gézitining xewer qilishiche, ismi - jismi bilen tizimlap éniqlan'ghan sanliq melumatqa asasen éytqanda, xitay hökümiti ziyankeshlik qilip öltürgen falun'gongche nepes meshqi qilghuchilarning sani 1442 neper. Buning üchün falun'gongchilaning xelq'arada 29 dölette 47 neper xitay hökümitining emeldari üstidin yollighan erzi qubul qilin'ghan. Xitay kommunist partiyisining ilgharliqini saqlash terbiyisi dégen heriket bashlan'ghandin kéyn xitay kommunist partiyisidin chékinip chiqiwatqan adem sani 100 mingdin ashqan. Proféssor sün wén'gu'ang ependi bu qétimqi siyasi kéngesh yighin'gha "uchuq sot achmay, puxralarni tutup qélip ziyankeshlik qilip öltüriwétidighan weqelerge qulaq yupurmasliq kérek, xelq wekilliri, siyasi kéngesh wekilliri yalghandin anglimas boliwélishni toxtitishi kérek" dep teklip sun'ghan. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.