Уйғур елидә өлүш сәвәби ениқ болмиған өй һайванлириниң гөши байқалди


2007.03.20

16 ‏- Март күни хәлқара учур ториниң үрүмчидин бәргән хәвиридә ейтилишичә, өткән сәйшәнбә күни күйтүн шәһәрлик җамаәт хәвпсизлик тармақлири билән йәрлик сүпәт тәкшүрүшкә мәсул тармақлар бирликтә куйтуң шәһәрлик әхләтләрни бир тәрәп қилиш мәркизидә бир тонниға йеқин қандақ кесәл сәвәбидин өлгәнлики ениқ болмиған өй һайванлириниң гөшини көйдүрүп бир тәрәп қилған икән.

Өлүш сәвәби ениқ болмиған һайван гөшлири базарда

Мәзкур хәвәрдә ейтилишичә, әслидә бу бир тонниға йеқин қандақ кесәл сәвәбидин өлгәнлики ениқ болмиған өй һайванлириниң гөшини лин вә лю фамилилик икки нәпәр хитай чөчәк районидин әкилип куйтуң базирида сатмақчи болған икән. Лекин уларниң һәрикити куйтуң шәһәрлик җамаәт хәвпсизлик идариси тәкшүрүш гурупписиниң гуманини қозғиғанлиқтин улар өз мәқситигә йетәлмигән. Хәвәрдә йәнә өлүш сәвәби ениқ болмиған бу өй һайванлири төт ат, бир кала вә йигирмидин артуқ қойни өз ичигә алғанлиқи мәлум қилинған.

Бундин бир нәччә йил илгири, уйғур елиниң чөчәк вә алтай районлиридики мал -чарвилар арисида, бир түрлүк аяғ- туяқ яллуғи намлиқ кесәл тарқалған. Лекин йәрлик һөкүмәт даирилири кесәллик тарқилиш әһвалини ашкарилимай мәхпий тутқанлиқтин, мәзкур кесәлниң тарқилиш даириси барғансери кеңийип, чарвичилар вә истималчиларға зор зиян елип кәлгән. Бу һәқтә зияритимизни қобул қилған чөчәк районидики бир хизмәтчи ханим бундин икки йил илгири мәзкур җайда 300 дин артуқ кесәл калиниң мәҗбурий өлтүрүлүп көмүлгәнликини тәкитләп, өзиниң бу қетим йүз бәргән вәқәдин қаттиқ әндишә қиливатқанлиқини, йәрлик һөкүмәт даирлириниң бу хил әһвалға йеқиндин көңүл бөлүши керәкликини билдүрди.

Хәлқ ичидики әндишә

Куйтуңгә өлүш сәвәби ениқ болмиған бу 1 тонна әтрапидики өй һайванлири гөшиниң көйдүрүп бир тәрәп қилинғанлиқи һәққидики бу вәқәдин тор арқилиқ хәвәрдар болған үрүмчи аһалилириму илгири тарқалған кала туяқ яллуғи кесилиниң йәнә бир қетим тарқилип кетишидин әндишә қилип, кала гүши һәтта кала сүтиму ичмәйдиған болған. Бу һәқтә зияритимизни қобул қилған бир аял "гәрчә бу һәқтә радио, теливизорларда техи очуқ ‏- ашкара хәвәр бәрмигән болсиму, кишиләр арисида бу хәвәр тарқилип болди, кала гөшини һечким йемәс болди, кишиләр һәтта кала сүтүниму ичмәс болуп кәтти" дәп билдүрди.

Биз куйтуңдә көйдүрүвәткән бу өй һайванлириға юққан кесәлниң зади қандақ кесәллик икәнликини билиш үчүн күйтүн шәһәрлик чарвичилиқ идариси вә аптоном районлуқ чарвичилиқ назарити қатарлиқ орунларға телефон қилдуқ. Лекин мәзкур идарә хадимлири бу һәқтә бивастә җаваб бериштин өзини қачуруп "пәқәт тохулар арисида анчә -мунчә кесәл тарқалған, қой‏- калиларда техи кесәл көрүлмиди" дәп җаваб бәрди.

Әмәлийәтни ейтишқа тәстиқ керәк

Биз бу қетим куйтуңдики мунасивәтлик орунлар бирликтә көйдүривәткән бу өй һайванлириға юққан кесәлниң зади қандақ кесәл икәнликини билиш үчүн, куйтуң шәһәрлик җамаәт хәвпсизлик идариси, күйтүң һайванатлар кисилиниң алдини елиш вә тәкшүрүш идариси вә мәзкур делони ениқлаватқан куйтуң шәһәрлик җамаәт хәвпсизлик идарисиниң чарлиғучи әтрити қатарлиқ орунларғиму телефон қилдуқ. Зияритимизни қобул қилған мәзкур делоға мәсул болған җамаәт хәвпсизлик идарисиниң чарлиғучи бөлүминиң мәсули әркин асия радиоси икәнликини аңлапла өзиниң юқириниң тәстиқисиз бу һәқтики мәхпийәтликни ашкарилиса болмайдиғанлиқини билдүрди.

юқирида дәп өткән өлүш сәвәби ениқ болмиған өй һайванлириға юққан зади қандақ кисәл? һазир уйғур елидики қой вә калилар арисида илгирикидәк кала туяқ яллуғи тарқиливатқанмиду? биз бу һәқтики учурларға игә болуш үчүн, 16 ‏- март күни хәлқара учур то бетидә куйтуңдә йүз бәргән вәқә һәққидә хәвәр елан қилған куйтуң шәһириниң мухбири җав лиҗүән ханимниң телефон номурини тепип давамлиқ сүрүштүрүшни мәқсәт қилдуқ. Лекин җав лиҗүән исимлик бу мухбир " мән болсам аддий бир мухбир. Мән рәһбәрликниң рухситисиз, бу һәқтә сизгә давамлиқ учур берәлмәймән" дәп җаваб бәрди.

Демәк, куйтуңдики мунасивәтлик даириләр гәрчә бир тонна әтрапидики гуманлиқ гөшни көйдүрүп бир тәрәп қилғанлиқини елан қилған болсиму, әмма бу өй һайванлириға қандақ кесәллик юққанлиқини йәнила мәхпий тутқанлиқтин, кишиләр арисидики әнсизлик техиму күчийишкә башлиған. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.