Xitaydiki yémeklik bixeterliki dunya yémeklikige tesir yetküzmekte


2007-05-08
Share

Amérikidiki öy haywanlirining xitay yémeklikidin zeherlen'genliki heqqidiki délo yenila tekshürüsh jeryanida bolup, hazirghiche xitayda ishlepchiqirilghan haywanatlar yémeklikidin zeherlen'gen öy müshüki we itlarning sani barghanséri köpeymekte.

Bashqa döletler xitaydin yémeklik import qilishtin qorqmakta

Xitaydiki yémeklikning bixeterlik mesilisi kishilerni qattiq endishige qoyush bilen bir waqitta, yene bir qétim dunyaning diqqitini qozghimaqta.

Amérikida, xitayda ishlepchiqirilghan haywanatlar yémeklikidin zeherlen'gen öy müshüki we itlarning sani barghanséri köpiyiwatqan bundaq bir peytte, xitaydiki yémeklik bixeterlik mesilisi dunyaning her qaysi jayliridiki yémekliklerning süpet mesilisigimu zor tesir körsetmekte.

Radi'omizning igilishiche,hazir xitayning özidimu, kishiler bazarlarda sétiliwatqan türlük yémeklerge toluq ishench qilalmaydighan hemde sétiwalghan yémekliklerni istimal qilishtinmu qorqidighan bolup qalghan.

Amérika awazi radi'osining bu heqte bergen melumatida körsitilishiche, yéqinda amérikida,bir qisim it, müshük qatarliq öy haywanlirining zeherlinilishi xitaydin import qilin'ghan yémekliklerni istimal qilghanliqidin ikenliki ispatlan'ghan. Bu heqtiki dilolarning dawamlishishi bilen bir waqitta, xitaydiki yémekliklerning bixeterlik mesilisi yene bir qétim dunyaning diqqitini qozghighan bolup, kishilerni téximu zor endishige salghan.

Bu ehwalgha, xitay jama'itining inkasi

Béyjingdiki haywanatlarni asrash kéngishining bashliqi chin shyawnaning bildürüshiche, haywanatlarning yémekliktin zeherlinish mesiliside, amérikiliqlar bilen xitaylarning inkasi pütünley oxshimaydiken. Xitayda bolsa ta hazirgha qeder téxi haywanatlar yémekliki mesiliside, xeterlik yaki bixeter dégen mesile otturigha qoyulmighan. Haywanatlarni asrash kéngishning qilishqa tégishlik ishi peqet haywanlarning normal yashishigha shundaqla bashqilar teripidin xarlanmasliqigha mes'ul bolush iken.

Chin shyawna sözide yene," eger xitay hökümitining haywanatlargha bolghan pozitsiyisi yenila özgermey, yémekliklerni ishlepchiqirishta tüzümni chingaytmaydiken, undaqta xitay mehsulatliri ékisport qilinishta zor tosalghulargha uchraydu, shuning bilen bir waqitta, xitay iqtisadimu zor ziyan'gha duch kélidu" dep tekitlep, xitay iqtisadining tereqqiy qilish jeryanida yüz bériwatqan bu mesililer hazir bara - bara dunyawiy mesilige aylandi. Hazir bashqini bir chetke qayrip qoyayli, peqet yémeklikler mesilisining özila dunya yémeklikige zor tesir yetküzmekte" dep körsetti.

Xitay saxta yémekliklirining Uyghur élidiki ehwali

Radi'omizning ziyaritini qobul qilghan ürümchi shehiridiki bir puqra mezkur sheherde yamrap kétiwatqan saqta yémeklikler heqqide toxtilip," hazir bu jayda insanlar istimal qilidighan un, may qatarliqlardinmu chataq chiqiwatsa, haywanatlar yémeklikidin chataq chiqishi bayila turghan gep " dep bildürdi.

Ö kishi sözide yene hazir köp sandiki kishilerning talada tamaq yéyishtin qorqidighan bolup qalghanliqini, hetta köktat we gösh, miwe ‏-chiwe qatarliqlarni alghandimu intayin éhtiyat qilidighan bolup ketkenlikini bildürdi.

Ziyaritimizni qobul qilghan bu puqra söhbet jeryanida yene, hazir ürümchide saxta dora we saxta yémeklik, saxta kiyim - kéchek qatarliq mehsulatlarning yildin -yilgha köpiyip kétiwatqanliqini hemde bu xil saxta mallarning hemmisining dégidek ichkiridin kelgenler teripidin sétilidighanliqini melum qilip öz köz qarashlirini eytti.

Xitay hökümitining yémeklikler bixeterliki mesiliside tutqan siyasiti

Béyjing ijtima'iy sana'et institutining xitay ishliri tetqiqatchisi, proféssor xu shindu ependi, xitaydiki yémeklikler bixeterliki mesilisining yildin -yilgha éghirliship kétiwatqanliqini tekitlep, hökümetning bu heqte yéterlik chare -tedbir qollanmaywatqanliqini, munasiwetlik orunlarning intayin mes'uliyetsiz ikenlikini hemde dawamliq mesile yüz bermigiche, tekshürüsh élip barmaydighanliqini bildürdi.

U sözide " munasiwetlik orunlar peqet mesile yüz bérip, adem ölüsh hadisi yüz bergende, andin tekshürüsh élip bérishni oylaydu. Tekshürgendimu peqet mehsulat ishlepchiqarghan karxanilarni tekshürüp, munasiwetlik hökümet orunliridiki mes'ul kishilerni sürüshte qilmaydu. Shunga mesile yenila yiltizidin hel qilinmay kelmekte" dep körsetti.

Xitay dölet derijilik nazaret qilish orginining melum qilishiche, yéqinda ular amérika dora yémeklik bashqurush idarisining wekilliri bilen xitaydin import qilin'ghan bulghan'ghan yémekliklerning amérikidiki bir qisim üy haywanlirining ölüp kétishini keltürüp chiqarghanliqi heqqide mexsus muzakire élip barghan.

Yéqinda amérika soda teshkilati xitaydiki eqliy mülük we saxta mehsulat mesilisi heqqide dunya soda teshkilatigha xitayning üstidin mexsus erz sun'ghan. Eriz sun'ghuchi teshkilatning sabiq re'isi mezkur erizning xitaydiki saxta mallarni tosushta, azraq bolsimu, rol oyniyalishini, shundaqla xitay hökümitining saxta mehsulatlarni bir terep qilishqa yiterlik ehmiyet bérishini ümid qilidighanliqini bildürgen. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet