Уйғур елидә юқумлуқ кесәлликләрниң көпийип кетишидики сәвәб нәдә?


2007-07-20
Share

Уйғур елидә чиқидиған ахбарат васитилири сәһийә назаритиниң доклатини асас қилип бәргән хәвәргә қариғанда, уйғур елидә 10 хил юқумлуқ кесәлликниң юқум әһвалида өрләш вәзийити көрүнгән.

10 Хил юқумлуқ кесәлликниң юқумлиниш әһвалида 6 һәссә өрләш көрүлгән

Сәһийә назаритиниң доклатида ашкарилишичә, юқумлуқ кесәлликләрниң ичидә, пут-қол вә еғиз-бурунларға әсвә чиқиш әһвали илгирикигә қариғанда 6 һәссә юқири болған. Униңдин башқа йәнә, қизил, көкйөтәл қатарлиқ кесәлликләрниң юқум әһвалидиму көрүнәрлик өсүш болған.

Чәтәлләрдики уйғур теббий мутәхәссислирниң көрситишичә, бу хил кесәлликләрниң көпийип кетишидики асаслиқ сәвәбләрни , ваксина әмләш ишлириниң үнүмлүк болмаслиқи, дора-дәрмәкләрни қалаймиқан ишлитиш вә турмуш адити қатарлиқлар дин издәш мумкин икән.

Уйғур аптоном районлуқ сәһийә назаритиниң доклатиға асасән тәйярланған мәзкур хәвәрдин мәлум болушичә, уйғур елидә қол-путларға әсвә чиқип қелиш, қатарлиқ 10 хил юқумлуқ кесәлликниң юқум әһвалида 6 һәссә өрләш көрүлгән болуп, униңдин башқа қизил, көкйөтәл, қатарлиқ юқумлуқ кесәлликләрниң юқум әһвалидиму муәййән өрләш көрүлгән.

Әйдиз вируси билән йеңидин юқумланғанларниң сани 6 миң болуп күнигә 17 дин көпәйгән

юқириқи юқумлуқ кесәлликләрдин башқа, уйғур елидә һазир мәвҗут вә инсанларниң һаятиға бивастә тәсир көрситип турған юқумлуқ кесәлләрдин, әйдиз кесили, а типлиқ вә б типлиқ җигәр яллуғи, өпкә туберкулйоз( сил кесили) қатарлиқлар бар.

Бошүн ториниң 2006-йили 12 ‏- айдики мәлуматида, уйғур елидә 2005- йили 9 - айдин 2006- йили 9 ‏- айғичә болған арилиқта әйдиз вируси билән йеңидин юқумланғанларниң сани 6 миң болуп күнигә 17 дин тоғра кәлгән.

Һазир америкида яшаватқан доктур муһәммәт имин дохтур, юқумлуқ кесәллик һәққидә муәййән чүшәнчә берип өтти вә кесәлликиниң юқуш йоллири үстидә тохталди. У йәнә, кесәлликләрниң алдини елиш җәһәттә тохтилип, гәрчә юқумлуқ кесәлликләрдин мутләқ мудапиә көрүш мумкинчилики болмиған тәқдирдиму, юқумлуқ кесәлләрниң юқум әһвалини төвәнләткили болидиғанлиқи оттуриға қойди.

Доктур муһәммәт имин дохтур, һазир хитайдики алдини елиш мумкинчилики болған бир қисим юқумлуқ кесәлликләрниң уйғур елидә ямрап кетишидә хитайда ваксина әмләш ишлириниң системилиқ болмаслиқи, олчәмлик, сүпәтлик ваксининиң ишлитилмәслики вә яки ишлитилгән тәқдирдиму, вақти өтүп кәткән, сүпити өзгәргән ваксинилириниң ишлитилишиниңму муәййән салмақни игиләйдиғанлиқини көрсәтти. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт